នៅសាលប្រជុំសលាខេត្តសៀមរាប នាព្រឹកថ្ងៃទី៣០ ខែមិថុនា ឆ្នាំ២០២២នេះ គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប ដែលហៅកាត់ថា គ.ខ.ប.ជ. បានបើកកិច្ចប្រជុំបូកសរុបការងារឆមាសទី១ ឆ្នាំ២០២២ និងលើកទិសដៅបន្តសម្រាប់ឆមាសទី២ ក្រោមការដឹកនាំរបស់លោកស្រី យូ សុភា អភិបាលរងខេត្ត និងជាអនុប្រធានអចិន្ត្រៃយ៍ នៃគ.ខ.ប.ជ ដោយមានការចូលរួមពីសំណាក់លោក លោកស្រី ជាសមាជិក សមាជិកា នៃគ.ខ.ប.ជ.និង អង្គការដៃគូនានាក្នុងខេត្ត។
មានប្រសាសន៍នៅក្នុងកិច្ចប្រជុំនេះ លោកស្រី យូ សុភា បានថ្លែងនូវការកោតសរសើរចំពោះមន្ទីរអង្គរភាព និងអង្គការដៃគូមួយចំនួន ដែលបានខិតខំយកចិត្តទុកដាក់ធ្វើការងារប្រឆាំងអំពើជួញដូរមនុស្សនេះយ៉ាងសកម្ម ដែលធ្វើឲ្យសកម្មភាពនៃការប្រយុទ្ធប្រឆាំងអំពើជួញដូរមនុស្ស និង កិច្ចការពារជនរងគ្រោះក្នុងខេត្តសៀមរាប ទទួលបានការកោតសរសើរជាខ្លាំងនៅថ្នាក់ជាតិ ហើយក៏ត្រូវបានចាត់ទុកថា ជាខេត្តគំរូផងដែរ ដូច្នេះដើម្បីថែរក្សាស្នាដៃនេះឲ្យនៅបប្តគង់វង្សនោះ គ្រប់មន្ទីរ អង្គភាពពាក់ព័ន្ធទាំងអស់ រួមជាមួយអង្គការដៃគូ ត្រូវធ្វើយ៉ាងណាខិតខំអនុវត្តនូវផែនការទិសដៅការងារឲ្យបានកាន់តែល្អប្រសើរបន្ថែមទៀត ។
លោកស្រី យូ សុភា បន្តថា ជារៀងរាល់ខែ យើងតែងតែបានធ្វើការជួបប្រជុំគ្នា ដើម្បីធ្វើការត្រួតពិនិត្យលើការងារដែលនៅសេសសល់ និង ធ្វើការពិភាក្សារួមគ្នា ក្នុងការរិះរកវិធីដោះស្រាយឲ្យការតែមានប្រសិទ្ធភាពខ្ពស់ លើបញ្ហាពាក់ព័ន្ធនឹងការប្រយុទ្ធប្រឆាំងអំពើជួញដូរមនុស្ស និង កិច្ចការពារជនរងគ្រោះក្នុងខេត្តសៀមរាប ខណៈដែលបញ្ហាដែលនៅសេសសល់ពីខែមុនមានចំនួន៩ចំណុច ដូច្នេះសូមឲ្យសមាជិកនៃអង្គពិធីទាំងមូល ត្រូវធ្វើការពិភាក្សាដោះស្រាយរួមគ្នាឲ្យកាន់តែស៊ីជម្រៅ ដើម្បីទប់ស្កាត់បានទាន់ពេលវេលា នូវអំពើជួញដូរមនុស្ស ការធ្វើអាជិវកម្មផ្លូវភេទ កិច្ចការពារកុមារពីការរំលោភបំពានផ្សេងៗ ការកេងប្រវ័ញ្ចកម្លាំងពលកម្ម និង បទល្មើសពាក់ព័ន្ធដទៃទៀត ។
យោងតាមរបាយការណ៍ប្រចាំឆមាសទី១ ឆ្នាំ២០២២ របស់គណៈកម្មាធិការប្រយុទ្ធប្រឆាំងអំពើជួញដូរមនុស្សខេត្តសៀមរាប បានបង្ហាញថា គ.ខ.ប.ជ បានអនុវត្តយ៉ាងយកចិត្តទុកដាក់នូវទិសដៅភារកិច្ចរបស់ខ្លួនតាមការគ្រោងទុក ហើយក៏មានការចូលរួមកាន់តែសកម្មពីមន្ត្រីអនុវត្តតាមមន្ទីរ អង្គភាពពាក់ព័ន្ធ អាជ្ញាធរមូលដ្ឋាន និងអង្គការមិនមែនរដ្ឋាភិបាលជាតិ អន្តរជាតិ និងទីភ្នាក់ងារសហប្រជាជាតិដែលសម្រេចបាននូវលទ្ធផលយ៉ាងល្អ ពិសេសក្នុងរយៈពេល៦ខែដើមឆ្នាំ២០២២នេះ គ.ខ.ប.ជ មន្ទីរ អង្គភាពពាក់ព័ន្ធ អាជ្ញាធរក្រុងស្រុក និងអង្គការដៃគូនានា បានផ្សព្វផ្សាយច្បាប់ ស្តីពីការបង្ក្រាបប្រយុទ្ធប្រឆាំងអំពើជួញដូរមនុស្ស និងអំពើអាជីវកម្មផ្លូវភេទ និងច្បាប់ពាក់ព័ន្ធ តាមរយៈការផ្សព្វផ្សាយភូមិឃុំមានសុវត្ថិភាព តាមវេទិការសាធារណៈ និងផ្សព្វផ្សាយតាមវិទ្យុ ទូរទស្សន៍បានចំនួន៨៨២លើក ។
របាយការណ៍បង្ហាញទៀតថា ក្រៅពីនេះ ក្នុងគោលដៅទប់ស្កាត់អំពើជួញដូរមនុស្ស ស្នងការនគរបាលខេត្ត និងកងរាជអាវុធហត្ថខេត្ត ក៏បានដាក់កម្លាំងជំនាញចុះល្បាតនៅតាមគោលដៅនានា ចុះធ្វើកិច្ចសន្យានៅតាមគោលដៅសង្ស័យដូចជាតាមខារ៉ាអូខេ ហាងម៉ាស្សាជាដើម ព្រមទាំងបានសហការជាមួយអធិការដ្ឋាននគរបាល និង កងអាវុធហត្ថក្រុងស្រុក ចុះធ្វើការណែនាំ និងទប់ស្កាត់ពលរដ្ឋធ្វើចំណាក់ស្រុកទៅក្រៅប្រទេសផងដែរ ៕
អត្ថបទ និងរូបភាព ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
