លោក ស៊ិន ចាន់ថុល អភិបាលស្រុកពួក មានប្រសាសន៍ថា យុទ្ធនាការនៃការចាក់វ៉ាក់សាំងការពារជំងឺកូវី-១៩ ដោយឥតគិតថ្លៃ ជូនបងប្អូនប្រជាពលរដ្ឋក្នុងឃុំពួក ដែលមានអាយុចាប់ពី១៨ឆ្នាំឡើង បានចាប់ផ្ដើមដំណើរការហើយនៅ នៅព្រឹកថ្ងៃទី១៦ ខែកក្កដា ឆ្នាំ២០២១នេះ ក្នុងបរិវេណវត្តខេមរាសាមគ្គីមុន្នីរង្សី ហៅវត្តធម្មយុត្ត ហើយការសម្រេចឲ្យដំណើរការចាក់វ៉ាក់សាំងនេះ គឺធ្វើឡើងបន្ទាប់ពីក្រុមការងារចម្រុះខេត្ត ដឹកនាំដោយលោកស្រី យូ សុភា អភិបាលរងខេត្តសៀមរាប និងជាប្រធានក្រុមការងារទី២ នៃក្រុមការងារទទួលបន្ទុកនិងសម្របសម្រួលការចាក់វ៉ាក់សាំងការពារជំងឺកូវីដ-១៩ ដែលទទួលមុខព្រួញនៅស្រុកពួក ស្រុកប្រាសាទបាគង និងស្រុកសូទ្រនិគម បានចុះមកត្រួតពិនិត្យទីតាំងនេះ កាលពីថ្ងៃទី១៥ ខែកក្កដា ឆ្នាំ២០២១ម្សិលមិញនេះ។
លោក ស៊ិន ចាន់ថុល មានប្រសាសន៍ថា នៅពេលនេះ យើងបានដំណើរការចាក់វ៉ាក់សាំងការពារជំងឺកូវី-១៩ ជូនបងប្អូនប្រជាពលរដ្ឋដែលរស់នៅក្នុងឃុំពួកតែប៉ុណ្ណោះ ក្នុងចំណោមឃុំទាំង១៤របស់ស្រុក ដោយសារតែរដ្ឋបាលស្រុកទទួលបានវ៉ាក់សាំងជំហានដំបូងនេះ ចំនួនជាង១៩.០០០ដូសប៉ុណ្ណោះ ហើយប្រជាពលរដ្ឋនៅក្នុងឃុំពួក ដែលមានអាយុចាប់ពី១៨ឆ្នាំឡើង មានចំនួនជាង១ម៉ឺននាក់ ដូច្នេះប្រសិនហើយរដ្ឋបាលស្រុក នៅពេលដែលទទួលបានវ៉ាក់សាំងបន្ថែមទៀតនោះ យើងនឹងធ្វើការបែងចែកវ៉ាក់សាំងទៅចាក់ជូនប្រជាពលរដ្ឋនៅបណ្ដាឃុំផ្សេងៗទៀត ។
លោកមានប្រសាសន៍បន្ថែមថា ការចាក់វ៉ាក់សាំងជូនប្រជាពលរដ្ឋទាំងនៅពេលនេះ និង ពេលមុន គឺជាគោលការណ៍ស្ម័គ្រចិត្ត ហើយពុំមានគិតថ្លៃអ្វីទាំងអស់ ប៉ុន្តែមុនពេលបងប្អូនទៅចាក់វ៉ាក់សាំងសូមទំនាក់ទំនងជាមួយមេភូមិ ឬឃុំដើម្បីទទួលបានឯកសារសម្រាប់ចាក់វ៉ាក់សាំងនៅតាមភូមិ ឃុំដែលបងប្អូនរស់នៅ ប៉ុន្តែសំខាន់សូមអំពាវនាវដល់បងប្អូនប្រជាពលរដ្ឋទាំងអស់ចូលរួមអនុវត្តវិធានការសុវត្ថិភាពនានាដូចជា ៖ រក្សាគម្លាត សណ្តាប់ធ្នាប់ នៅទីតាំងចាក់វ៉ាក់សាំង , សូមកុំប្រជៀត ដណ្តើម និងព្យាយាមរុញគ្នា ដើម្បីបានចាក់មុនដោយព្រួយបារម្ភឬខ្លាចមិនបានចាក់វ៉ាក់សាំងនោះ តែតាមពិតរាជរដ្ឋាភិបាលនឹងផ្តល់ជូនប្រជាពលរដ្ឋដែលមានចាប់អាយុ១៨ឆ្នាំឡើងទៅឱ្យបានគ្រប់ៗគ្នា ។
គួររំលឹកថាយុទ្ធនាការនៃការចាក់វ៉ាក់សាំងការពារជំងឺកូវី-១៩ ដោយឥតគិតថ្លៃ ជូនបងប្អូនប្រជាពលរដ្ឋក្នុងទូទាំងខេត្ត បានចាប់ផ្ដើមដំបូង នៅក្នុងក្រុងសៀមរាប កាលពីថ្ងៃទី១០ ខែកក្កដា ឆ្នាំ២០២១កន្លងមកនេះ ខណៈនៅតាមបណ្ដាស្រុក បានចាប់ផ្ដើមកាលពីថ្ងៃទី១៥ ខែកក្កដា ឆ្នាំ២០២១ម្សិលមិញនេះ៕
