សម្ភារ និងទេយ្យវត្ថុមានដូចជា សាដក ទៀនចំណាំវស្សា អង្ករ ភេសជ្ជៈនិងគ្រឿងទេសមួយចំនួនត្រូវបាន ក្រុមការងារថ្នាក់ខេត្តចុះជួយមូលដ្ឋានឃុំជីក្រែង ដឹកនាំដោយលោក ទា គឹមសុទ្ឋ ប្រធានមន្ទីរកសិកម្ម រុក្ខាប្រមាញ់និងនេសាទខេត្ត និងជាប្រធានក្រុមការងារខេត្តចុះជួយឃុំជីក្រែងស្រុកជីក្រែងខេត្តសៀមរាបនិងសមាជិសមាជិកា បាននាំយកទៅប្រគេនដល់ព្រះសង្ឃក្នុងវត្តចំនួន៤ស្ថិតក្នុងឃុំជីក្រែងស្រុកជីក្រែងខេត្តសៀមរាបកាលពីថ្ងៃទី១៦ខែកក្កដាឆ្នាំ២០២១។
ពិធីនេះបានធ្វើឡើងទៅតាមគន្លងប្រពៃណីព្រះពុទ្ធសាសនានៅក្នុងវត្តព្រះឥន្ទឧស្សាហ៍ហៅវត្តជីក្រែងស្ថិតក្នុងឃុំជីក្រែងស្រុកេជីក្រែងខេត្តសៀមរាប។វត្តនីមួយៗទទួលបាន – សាដក១ ទៀនចំណាំវស្សា ២ដើម អង្ករ២ការ៉ុង មី៥កេសទឹកស៊ីអ៊ីវ៥យួរ ទឹកត្រី៥យួរ ទឹកបរិសុទ្ធVital៥កេស ទឹកក្រូច២កេស អំបិល២គីឡូក្រាម ថវិកា៣២ម៉ឺនរៀល និងជូន ដូនជី តាជី ១៧នាក់ ម្នាក់ៗ ទទួលបានថវិកា ១ម៉ឺនរៀល។
ថ្លែងសំណេះសំណាលក្នុងឱកាសនោះ លោក ទា គឹមសុទ្ឋ មានប្រសាសន៍ថា៖ការនាំយកនូវទៀចំណាំវស្សានិងទេយ្យវត្តុគ្រឿងឧបភោគបរិភោគមួយចំនួនយកមកវេរប្រគេនព្រះសង្ឃនេះធ្វើឡើងទៅតាមជំនឿសាសនាប្រពៃណីទំនៀមទម្លាប់ដែលដូនតាខ្មែរបានបន្សល់ទុកតរៀងមកហើយកូនខ្មែរយើងប្រតិបត្តិលុះមកដល់បច្ចុប្បន្នដែលជាទូទៅក្នុងពេលចូលវស្សាមានរយៈពេល៣ខែ ព្រះសង្ឃមិនត្រូវបានអនុញ្ញាតិឱ្យចេញគោចរទៅតាមទីផ្សេងៗរហេតរហូតឡើយ គួបផ្សំជារដូវភ្លៀងផង តាមវត្តអារាមនានាតែងតែត្រូវការនូវគ្រឿងឧបភោគបរិភោគ ពោលគឺចតុប្បច្ច័យសម្រាប់ទ្រងទ្រង់ជីវភាពរស់នៅមិនខានទេ។
លោក ទា គឹមសុទ្ឋ បានជំរុញដល់អាជ្ញាធរមូលដ្ឋាននិងប្រជាពលរដ្ឋក្នុងមូលដ្ឋាននេះទាំងអស់ សូមចូលរួមអនុវត្តឱ្យបានខ្ជាប់ខ្ជួននូវសេចក្តីណែនាំ របស់ក្រសួងសុខាភិបាល និងវិធានការ ៣ការពារនិង៣កុំរបស់រាជរដ្ឋាភិបាល ក្នុងការទប់ស្កាត់ដល់ការឆ្លងជំងឺកូវីដ-១៩ ដោយបានស្នើដល់អាជ្ញាធរមូលដ្ឋានជួយពន្យល់ឱ្យប្រជាពលរដ្ឋក្នុងមូលដ្ឋានរបស់ខ្លួនពាក់ម៉ាស់ឱ្យបានត្រឹមត្រូវ លាងដៃជាមួយសាប៊ូ អាល់កុលឬជែល និងត្រូវរក្សាគម្លាតសុវត្ថិភាពសង្គម ជាដើម និងអនុវត្ត៣កុំ គឺកុំចូលទៅទីកន្លែងបិទជិតខ្វះខ្យល់ចេញចូលនិងប្រើម៉ាស៊ីនត្រជាក់ច្រើន កុំទី២ កុំទៅទីដែលមានមនុស្សច្រើនកុះករ និងកុំទី៣ កុំប៉ះពាល់គ្នា ជួបជុំគ្នាច្រើនជាដើម ពីព្រោះបច្ចុប្បន្នជំងឺនេះបាននឹងកំពុងបន្តតាមយាយីដល់សុខភាពរបស់មនុស្សនៅទូទាំងពិភពលោកនៅឡើយ សំខាន់នៅកម្ពុជាយើងក៍កំពុងរងនូវផលប៉ះពាល់យ៉ាងខ្លាំងពីជំងឹនេះផងដែរ ។
ជាមួយគ្នានោះលោក ទា គឹមសុទ្ឋ បានណែនាំឱ្យអាជ្ញាធរមូលដ្ឋានសហការសម្របសម្រួលឯកសារនានានិងផ្សព្វផ្សាយដល់ប្រជាពលរដ្ឋដែលមានអាយុចាប់ពី១៨ឆ្នាំឡើងទៅឱ្យទៅទទួលការចាក់វ៉ាក់សាំងការពារជំងឺកូវីដ-១៩ឱ្យបានគ្រប់ៗគ្នា តាមគោលការណ៍ស្ម័គ្រចិត្តនិងឥតគិតថ្លៃ។
អត្ថបទ និងរូបភាព៖ លោក យូ វង្ស
