លោកវេជ្ជបណ្ឌិត ប៉ែន ផលគុណ ប្រធានមន្ទីរពេទ្យបង្អែកខេត្តសៀមរាប បានឲ្យដឹងកាលពីល្ងាចថ្ងៃទី១៤ ខែកក្កដានេះថា រដ្ឋបាលខេត្តសៀមរាបបានសម្រេចយកវិទ្យាល័យ ១០ មករា ១៩៧៩ ក្នុងក្រុងសៀមរាប ជាកន្លែងទី៤ សម្រាប់ដាក់អ្នកជំងឺកូវីដ-១៩ បន្ទាប់ពីក្នុងអំឡុងខែមិថុនា បានយកវិទ្យាល័យអង្គរ ធ្វើជាកន្លែងទី៣សម្រាប់អ្នកជំងឺកម្រិតស្រាល ខណៈ នៅមន្ទីរពេទ្យបង្អែកខេត្ត និងសាលាគរុសល្យ និងវិក្រឹតការខេត្ត ដែលបាននឹងកំពុងព្យាបាលអ្នកជំងឺកូវីដ-១៩ មិនមានគ្រែគ្រប់គ្រាន់សម្រាប់ដាក់អ្នកជំងឺ។
លោកវេជ្ជបណ្ឌិត ប៉ែន ផលគុណ បន្ថែមទៀតថា ដោយស្ថានភាពនៃអ្នកជំងឺកូវីដ-១៩ ជាពិសេសក្នុងក្រុងសៀមរាប មានការកើនឡើងជាបន្ដបន្ទាប់ ដែលជាហេតុធ្វើឲ្យខ្វះខាតគ្រែក្នុងការព្យាបាល ម្យ៉ាងទៀតដោយសង្គេតឃើញប្រជាពលរដ្ឋដែលមកពីក្រៅប្រទេស ដែលបានរកឃើញវិជ្ជមានកូវី-១៩ ជាបន្តបន្ទាប់ប្រមាណ៥០% នៃចំនួនប្រជាពលរដ្ឋចំណាកស្រុក ហេតុនេះរដ្ឋបាលខេត្តក៏បានរៀបចំបន្ទប់មួយ ឲ្យប្រជាពលរដ្ឋជាអ្នកចំណាកស្រុក សម្រាកព្យាបាលផងដែរ។
សូមជម្រាបថា គិតមកទល់ល្ងាចថ្ងៃទី១៤ ខែកក្កដា ឆ្នាំ២០២១នេះ ខេត្តសៀមរាប មានអ្នកវិជ្ជមានជំងឺកូវីដ-១៩ ចំនួន២,៧១១នាក់, បានព្យាបាលជាសះស្បើយចំនួន១,០៦0នាក់, ស្លាប់ចំនួន ២៦នាក់ និង ចំនួន១,៦២៥នាក់កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត វិទ្យាល័យអង្គរ និងវិទ្យាល័យដំដែក។
គួរឲ្យដឹងដែរថា ក្រៅពីក្រុងសៀមរាប បណ្ដាស្រុកមួយចំនួនក្នុងខេត្តសៀមរាប ក៏បាននឹងត្រៀមកន្លែងសម្រាប់ព្យាបាលអ្នកជំងឺកូវីដ-១៩ រួចជាស្រេចផងដែរ ជាក់ស្ដែង ក្នុងស្រុកសូទ្រនិគម យកវិទ្យាល័យដំដែកដែលមានប្រមាណ ១០០គ្រែ ខណៈស្រុកដទៃទៀតដូចជា ស្រុកពួក, ស្រុកក្រឡាញ់ និងស្រុកអង្គរជុំ ក៏បានត្រៀមគ្រែសម្រាប់ព្យាបាលប្រមាណ ២០គ្រែ សម្រាប់ព្យាបាលអ្នកជំងឺកូវីដ-១៩ផងដែរ៕
អត្ថបទ៖ លោកស្រី ហែម បូរ៉ាន្នី
កែសម្រួល៖ លោក អ៊ុន ណារាជ្យ
