រដ្ឋបាលខេត្តសៀមរាប បានទទួលអំណោយមួយចំនួនរបស់ឧបនាយករដ្ឋមន្ត្រី រដ្ឋមន្ត្រីក្រសួងការបរទេស ឯកឧត្តម ប្រាក់ សុខុន និងសហប្រតិបត្តិការអន្តរជាតិ នារសៀលថ្ងៃទី១៦ ខែកក្កដា ឆ្នាំ២០២១ នៅសាលាខេត្តសៀមរាប តាមរយៈសហភាពសហព័ន្ធយុវជនកម្ពុជាខេត្ត ដើម្បីចូលរួមចំណែកជាមួយរាជរដ្ឋាភិបាល ដែលជាការឆ្លើយតបទៅនឹងគ្រួសារដែលរងគ្រោះពីការរីករាលដាលនៃជម្ងឺកូវីដ.១៩។ ដោយមានវត្តមានលោក ពិន ប្រាកដ អភិបាលរងខេត្តសៀមរាប ក្រុមការងារសហភាពសហព័ន្ធយុវជនកម្ពុជាខេត្ត សៀមរាបបានចូលរួមផងដែរ។
អភិបាលរងខេត្តសៀមរាប លោក ពិន ប្រាកដ បានថ្លែងអំណរគុណដល់ទឹកចិត្តសប្បុរសធម៌របស់ឧបនាយករដ្ឋមន្ត្រី រដ្ឋមន្ត្រីក្រសួងការបរទេស ឯកឧត្តម ប្រាក់ សុខុន និងសហប្រតិបត្តិការអន្តរជាតិតាមរយៈសហភាពសហព័ន្ធយុវជនកម្ពុជាខេត្តសៀមរាប ដែលបានផ្តល់ជូននូវសម្ភារៈមួយចំនួនសម្រាប់ប្រើសប្រាស់ក្នុងការប្រយុទ្ធប្រឆាំងបង្កាដើម្បីទប់ស្កាត់ជំងឺកូវិដ.១៩ ដល់រដ្ឋបាលខេត្តសៀមរាប ក៏ដួចជាតាមបណ្តាស្រុកនានាផងដែរ។ ដែលប្រទេសកម្ពុជាយើង កំពុងជួបប្រទះនូវវិបត្តិជំងឺឆ្លងកូវិដ.១៩នេះ យើងត្រូវចូលរួមទាំងអស់គ្នាក្នុងការប្រយុទ្ធប្រឆាំងនឹងការរីករាលដាលនៃជំងឺឆ្លងទាំងអស់គ្នា។
បច្ចុប្បន្ន អាជ្ញាធរខេត្តក៏បានផ្តល់នូវសម្ភារៈ ឧបករណ៍ ប្រើប្រាស់ជូនទៅតាមបណ្តាក្រុង ស្រុក ជាបន្តបន្ទាប់ស្ទើជារៀងរាល់ថ្ងៃកន្លងមក រួមទាំងគ្រឿងឧបភោគបរិភោគជាច្រើន ក្នុងការផ្គត់ផ្គង់ដល់បងប្អូនដែលបានវិលមកពីក្រៅប្រទេស និង រាជធានី ខេត្ត ដែលជួបនូវហានីភ័យខ្ពស់នៃជំងឺកូវីដ.១៩ បាននឹងកំពុងធ្វើចត្តាឡីស័កនៅតាមមណ្ឌលក្នុង ក្រុង ស្រុក ជាដើម។
លោក បន្តថា ដោយមានការគិតគូរយកចិត្តទុកដាក់ពីសំណាក់រាជរដ្ឋាភិបាលនោះ សម្រាប់បងប្អូនប្រជាពលរដ្ឋក្នុងខេត្តសៀមរាបយើង ដោយខេត្តយើងនឹងទទួលបានការចាក់វ៉ាក់សាំងជាបន្តបន្ទាប់រហូតឈានដល់ការចាក់វ៉ាក់សាំងអោយបងប្អូនប្រជាពលរដ្ខបានគ្រប់ៗគ្នាក្នុងក្រុង និងតាមបណ្តាស្រុកនានាជាដើម។ ជាមួយគ្នានោះ លោក ក៏បានអំពាវនាវដល់បងប្អូនប្រជាពលរដ្ឋទាំងអស់ សំខាន់នៅខេត្តសៀមរាប សូមបងប្អូនត្រូវចូលរួមសហការអនុវត្តវិធានការណ៍ របស់ រាជរដ្ឋាភិបាល ៣កុំ ៣ការពារ និង២ចូលរួម ឲ្យមានប្រសិទ្ធភាពខ្ពស់បំផុត និង បន្តប្រកាន់នូវវិធានសុខាភិបាល ឲ្យបានខ្ជាប់ខ្ជួន ទោះបីបងប្អូនបានចាក់វ៉ាក់សាំងរួចហើយនោះក្តី ។
អំណោយជាសម្ភារៈ សម្រាប់បម្រើក្នុងការប្រយុទ្ធប្រឆាំងជម្ងឺកូវីដ.១៩ ជារួមមាន៖ ថ្នាំពេទ្យ ចំនួន ៤កេស , ម៉ាស់សម្រាប់គ្រូពេទ្យ ១៥កេស , ទឹកថ្នាំសម្លាប់មេរោគ ចំនួន ៤៥កាន , ម៉ាស់ CORI ចំនួន ១៥កេស និង ម៉ាស់កេសធំ ចំនួន ២កេស៕
អត្ថបទ និងរូបភាព៖ស៊ាន សុផាត
