ក្នុងឱកាសដឹកនាំក្រុមការងារចុះត្រួតពិនិត្យដំណើរការចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋក្នុងស្រុកជីក្រែង ខេត្តសៀមរាប នៅព្រឹកថ្ងៃទី១៦ ខែកក្កដានេះ លោក ពៅ ពិសិដ្ឋ អភិបាលរងខេត្តសៀមរាប បានបញ្ជាក់ថា នៅក្នុងកាលៈទេសៈដែលប្រទេសកម្ពុជា ក៏ដូចជាពិភពលោកកំពុងជួបនូវវិបត្តិជំងឺកូវីដ-១៩ រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជាប្រមុខដឹកនាំ បានខិតខំរកវិធីសាស្ត្ររំដោះប្រទេសកម្ពុជាចេញពីវិបត្តនេះ ដោយបានបញ្ជាទិញវ៉ាក់សាំងយកមកចាក់ជូនប្រជាពលរដ្ឋដោយឥតគិតថ្លៃ។ ប៉ុន្តែប្រការដែលសំខាន់នោះ គឺបងប្អូនប្រជាពលរដ្ឋទាំងអស់ នៅពេលដែលមកទទួលការចាក់វ៉ាក់សាំង សូមចូលរួមអនុវត្តរក្សាគម្លាត សណ្តាប់ធ្នាប់ នៅទីតាំងចាក់វ៉ាក់សាំង តាមគោលដៅទីតាំងនីមួយៗ សូមកុំប្រជៀត និងកុំដណ្តើមគ្នា ព្រោះបងប្អូនប្រជាពលរដ្ឋក្នុងស្រុកនេះក៍ដូចជាខេត្តសៀមរាបទាំងមូល ដែលមានអាយុចាប់ពី១៨ឆ្នាំឡើង នឹងទទួលបានការចាក់វ៉ាក់សាំងការពារជំងឺកូវីដ-១៩ នេះគ្រប់ៗគ្នាក្រោមគោលការណ៍ស្ម័គ្រចិត្តនិងដោយឥតគិតថ្លៃ។
លោកអភិបាលរងខេត្ត បញ្ជាក់បន្ថែមថា មុនពេលបងប្អូនទៅចាក់វ៉ាក់សាំងសូមទំនាក់ទំនងជាមួយមេភូមិ/ឃុំដែលបងប្អូនរស់នៅជាមុនសិន ដើម្បីទទួលបានឯកសារសម្រាប់ចាក់វ៉ាក់សាំងនៅតាមភូមិ/ឃុំ ដែលបងប្អូនរស់នៅ។ ជាមួយនោះសូមបងប្អូនចូលរួមសហការក្នុងការអនុវត្តនូវវិធានការខាងលើឱ្យខ្ជាប់ខ្ជួន ដើម្បីសណ្តាប់ធ្នាប់របៀបរៀបរយ និងជៀសវាងការឆ្លងជំងឺជាយថាហេតុ។ ម្យ៉ាងវិញទៀតក៏ជាការការពារខ្លួនយើង គ្រួសារយើង និងសហគមន៍យើង ពិសេសការកាត់ផ្តាច់ជំងឺកូវីដ-១៩ ចេញពីសហគមន៍ ដើម្បីយើងរស់រានមានជីវិតដូចកាលពីមុន។
បើតាមលោក ពៅ ប៊ុនធឿន អភិបាលស្រុកជីក្រែង បានឲ្យដឹងថា ស្រុកជីក្រែងមាន១២ឃុំ មានប្រជាពលរដ្ឋគ្រប់អាយុទទួលការចាក់វ៉ាក់សាំងចំនួន ៣៥១៨៣នាក់។ ចំពោះការចាក់ត្រូវបានក្រុមការងាររៀបចំជា ២ទីតាំង៖ ទី១.សាលាបឋមសិក្សាក្របីរៀល ក្នុងភូមិថ្មី ឃុំគោកធ្លកក្រោម និងទី២.នៅសាលាបឋមសិក្សាដូនរាជ្យ ស្ថិតក្នុងភូមិដូនរាជ្យ ឃុំគោកធ្លកក្រោម ហើយសម្រាប់ជំហ៊ានទី១នេះ ក្រុមការងារចាក់ជូនបងប្អូនប្រជាពលរដ្ឋចំនួន៦ឃុំ ដោយឡែកឃុំ៦ទៀត ក្រុមការងារនឹងរៀបចំជាបន្តបន្ទាប់ទៀតនៅពេលឆាប់ៗខាងមុខ៕
អត្ថបទ និងរូបភាព៖ លោក យូ វង្ស
កែសម្រួលអត្ថបទ ៖ លោក អ៊ុន ណារាជ្យ
