នៅព្រឹកថ្ងៃទី០៩ ខែកក្កដា ឆ្នាំ ២០២១នេះ ប្រជាពលរដ្ឋក្នុងក្រុងសៀមរាបបានចាប់ផ្ដើមសកម្មភាពចុះឈ្នោះនៅតាមមូលដ្ឋានរបស់ខ្លួន និងដើម្បី សាកសួរព័ត៌មានបន្ថែម ជុំវិញការចាក់វ៉ាក់សាំងការពារជំងឺកូវីដ-១៩ នៅតាមទីតាំងក្នុងមូលដ្ឋានដែរខ្លួនរស់នៅដែលបានកំណត់ដោយសមត្ថកិច្ច និងអាជ្ញាធរមូលដ្ឋាន បន្ទាប់ពីការប្រកាសរដ្ឋបាលខេត្តសៀមរាប ពីការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋក្នុងក្រុងសៀមរាបកាលពីថ្ងៃទី០៨ ខែកក្កដាម្សិលម៉ិញ។
សូមជម្រាបថា នៅថ្ងៃទី០៨ ខែកក្កដា ឆ្នាំ២០២១ ម្សិលមិញនេះ រដ្ឋបាលខេត្តសៀមរាបបានប្រកាសពីការចាប់ផ្ដើមដំណើរការ នៃការចាក់វ៉ាក់សាំការពារជំងឺកូវីដ-១៩ ជូនប្រជាពលរដ្ឋក្នុងក្រុងសៀមរាប តាមផែនការ ដោយ៖
– ជំហានទី១ គឺប្រជាជនក្នុងក្រុងសៀមរាប ចាប់ពីថ្ងៃទី១០ ខែកក្កដា ឆ្នាំ២០២១ខាងមុខនេះ ក្នុងរយះពេល១៤ថ្ងៃ។
– ជំហានទី២ គឺ ស្រុកទាំង១១ នឹងបញ្ជាក់ពេលវេលា នៅពេលដែលយើងនឹងទទួលវ៉ាក់សាំងមកដល់ខេត្តយើងបន្ទាប់ទៀត។
បើបណ្ដាញតាមទំនាក់ទំនងសង្គម « ហ្វេសប៊ុក » ផ្លូវការរបស់ឯកឧត្ដម ទៀ សីហា អភិបាលខេត្តសៀមរាប នៅថ្ងៃទី០៨ ខែកក្កដានេះ ឯកឧត្តមក៏បានអំពាវនាវដល់បងប្អូនប្រជាជនយើងចូលរួមទាំងអស់គ្នាដោយត្រូវ៖ ទី១.រក្សាគម្លាត សណ្តាប់ធ្នាប់ នៅទីតាំងចាក់វ៉ាក់សាំង តាមសង្កាត់នីមួយៗ, ទី២.សូមកុំប្រជៀត ដណ្តើម និងព្យាយាមរុញគ្នា ដើម្បីបានចាក់មុន, ទី៣. ប្រជាជនដែលនៅតាមបណ្តាស្រុក សូមរងចាំជំហានបន្ទាប់ សូមកុំព្យាយាមមកចុះឈ្មោះចាក់វ៉ាក់សាំងក្នុងក្រុងសៀមរាប ព្រោះយើងនឹងមានយកវ៉ាក់សាំងទៅចាក់នៅស្រុករបស់បងប្អូនផ្ទាល់, ទី៤.សូមសហការជាមួយ ចៅសង្កាត់ អ្នកសម្របសម្រួលតាមមណ្ឌលចាក់វ៉ាក់សាំងដែលនៅក្បែរផ្ទះរបស់បងប្អូនប្រជាពលរដ្ឋ, ទី៥.ចំពោះប្រជាជនក្រៅខេត្តសៀមរាប សូមរងចាំវ៉ាក់សាំងដែលគណៈកម្មការបានចាត់ចែងទៅតាមបណ្តាខេត្តរបស់លោកអ្នក។
ក្នុងនាមជាអាជ្ញាធរខេត្ត ឯកឧត្ដម ទៀ សីហា បានបញ្ជាក់ជូនដល់បងប្អូនប្រជាពលរដ្ឋ ក្នុងខេត្តសៀមរាប ពីកិច្ចការងារនេះ ដោយខេត្តទទួលបាននូវ វ៉ាក់សាំងជាបន្តបន្ទាប់ រហូតឈានដល់ ”ការចាក់វ៉ាក់សាំងឲ្យបានគ្រប់ៗគ្នា” តាមផែនការ ដែលរដ្ឋបាលខេត្តបានកំណត់។ ជាមួយនោះឯកឧត្តមក៏បានទទូចឲ្យបងប្អូនប្រជាពលរដ្ឋ មេត្តាអនុវត្តតាមការណែនាំទាំង៥ចំនុចខាងលើ ដើម្បីទប់ស្កាត់ហានិភ័យ ក្នុងការឆ្លងរាលដាល និងការចាត់ចែងគ្រប់គ្រងចំនួនបងប្អូនដែរត្រូវចាក់វ៉ាក់សាំងឲ្យមានប្រសិទ្ធភាព ក្នុងយុទ្ធនាការចាក់វ៉ាក់សាំងនេះឲ្យរលូន ព្រមទាំងក្រើនរំលឹកដល់បងប្អូនប្រជាពលរដ្ឋ ត្រូវអនុវត្តឲ្យបានខ្ជាប់ខ្ជួនជាប្រចាំ នូវវិធានការរបស់រាជរដ្ឋាភិបាល ៣កុំ ៣ការពារ និងសេចក្តីណែនាំរបស់ក្រសួងសុខាភិបាល ៕
អត្ថបទ និង រូបភាព៖ លោក ខេង ឧត្តម
