បើតាមលោក ង៉ា ចុង ចៅសង្កាត់នគរធំ ក្រុងសៀមរាប បានបញ្ជាក់ថា យុទ្ធនាការចាក់វ៉ាក់សាំងបង្ការជំងឺកូវីដ-១៩ ដូសទី១ ជូនប្រជាពលរដ្ឋនៅក្នុងសង្កាត់នគរធំ ត្រូវបានបិទបញ្ចប់ នៅព្រឹកថ្ងៃទី១៩ ខែកក្កដា ឆ្នាំ២០២១នេះ ក្រោមការអនុវត្តដោយក្រុមគ្រូពេទ្យនៃកងយោធពលខេមរភូមិន្ទ មកពីកងពលតូចថ្មើរជើងលេខ៤២ នៃយោធភូមិភាគទី៤ ដឹកនាំដោយ លោកឧត្តមសេនីយ៍ទោ ប៉ែន វ៉ូយ និងលោកឧត្តមសេនីយ៍ត្រី នាក់ វង្ស ដោយមានប្រជាពលរដ្ឋក្នុងសង្កាត់នគរធំ ចំនួន ៦,២៩២នាក់ ស្មើនឹងជាង៧០ភាគរយ នៃពលរដ្ឋដែលគ្រប់អាយុចាក់វ៉ាក់សាំង ចំនួន ៨,៨៥៣នាក់។ ក្នុងនោះចំពោះប្រជាពលរដ្ឋដែលនៅសេសសល់ចំនួន ៣០ភាគរយទៀត ដែលមិនបានចាក់ពដោយសារ ពួគគាត់ខ្លះមានបញ្ហាសុខភាព ខ្លះធ្វើចំណាកស្រុក និងមានខ្លះទៀតបានចាក់រួចកាលពីមុន។ ចំនែកដូសទី២ ក្រុមគ្រូពេទ្យនឹងចាក់ជូនប្រជាពលរដ្ឋនៅថ្ងៃទី៣១ ខែកក្កដា ឆ្នាំ២០២១ ខាងមុខ។
ប្រជាពលរដ្ឋក្នុងសង្កាត់នគរធំ បានសម្ដែងការត្រេកអរជាខ្លាំង និងសូមថ្លែងនូវការអរគុណចំពោះសម្តេចអគ្គសេនាបតីតេជោ ហ៊ុន សែន ប្រមុខរាជរដ្ឋាភិបាលកម្ពុជា ក៏ដូចជាថ្នាក់ដឹកនាំដទៃទៀត ដែលតែងតែគិតគូរពីសុខទុក្ខ និងការពារប្រជាពលគ្រាប់កាលៈទេសៈ។ ពួកគាត់បន្តថា ក្រោយពេលចាក់រួចសុខភាពពួកគាត់នៅធម្មតា គ្រាន់តែឈឺបន្តិចបន្តួចនៅត្រង់កន្លែងមុខម្ជុលប៉ុណ្ណោះ។ បួកគាត់បន្ថែមថា ពលរដ្ឋកម្ពុជា មានសំណាងល្អដែលមានសម្តេចតេជោជាប្រមុខដឹកនាំរាជរដ្ឋាភិបាល ហើយជានិច្ចកាលសម្តេចតែងតែគិតគូរពីសុខទុក្ខប្រជាពលរដ្ឋជានិច្ច។
សូមជម្រាបថា យុទ្ធនាការចាក់វ៉ាក់សាំងជូនពលរដ្ឋគ្រប់គ្នានៅខេត្តសៀមរាប ជំហានទី១ បានចាប់ផ្តើមពីក្រុងសៀមរាប កាលពីថ្ងៃទី១០ ដល់ថ្ងៃទី២៣ ខែកក្កដា ឆ្នាំ២០២១ ចំណែកតាមបណ្តាស្រុកទាំង១១ របស់ខេត្តសៀមរាប បានចាប់ផ្តើមកាលពីថ្ងៃទី១៤ ខែកក្កដា ២០២១៕
អត្ថបទ និង រូបភាព៖ លោក ជា ស្រស់ , លោក ខេង ឧត្តម
កែសម្រួលអត្ថបទ៖ លោក អ៊ុន ណារាជ្យ
