នៅព្រឹកថ្ងៃទី១៥ ខែកក្កដា ឆ្នាំ២០២១នេះ ប្រជាពលរដ្ឋក្នុងស្រុកប្រាសាទបាគង បានកុំពុងមមារញឹកនាំគ្នាទៅទទួលការចាក់វ៉ាក់សាំងបង្ការជំងឺកូវី-១៩ ពីក្រុមគ្រូពេទ្យបន្ទាប់រាជរដ្ឋាភិបាលបានសម្រេចឲ្យអាជ្ញាធរខេត្ដសៀមរាប ផ្ដល់វ៉ាក់សាំងជូនពលរដ្ឋក្នុងក្រុងរយៈពេល១៤ថ្ងៃ គិតចាប់ពីថ្ងៃទី១០ ខែកក្កដា ឆ្នាំ២០២១ កន្លងមក។
បើតាមលោក សូរ ប្លាតុង អភិបាលស្រុកប្រាសាទបាគង បានបញ្ជាក់ថា ប្រជាពលរដ្ឋដែលគ្រប់អាយុត្រូវបានទទួលវ៉ាក់សាំងបង្ការជំងឺកូវីដ-១៩ នៅទូទាំងស្រុកប្រាសាទបាគង មានចំនួនជាង៥ម៉ឺននាក់ ហើយទីតាំងកន្លែងចាក់វ៉ាក់សាំងមានចំនួន៩ទីតាំង និងក្រុមគ្រូពេទ្យមានជាង១០០នាក់មកយោភូមិភាគទី៤។ ក្នុងនោះទីតាំងទាំង៩ សម្រាប់ចាក់វ៉ាក់សាំងជូនប្រជាពលរដ្ឋមាន នៅអនុវិទ្យាល័យហ៊ុន សែន រលួស និង៨ទីតាំងទៀត នៅតាមសាលារៀនក្នុងឃុំដែលបានរៀបចំសម្រាប់អោយពលរដ្ឋ នៅមូលដ្ឋានដែលនៅជិតផ្ទះរបស់ពួកគាត់ ដោយការចាក់វ៉ាក់សាំងនេះធ្វើឡើងដោយស្ម័គ្រចិត្តគឺ ពុំមានគិតថ្លៃអ្វីទាំងអស់ ហើយការចាក់វ៉ាក់សាំងនេះ ធ្វើឡើងចាប់ពីម៉ោង ៧ព្រឹក ដល់ម៉ោង១១ថ្ងៃ និងចាប់ពីម៉ោង១រសៀលដល់ម៉ោង៤ល្ងាច ចាប់ពីថ្ងៃទី១៥ ខែកក្កដានេះ ដែលមានក្រុមគ្រូពេទ្យជួយផ្ដល់វ៉ាក់សាំង និងជួយសម្របសម្រួលជាង២០នាក់ មកពីតំបន់ប្រតិបត្ដិការសឹករងខេត្ដកំពង់ធំ របស់យោធភូមិភាគទី៤។
ជាមួយគ្នានោះដែរលោកអភិបាលស្រុក ក៏សូមថ្លែងអំណរគុណដល់រាជរដ្ឋាភិបាលកម្ពុជា ជាពិសេសសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេចពិជ័យសេនា ទៀ បាញ់ ប្រធានក្រុមការងារថ្នាក់ជាតិចុះជួយខេត្តសៀមរាប ដែលបានផ្តល់វ៉ាក់សាំង និងក្រុមគ្រូពេទ្យ ព្រមទាំងកងទព័នៃយោធភូមិភាគទី៤ មកជួយចាក់វ៉ាក់សាំង ជូនបងប្អូនប្រជាពលរដ្ឋនៅទូទាំងស្រុកប្រាសាទបាគង ដើម្បីការពារពលរដ្ឋពីជំងឺកូវីដ-១៩ ដោយឥតគិតថ្លៃ ក្នុងនោះដែរលោកក៏សូមអំពាវនាវដល់បងប្អូនប្រជាពលរដ្ឋទាំងអស់ ដែលមកទទួលវ៉ាក់សាំង សូមចូលរួមអនុវត្តវិធានការឲ្យបានត្រឹមត្រូវ ដោយត្រូវរក្សាគម្លាត សណ្តាប់ធ្នាប់ នៅទីតាំងចាក់វ៉ាក់សាំង តាមឃុំនីមួយៗ ដោយកុំប្រជៀត ដណ្តើម និងព្យាយាមរុញគ្នា ដើម្បីបានចាក់មុននោះទេ៕
អត្ថបទ និង រូបភាព៖ លោក ឈិត សាវី
កែសម្រួលអត្ថបទ៖ លោក អ៊ុន ណារាជ្យ
