លោក ឃឹម ហ្វីណង់ អភិបាលស្រុកបន្ទាយស្រី បានឲ្យដឹងថា បន្ទាប់ពីទទួលបាននូវវ៉ាក់សាំងការពារជំងឺកូវីដ-១៩ ពីប្រមុខរាជរដ្ឋាភិបាល ដោយមិនគិតថ្លៃ ដើម្បីចាក់ជូនបងប្អូនប្រជាពលរដ្ឋនៅស្រុកបន្ទាយស្រី ដែលមានអាយុចាប់ពី១៨ឆ្នាំឡើងទៅនោះ ហើយក្នុងស្រុកបន្ទាយស្រីនេះ បានដំណើរការចាក់វ៉ាក់សាំងកាលពីថ្ងៃទី១៥ ខែកក្កដា ឆ្នាំ២០២១ម្សិលមិញនេះ ដូច្នេះគិតត្រឹមព្រឹកថ្ងៃទី១៦ ខែកក្កដា ឆ្នាំ២០២១នេះ មានប្រជាពលរដ្ឋនៅក្នុងឃុំព្រះដាក់ ចំនួនសរុប ២.២៣៨នាក់ ក្នុងចំណោមប្រជាពលរដ្ឋដែលមានអាយុចាប់ពី១៨ឆ្នាំឡើងទៅចំនួនជាង៥.២០០នាក់ បានទទួលចាក់វ៉ាក់សាំងការពារជំងឺកូវីដ-១៩ ដូសលើកទី១ នៅមណ្ឌល សាលារៀនបឋមសិក្សាព្រះដាក់ ខណៈដំណើរការចាក់កំពុងបន្ត។
លោក ឃឹម ហ្វីណង់ បានបញ្ជាក់ទៀតថា ក្រោមកិច្ចសហការល្អជាមួយក្រុមការងារចាក់វ៉ាក់សាំងការពារជំងឺកូវីដ-១៩ របស់កងពលធំអន្តរាគមន៍លេខ២ ដែលដឹកនាំដោយឯកឧត្តមឧត្តមសេនីយ៍ឯក កែវ ធី ជាមេបញ្ជាការ និងដោយមានការចូលរួមពីក្រុមការងារស្រុក ឃុំ សហភាពសហព័ន្ធយុវជនកម្ពុជាស្រុក យុវជនស្ម័ត្រចិត្ត សមត្ថកិច្ចនគរបាល និងប្រជាការពារចូលរួមផងនោះ បានដំណើរការចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋបានយ៉ាងរលូន ដែលការផ្ដល់វ៉ាក់សាំងនេះ គឺមិនប្រកាន់និន្នាការនយោបាយឡើយ ឲ្យតែពួកគាត់រស់នៅអចិន្ត្រែយ៍ ឬ ពួកគាត់រស់នៅខេត្ដផ្សេង ប៉ុន្តែស្នាក់នៅក្នុងឃុំ នៃស្រុកបន្ទាយស្រីពិតបា្រកដ ហើយមានអត្ដសញ្ញាណប័ណ្ណ និង ស្ម័គ្រចិត្ដនោះ គឺក្រុមគ្រូពេទ្យចាក់ផ្ដល់ជូនទាំងអស់ ។
លោកអភិបាលស្រុកបន្ទាយស្រី បានឲ្យដឹងបន្ថែមថា ក្នុងយុទ្ធនាការចាក់វ៉ាក់សាំងនេះ មានរយៈពេល១៤ថ្ងៃ ដោយមានក្រុមការងារចាក់វ៉ាក់សាំងការពារជំងឺកូវីដ-១៩ មានក្រុមគ្រូពេទ្យនៃកងពលធំអន្តរគមន៍លេខ២ ចំនួន៦០នាក់ រួមនឹងក្រុមការងារស្រុក ឃុំ កម្លាំងសន្តិសុខ ចំនួន ៧៩នាក់ មានផែនការចាក់ក្នុងរយៈពេល១ថ្ងៃ ឲ្យបានចំនួន២ពាន់នាក់ ដើមី្បធ្វើយ៉ាងណាចាក់ឲ្យក្នុងរយៈពេល១៤ថ្ងៃនេះ ត្រូវបញ្ចប់នូវដូសទី១ និងឈានទៅបានមុនរយៈពេល២១ថ្ងៃ នៃការចាក់នូវដូសទី២ទៀត ហើយការចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋក្នុងស្រុកបន្ទាយស្រីនេះ មានចំនួន ០៣ទីតាំង គឺ ៖ ទី១. នៅសាលារៀនបឋមសិក្សាព្រះដាក់ , ទី២. នៅអនុវិទ្យាល័យបន្ទាយស្រី និង ទី៣. នៅអនុវិទ្យាល័យត្បែង។
ក្នុងឱកាសនេះដែរ លោក ឃឹម ហ្វីណង់ អភិបាលស្រុកបន្ទាយស្រី បានធ្វើការអំពាវនាវដល់ប្រជាពលរដ្ឋក្នុងស្រុកបន្ទាយស្រីទាំងមូល សូមអញ្ជើញមកចាក់វ៉ាក់សាំងគ្រប់ៗគ្នា ព្រោះការចាក់វ៉ាក់សាំងនេះ មិនគិតថ្លៃឡើយ គឺផ្តល់ជូនដើមី្បការពារសុវត្ថិភាពរបស់បងប្អូនប្រជាពលរដ្ឋក្នុងសហគមន៍នេះ ក្នុងគោលដៅកាត់ផ្តាច់ខ្សែចម្លងជំងឺកូវីដ-១៩ និង ការពារនូវសុខមាភាពរបស់ប្រជាពលរដ្ឋ ព្រមទាំងដើមី្បធ្វើការស្តារឡើងវិញនូវគ្រប់ហេដ្ឋារចនាសម្ព័ន្ធសេដ្ឋកិច្ចជាតិ សំខាន់ខេត្តសៀមរាបជាតំបន់ទេសចរណ៍ ក៏ដូចស្រុកបន្ទាយស្រី ដែលបានផ្តល់អត្ថិភាពទទួលបានវ៉ាក់សាំងនៅក្នុងជំហានដំបូងនេះ ប៉ុន្តែប្រការសំខាន់ សូមបងប្អូនបន្តអនុវត្តនូវវិធានការ ៣កុំ ៣ការពារ និងសេចក្តីណែនាំរបស់ក្រសួងសុខាភិបាល ឲ្យបានខ្ជាប់ខ្ជួន ពីព្រោះថា ជំងឺកូវីដ-១៩ វាមិនរើសអើងបុគ្គលណាម្នាក់នោះឡើយ នៅពេលដែលយើងខ្វះការប្រុងប្រយ័ត្ន៕
អត្ថបទ និង រូបថត ៖ លោក ទ្រា ពន្លឺ
កែសម្រួលអត្ថបទ ៖ លោក លីវ សាន្ត
