ក្រោមការដឹកនាំសម្របសម្រួលនិតិវិធីដោយ លោក ថេង សំណាង ព្រះរាជអាជ្ញារងអមសាលាដំបូងខេត្តសៀមរាប សមត្ថកិច្ចខេត្តសៀមរាប បានសម្រេចបញ្ជូនខ្លួនថៅកែដេប៉ូឈើ និងបក្សពួកចំនួន២នាក់ទៀត បញ្ជូនខ្លួនទៅកាន់តុលាការខេត្ត នៅព្រឹកថ្ងៃទី០៩ ខែកក្កដា ឆ្នាំ២០២១នេះ បន្ទាប់ពីសាកសួរអស់រយះពេល ៣ថ្ងៃជាប់ៗគ្នា។
លោកឧត្តមសេនីយ៍ត្រី ម៉ក់ ធារ៉ា ស្នងការរងទទួលផែនប្រឆាំងបទល្មើសសេដ្ឋកិច្ច ខេត្តសៀមរាប បានបញ្ជាកតាមទូរសព្ទ័ថា ថៅកែដេប៉ូឈើដែលសមត្ថកិច្ចឃាត់ខ្លួនខាងលើមានឈ្មោះ ស្រេង ប្រណី និងបក្សពួកពីរនាក់ទៀត បានបញ្ជូនខ្លួនទៅតុលាការ នៅព្រឹកថ្ងៃទី០៩ ខែកក្កដានេះ ក្រោមបទចោទក្លែងឯកសារទិញលក់។ លោកបន្ថែមថា ចំពោះការសាកសួរបន្តទៀតបើតុលាការបានរកឃើញថា មានបទល្មើសផ្សេងទៀតនោះ ជនសង្ស័យ និងបក្សពួកខាងលើ នឹងត្រូវទទួលទោសទៅតាមភាពជាក់ស្តែងបន្ថែមទៀត។
សូមបញ្ជាក់ថា ការឃាត់ខ្លួននេះធ្វើឡើង ដោយកាលពីថ្ងៃ០៧ ខែកក្កដា សមត្ថកិច្ចបានចុះពិនិត្យដេប៉ូឈើឈ្មោះ តាំង សុខនី ត្រង់ចំណុចភូមិ រលួសខាងលិច ឃុំរលួស ស្រុកប្រាសាទបាគង ខេត្តសៀមរាប ហើយបានរកឃើញឈើល្មើសច្បាប់ប្រភេទសុក្រមចំនួន ១៧៤ដុំ ស្មើ៧,៧៤២ ម៉ែត្រគូប ទើបសមត្ថកិច្ចបានសម្រេចឃាត់ខ្លួនជនសង្ស័យទាំង៣នាក់ខាងលើតែម្ដង៕
អត្ថបទ និង រូបភាព៖ លោក ខេង ឧត្តម
