នៅព្រឹកថ្ងៃទី១៦ ខែកក្កដា ឆ្នាំ២០២១នេះ ឯកឧត្ដមនាយឧត្តមសេនីយ៍ ឃឹម ប៊ុនសុង រដ្ឋលេខាធិការក្រសួងការពារជាតិ រួមនឹងសហការី បានអញ្ជើញចុះជួបសាកសួរសុខទុកក្រុមគ្រូពេទ្យដែលកំពុងមមារញឹកក្នុងយុទ្ធនាការចាក់វ៉ាក់សាំងកូវីដ-១៩ លើកទី១ ជូនប្រជាពលរដ្ឋក្នុងក្រុងសៀមរាប និងបាននាំយកអំណោយមួយចំនួនប្រគល់ជូនមណ្ឌលចាក់វ៉ាក់សាំងចំនួន២កន្លែង ដោយមណ្ឌលសាលាបឋមសិក្សាខ្នារ សង្កាត់ជ្រាវ និងមណ្ឌលចាក់វ៉ាក់សាំងវត្តពោធិ៍លង្កា សង្កាត់ស្លរក្រាម ក្រុងសៀមរាប ដោយក្នុងមួយមណ្ឌលទទួលបាន៖ ទឹកបរិសុទ្ធចំនួន ៣០០យួរ, មីចំនួន ២៥កេស, អាកុលចំនួន ១កាន, ម៉ាស ១កេសធំ និងថវិកាចំនួន២លានរៀល។
មានប្រសាសន៍ក្នុងឱកាសនោះ ឯកឧត្ដមនាយឧត្តមសេនីយ៍ ឃឹម ប៊ុនសុង បានថ្លែងអំណរគុណដល់រាជរដ្ឋាភិបាលកម្ពុជា ជាពិសេសសម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្តេចពិជ័យសេនា ទៀ បាញ់ ប្រធានក្រុមការងារថ្នាក់ជាតិចុះជួយខេត្តសៀមរាប ដែលបានផ្តល់វ៉ាក់សាំងមកចាក់ជូនបងប្អូនប្រជាពលរដ្ឋ នៅទូទាំងខេត្តសៀមរាបនាពេលនេះ ដើម្បីការពារពលរដ្ឋពីជំងឺកូវីដ-១៩ ដោយឥតគិតថ្លៃ ឱ្យបានគ្រប់ៗគ្នា និងតាមបណ្ដាស្រុកជាបន្តបន្ទាប់។
ឯកឧត្ដមនាយឧត្តមសេនីយ៍ ក៏បានណែនាំដល់មណ្ឌលចាក់វ៉ាក់សាំងទាំង២ ធ្វើយ៉ាងណាជួយសម្រួលការចាក់វ៉ាក់សាំងជូនដល់មនុស្សចាស់ ព្រះសង្ឃ និងអ្នកមានក្មេងតូចៗទៅជាមួយ ឱ្យបានមុនគេ ជៀសវៀងឱ្យពួកគាត់ធ្វើការរងចាំយូរ។ ក្នុងនោះដែរក៏សូមអំពាវនាវដល់បងប្អូនប្រជាពលរដ្ឋទាំងអស់ ដែលមកទទួលវ៉ាក់សាំង សូមចូលរួមអនុវត្តវិធានការឲ្យបានត្រឹមត្រូវ ដោយត្រូវរក្សាគម្លាត សណ្តាប់ធ្នាប់ នៅទីតាំងចាក់វ៉ាក់សាំងនីមួយៗ ដោយកុំប្រជៀត ដណ្តើម និងព្យាយាមរុញគ្នា ដើម្បីបានចាក់មុននោះទេ៕
ប្រភព៖ ហ្វេសបុកឯកឧត្ដម ឃឹម ប៊ុនសុង
កែសម្រួលអត្ថបទ៖ លោក អ៊ុន ណារាជ្យ
