តាមបណ្ដាញទំនាក់ទំនងសង្គម«ហ្វេសប៊ុក»ផ្លូវការរបស់លោក សូរ ប្លាតុង អភិបាលស្រុកប្រាសាទបាគង បានឲ្យដឹងថា តំណាងប្រជាពលរដ្ឋនៅក្នុងឃុំអំពិល ស្រុកប្រាសាទបាគង បានសរសេរលិខិតគោរពថ្លែងអំណរគុណសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ព្រមទាំងសម្តេចពិជ័យសេនា ទៀ បាញ់ ប្រធានក្រុមការងារថ្នាក់ជាតិចុះជួយខេត្តសៀមរាប ដែលបានផ្តល់វ៉ាក់សាំង និងក្រុមគ្រូពេទ្យ ព្រមទាំងកងទ័ពនៃយោធភូមិភាគទី៤ មកជួយចាក់វ៉ាក់សាំង ជូនបងប្អូនប្រជាពលរដ្ឋនៅទូទាំងឃុំអំពិល ដើម្បីការពារពលរដ្ឋពីជំងឺកូវីដ-១៩ ដោយឥតគិតថ្លៃ ។
តាមខ្លឹមសារនៃលិខិតបានរៀបរាប់ថា ៖ នាងខ្ញុំឈ្មោះ ណន សុភី អាយុ២៧ឆ្នាំ ជាតំណាងឲ្យប្រជាពលរដ្ឋក្នុងឃុំអំបិល ស្រុកប្រាសាទបាគង ខេត្តសៀមរាប សូមលំឱនកាយគោរពថ្លែងអំណរគុណ ជូនចំពោះសម្តេចអគ្គសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានពុះពារគ្រប់ការលំបាក ដើម្បីស្វែងរកវ៉ាក់សាំងការពារជំងឺកូវីដ-១៩ ចាក់ជូនប្រជាពលរដ្ឋទូទាំងប្រទេស ក្នុងនោះនាងខ្ញុំក៏បានឃើញជាក់ស្ដែងថា សម្ដេចពិជ័យសេនា ទៀ បាញ់ ឧបនាយករដ្ឋមន្រ្តីក្រសួងការពារជាតិ អគ្គមេបញ្ជាការកងយោធពលខេមរភូមិន្ទ និងបញ្ជាការកងទ័ពជើងគោក បានចាត់តាំងកងយោធពលខេមរភូមិន្ទ ដែលកំពុងបំពេញភារកិច្ច ក្នុងភូមិសាស្រ្តយោធភូមិភាគទី៤ ចុះបំពេញភារកិច្ច ចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋក៏ដូចជារូបនាងខ្ញុំផ្ទាល់ នៅក្នុងមូលដ្ឋានទូទាំងឃុំអំពិល ស្រុកប្រាសាទបាគង ខេត្តសៀមរាប ។
ជួសមុខឲ្យប្រជាពលរដ្ឋនៅក្នុងឃុំអំពិលស្រុកប្រាសាទបាគង សូមសម្ដែងនូវការដឹងគុណដ៏ឧត្តុង្គឧត្តម និង សូមប្ដេជ្ញាអនុវត្តឲ្យបាននូវអនុសាសន៍ណែនាំដ៏ខ្ពង់ខ្ពស់របស់សម្ដេចតេជោ គឺ បីការពាររ បីកុំ និងវិធានការរបស់ក្រសួងសុខាភិបាល និងការណែនាំរបស់អាជ្ញាធរដែនដី គ្រប់លំដាប់ថ្នាក់ ដើម្បីការពារការរីករាលដាលជំងឺកូវីដ ១៩ ដើម្បីនាងខ្ញុំ គ្រួសារនាងខ្ញុំ សហគមន៍ និងសង្គមជាតិទាំងមូល ។
ជួសមុខឲ្យប្រជាពលរដ្ឋនៅក្នុងឃុំអំពិល សូមបួងសួងដល់វត្ថុស័ក្ដិសិទ្ធិលើលោក តាមជួយបីបាច់ថែរក្សា សម្ដេចតេជោ និង សម្ដេចកិត្តិព្រឹទ្ធបណ្ឌិត សូមប្រកបតែសុខភាពល្អ អាយុយឺនយូរ ឈ្នះអស់មាសត្រូវ ដើម្បីដឹកនាំនាវាកម្ពុជា កាន់តែរីកចម្រើនរុងរឿង សប្បូរសប្បាយថែមទៀត និងសូមគោរពជូនពរ សម្ដេចពិជ័យសេនា ប្រមុខក្រសួងការពារជាតិ អគ្គមេបញ្ជាការនៃកងយោធពលខេមរភូមិន្ទ បញ្ជាការដ្ឋានកងទ័ពជើងគោក មេបញ្ជាការយោធភូមិភាគទី៤ ព្រមទាំងនាយទាហានទាំងអស់ ដែលបានចុះបំពេញភារកិច្ចនៅក្នុងមូលដ្ឋានរបស់យើងខ្ញុំ សូមបានសមប្រកបតែសេចក្ដីសុខ សុភមង្គល ជួបប្រទះនូវពុទ្ធពរទាំងបួនប្រការគឺ អាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ ។
សូមបញ្ជាក់ថា ក្នុងរយៈពេល១០ថ្ងៃ គិតចាប់ពីថ្ងៃទី១០ ដល់ថ្ងៃទី១៩ ខែកក្កដា ឆ្នាំ២០២១នេះ យុទ្ធនាការចាក់វ៉ាក់សាំងជូនប្រជាពលរដ្ឋក្នុងខេត្តសៀមរាប សរុបចំនួន ២៥៥.៩០៧នាក់ មានស្រីចំនួន ១៣២.០៧០នាក់ ក្នុងនោះស្រុកប្រាសាទបាគង ដែលបានចាប់ដំណើរការពីថ្ងៃទី១៥ ខែកក្កដា សម្រេចចាក់បានសរុបចំនួន ៣៧.៥៨១នាក់ ក្នុងនោះស្រី ១៩.៧១៨នាក់៕
