នៅព្រឹកថ្ងៃទី០១ ខែកក្កដា ឆ្នាំ២០២២ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន បានអញ្ជើញជាអធិបតីក្នុងកិច្ចប្រជុំពិនិត្យលើសេចក្តីព្រាងច្បាប់ស្តីពី សិទ្ធិទទួលព័ត៌មាន។ ច្បាប់ស្តីពីសិទ្ធិទទួលព័ត៌មានកំណត់អំពីសិទ្ធិ និងកាតព្វកិច្ចក្នុងការទទួល និងផ្ដល់ព័ត៌មាន នីតិវិធី ស្នើសុំ និងផ្តល់ព័ត៌មាន និងអំពីព័ត៌មានសម្ងាត់ក្នុងគោលបំណង ដើម្បីធានាឱ្យសាធារណជនគ្រប់រូប នូវសិទ្ធិក្នុងការទទួល បានព័ត៌មានពីស្ថាប័នសាធារណៈ។
ច្បាប់នេះកំណត់អំពីសិទ្ធិ និងកាតព្វកិច្ចនៃការទទួល និងផ្ដល់ព័ត៌មាន គោលការណ៍ វិធាននីតិវិធីស្នើសុំ និងផ្តល់ព័ត៌មាន ព័ត៌មានសម្ងាត់និងកិច្ចការពារអ្នកផ្ដល់ព័ត៌មានក្នុងគោលបំណង ដើម្បីធានាឱ្យសាធារណជនគ្រប់រូបនូវសិទ្ធិ ក្នុងការទទួលបានព័ត៌មានពីស្ថាប័នសាធារណៈ និងកាត់បន្ថយព័ត៌មានសម្ងាត់ឱ្យមានកម្រិត អប្បបរមាស្របតាមរដ្ឋធម្មនុញ្ញនៃព្រះរាជាណាចក្រ-កម្ពុជា។
ឯកឧត្តមរដ្ឋមន្រ្តី ខៀវ កាញារីទ្ធ មានប្រសាសន៍ថា ច្បាប់ស្តីសិទ្ធិទទួលព័ត៌មាន គឺក្រសួងព័ត៌មាន សហការជាមួយអង្គការ UNESCO រួមទាំងដៃគូរពាក់ពន្ធ័ ក្រសួងស្ថាប័ននានា ហើយចុងក្រោយនេះ មានការចូលរួមពិនិត្យដោយក្រសួងយុត្តិធម៍ ហើយបញ្ជូនទៅគណៈរដ្ឋមន្រ្តី ប៉ុន្តែក្នុងរយៈពេលថ្មីនេះ គឺមានសំណើរបស់ក្រុមអង្គការសង្គមស៊ីវិលមួយចំនួន ដាក់ទៅខុទ្ទកាល័យសម្តេចនាយករដ្ឋមន្រ្តី ហើយលិខិតនេះក៏បានប្រគល់មកអោយក្រសួងព័ត៌មាន ពិនិត្យឡើងវិញ។ ក្រុមអង្គការសង្គមស៊ីវិលមួយចំនួនខ្លះ បានចូលរួមពិនិត្យពិភាក្សាកែសម្រួលនូវសេចក្តីព្រាងច្បាប់ស្តីពីសិទ្ធិទទួលព័ត៌មាន ជាមួយក្រសួងព័ត៌មាន រាប់ឆ្នាំកន្លងមក ហើយក៏បានឯកភាពគ្នាម្តងរួចមកហើយដែរ តែបែរជាត្រឡប់មកក្រោយវិញ។ ឯកឧត្តមរដ្ឋមន្រ្តី បានបញ្ជាក់ថា ច្បាប់ដែលអាចឆ្លងចេញបាន គឺផ្អែកលើគោលការណ៍អន្តរជាតិ ហើយក៏ពាក់ពន្ធ័សភាពការណ៍ជាក់ស្តែងក្នុងប្រទេស ហើយអ្វីសំខាន់គឺសភាពការណ៍នយោបាយ។
