សាមណសិស្សចំនួន ២៥០រូប មកពីវត្តចំនួន៩ ដែលមានសាលាពុទ្ឋិកសិក្សាក្នុងចំណោម ៣៨វត្ត នៃស្រុកជីក្រែង នារសៀលថ្ងៃទី២៨ ខែមិថុនា ឆ្នាំ២០២២ បានទទួលចីវពីសាលាអនុគណស្រុកជីក្រែង ដើម្បីជំរុញ និងបណ្តុះទឹកព្រះទ័យដល់សាមណេរ ឱ្យខិតខំរៀនសូត្រ និងបដិបត្តិធម៌វិន័យឱ្យត្រឹមត្រូវ តាមលំអានព្រះពុទ្ឋសាសនា ហើយសំពត់ស្បង់ចីវរទាំងនេះបានមកពីការចូលរួមរបស់មន្ត្រីសង្ឃខេត្ត ព្រះគ្រូចៅអធិការនានា ជាពិសេសសប្បុរសជនទាំងក្នុង និងក្រៅប្រទេស។
ពិធីនេះប្រព្រឹត្តិទៅក្នុងបរិវេនវត្តបុព្វទិសារាម ហៅវត្តកំពង់ក្តី ស្ថិតក្នុងភូមិពន្លឺព្រះផុស ឃុំកំពង់ក្តី ស្រុកជីក្រែង ក្រោមព្រះវត្តមាន ព្រះធម្មសិរី ជុំ គឹមឡេង ព្រះរាជាគណៈថ្នាក់កិត្តិយស ព្រះសុមង្គសិលាចារ្យ ព្រះមេគណខេត្ត និងសហការីគណ និងព្រះវត្តមានព្រះរាជាគណៈ ព្រះចៅអធិការវត្តមួយចំនួន ព្រមទាំងព្រះថេរានុត្ថេរៈ សមណៈសិស្ស និងសប្បុរសជនជាសាសនូបត្ថម្ភជាច្រើនអង្គនាក់ផងដែរ។
ព្រះបវរវិជ្ជា ទេព ភឿន ព្រះអនុគណស្រុកជីក្រែង និងជាព្រះវិន័យធរគណខេត្ត មានសង្ឃដិកាថា៖ ការប្រគេនចីវរទាននេះ គឺសំដៅដល់ការផ្តល់កម្លាំងចិត្ត ដល់សាមណសិស្ស ដែលកំពុងសិក្សារៀនសូត្រ ឱ្យខិតខំប្រឹងប្រែងរៀនសូត្រដើម្បីទទួលបានចំណេះដឹងពេញលេញ និងក្លាយទៅជាធនធានមនុស្សដ៍មានសមត្ថភាព ដើម្បីជាទីពឹងជួយលើអនាគតខ្លួនឯង ជួយគ្រួសារ និងចូលរួមអភិវឌ្ឍសង្គមជាតិឱ្យកាន់តែរីកចម្រើនថែមទៀត។ ពិធីនេះដែរប្រព្រឹត្តិឡើងដើម្បីឆ្លើយតបទៅ តាមស្មារតីនៃសង្ឃប្រកាសនៃអនុសំវច្ឆរមហាសន្និបាតមន្ត្រីសង្ឃទូទាំងប្រទេសលើកទី២៩ សំដៅពង្រឹងវិស័យពុទ្ឋិកសិក្សាគ្រប់កម្រិត ពង្រឹងគុណភាពសិក្សា ធម៌វិន័យដល់សមណសិស្ស ពង្រឹងការបដិបត្តិធម៌វិន័យរបស់ ភិក្ខុ-សាមណេរ ដោយបានណែនាំឱ្យកោរកេសា កោររោមចិញ្ចើម និងស្លៀកដណ្តប់ស្បង់ចីវរឱ្យជាបរិមណ្ឌល និងអនុញ្ញាតឱ្យភិក្ខុ-សាមណេរនៃគណៈមហានិកាយប្រើប្រាស់សំពត់ស្បង់ស្បៃត្រៃចីវរតែពីរពណ៌ប៉ុណ្ណោះ គឺពណ៌ទឹកក្រូចនិងពណ៌ខ្លឹមខ្នុរ។
ក្នុងឱកាសនោះ ព្រះធម្មសិរី ជុំ គឹមឡេង បានចាត់ទុកចីវរទានថាជាទានដ៍វិសេសមួយសម្រាប់ជួយឱ្យសមណៈសិស្សគ្របដណ្តប់អង្កកាយបានសមរម្យ ហើយការសិក្សារៀនសូត្រផ្នែកខាងពុទ្ឋិកសិក្សាមានសតម្លៃណាស់ក្នុងការជួយទ្រទ្រង់ដល់វិស័យព្រះពុទ្ឋសាសនា បើកាលណាព្រះសង្ឃពុំមានចំណេះដឹង ខាងធម៌វិន័យទេ ក៍ព្រះពុទ្ឋសាសនាមិនអាចស្ថិតស្ថេរ កង់វង្សគ្រប់ ៥០០០ព្រះវស្សាបានដែរ។ ព្រះអង្គបន្តថា ថ្មីៗនេះ គណៈសង្ឃនាយកបានជំរុញឱ្យពង្រឹងផ្នែកពុទ្ឋកសិក្សាតាមខេត្តនីមួយៗ ធ្វើយ៉ាងណាឱ្យមានសមណៈសិស្សបានសិក្សារៀនសូត្រនូវ បាលី សំស្ក្រឹត តាមពុទ្ឋវច្ចនៈរបស់ព្រះសម្មាសម្ពុទ្ឋនិងចំណេះទូទៅក្នុងផ្លូវលោក។ ព្រះអង្គបានបង្ហាញនូវក្តីបារម្ភដោយសង្កេតឃើញថា បច្ចុប្បន្នការរៀនសូត្រផ្នែកបរិយត្តិធម៌ នៅទូទាំងប្រទេស ហាក់ដូចជាមានការថយចុះ ដោយសារការចូលសាងផ្នួសថមថយបួសមិនពេញលេញ ខ្លះបួសតាមទំនៀមទំលាប់ ខ្លះបួសរយៈពេលខ្លី ហេតុនេះសូមអំពាវនាវដល់ញាតិញោមរបស់សមណៈសិស្សបន្តជួយឧបត្ថម្ភគាំទ្រដើម្បីឱ្យសមណៈសិស្សខំសិក្សារៀនសូត្រ ហើយសមណៈសិស្សក៍ត្រូវខំពុះពារប្រឹងប្រែងរៀនសូត្រឱ្យអស់ពីសមត្ថភាព ដើម្បីក្លាយទៅជាធនធានមនុស្សពោរពេញដោយចំណេះដឹងមានសមត្ថភាព សម្រាប់ទ្រទ្រង់ជីវភាពខ្លួនឯងនិងក្រុមគ្រួសារនាពេលអនាគត៕
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ