លោក លឹម ហេង ប្រធានមណ្ឌលចាក់វ៉ាក់សាំង នៃមន្ទីរពេទ្យបង្អែកខេត្ដសៀមរាប បានឱ្យដឹងថា នៅព្រឹកថ្ងៃទី២៩ ខែមិថុនា ឆ្នាំ២០២២នេះ មានប្រជាពលរដ្ឋជាច្រើន បានសម្រុកទៅទទួលវ៉ាក់សាំងដូសជម្រុញច្រើនជាងថ្ងៃមុនៗ បន្ទាប់ពីប្រមុខរាជរដ្ឋាភិបាលបានប្រកាសពីការរកឃើញ ករណីវិជ្ជមានកូវីដ-១៩ ថ្មី ចំនួន ១០ករណី។
លោក លឹម ហេង បានឲ្យដឹងទៀតថា ដំណើរការចាក់វ៉ាក់សាំងនៅក្នុងមន្ទីរពេទ្យខេត្ដសៀមរាប បានបើកដំណើរការជារៀងរាល់ថ្ងៃ មិនថាថ្ងៃសៅរិ៍ ឬថ្ងៃអាទិត្យនោះទេ ដោយក្រុមគ្រូពេទ្យបានផ្ដល់វ៉ាក់សាំងដល់ប្រជាពលរដ្ឋជាបន្ដបន្ទាប់ ចាប់តាំងពីដូសទីមួយរហូតដល់ដូសជម្រុញ។ ជាក់ស្ដែងកាលពីយប់ថ្ងៃទី២៨ ខែមិថុនាម្សិលមិញ បន្ទាប់ពីសម្ដេចតេជោនាយករដ្ឋមន្ដ្រី បានប្រកាសពីរកឃើញឆ្លងជំងឺកូវីដ-១៩ ជាថ្មីនេះ លោកសង្កេតឃើញមានប្រជាពលរដ្ឋទៅទទួលវ៉ាក់សាំងច្រើនជាងសព្វដង ដោយក្នុងព្រឹកថ្ងៃទី២៩ នេះ ពួកគាត់បានទៅទទួលវ៉ាក់សាំងដូសជម្រុញ មានប្រមាណជាង ១០០នាក់ ហើយភាគច្រើនជាដូសជម្រុញ ដោយមានទាំងជនជាតិបរទេស និងក្រុមនិស្សិតដែលបានទៅសិក្សានៅបរទេស ពួកគាត់បានទៅបំពេញវ៉ាក់សាំងដូសជម្រុញនៅមន្ទីរពេទ្យបង្អែកខេត្ដសៀមរាបផងដែរ។
លោកបានបន្ដថា ប្រភេទវ៉ាក់សាំងដែលបានផ្ដល់ជូនពលរដ្ឋមានអាស្ដ្រាហ្សេនីកា AstraZeneca និងភីស្វាយស័រ Pfizer ។ ជាមួយនោះលោកក៏បានអំពាវ ដល់ប្រជាពលរដ្ឋ ដែលបានទទួលវ៉ាក់សាំងដូសទី១ ដល់ដូទី៥ រួចហើយ ត្រូវគៀងគរមិត្ដភ័ក្ដិ ឬបងប្អូនរបស់ខ្លួនទៅទទួលវ៉ាក់សាំងដូសជម្រុញបន្ថែមទៀត ដើម្បីការពារ និងទប់ស្កាត់នូវជំងឺឆ្លងកូវីដ-១៩នេះ ជាពិសេសការពារសុខភាពរបស់ខ្លួនឯង ដោយការពារប្រសើរជាងព្យាបាល បើទោះបីជំងឺកូវីដ-១៩ បានថមថយក្ដី។
ជាមួយគ្នានោះដែរកាលពីពេលថ្មីៗកន្លងទៅនេះ ឯកឧត្ដម ទៀ សីហា អភិបាលខេត្តសៀមរាប បានអំពាវនាវដល់ប្រជាពលរដ្ឋក្នុងខេត្តសៀមរាប ដែលមិនទាល់ទទួលការចាក់វ៉ាក់សាំង និងអ្នកដែលចាក់បាន ១ដូស ឬ ២ដូស សូមរួសរាន់ទៅទទួលការចាក់វ៉ាក់សាំងដូសជំរុញ បន្ថែមទៀត ដើម្បីកុំឲ្យខេត្តសៀមរាប មានផ្ទុះការឆ្លងរីករាលដាល បិទខ្ទប់ និងធ្លាក់ទៅក្នុងសភាពស្ងប់ស្ងាត់ដូចការពីឆ្នាំ២០២០-២០២១ ម្តងទៀតនោះទេ។ ជាមួយគ្នានោះក៏សូមប្រជាពលរដ្ឋរួមគ្នា ជួយគ្នាប្រកបដោយស្មារតីចូលរួម និងសាមគ្គីភាព ដើម្បីការការពារអាយុជីវិតខ្លួនឯង និងក្រុមគ្រួសាររបស់យើង ឲ្យជៀសឆ្ងាយពីជំងឺកូវីដ-១៩ តាមរយៈការចាក់វ៉ាក់សាំងការពារកូវីដ-១៩ ៕
អត្ថបទ និង រូបភាព៖ លោក បូ សាវី
កែសម្រួល៖ លោក អ៊ុន ណារាជ្យ
