នៅព្រឹកថ្ងៃទី២៣ ខែកក្កដា ឆ្នាំ២០២១នេះ លោកជំទាវ ពុំ ច័ន្ទីនី អគ្គលេខាធិការកាកបាទក្រហមកម្ពុជា តំណាងដ៍ខ្ពង់ខ្ពស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បាននាំយកថវិកាចំនួន ៥ម៉ឺនដុល្លា និងសំភារៈប្រើប្រាស់ការពារជំងឺកូវីដ-១៩ មួយចំនួនមាន៖ អាកុល៥កាន ស្មើ១៥០លីត្រ ,ម៉ាស់៩កេស ស្មើរ៥០០០ម៉ាស់ ,ស្រោមដៃ២កេស ស្មើ២០០០រាយ ,ទឹកថ្នាំសម្លាប់មេរោគ ១០ប៊ីដុង ស្មើរ៥០លីត្រ និងម៉ាស៊ីនចាំហាយ ២គ្រឿង ប្រគល់ជូនមន្ទីរពេទ្យកុមារអង្គរខេត្ដសៀមរាប ស្របពេលដែរមន្ទីរពេទ្យមួយនេះ កំពុងជួបការខ្វះខាតមូលនិធិសម្រាប់ការព្យាបាល និងថែទាំសុខភាពកុមារ-ទារកប្រមាណជាង ៥០០នាក់ ក្នុងមួយថ្ងៃដោយឥតគិតថ្លៃ ក្នុងពេលជួបនូវវិបត្តិកូវីដ-១៩។
បើតាមលោក ងួន ច័ន្ទភក្ដ្រា ប្រធានមន្ទីរពេទ្យកុមារអង្គរ ខេត្ដសៀមរាប បានឲ្យដឹងថា មន្ទីរពេទ្យកុមារអង្គរជាអង្គភាពមិនស្វែងរកប្រាក់ចំណេញពីប្រជាពលរដ្ឋទេ ហើយមន្ទីរពេទ្យមួយនេះមានបេសកកម្មលើកកម្ពស់សុខុមាលភាពកុមារកម្ពុជាគ្រប់រូប។ មិនត្រឹមតែផ្តល់សេវាសុខាភិបាលដល់កុមារ ដោយឥតគិតថ្លៃតាំងពីឆ្នាំ១៩៩៩ ប៉ុណ្ណោះទេ តែមន្ទីរពេទ្យកុមារអង្គរក៏ជាមជ្ឈមណ្ឌលបណ្តុះបណ្តាលវេជ្ជសាស្ត្រ របស់សិស្ស និស្សិត និងមន្ត្រីសុខាភិបាលផ្សេងទៀតផងដែរ។ នៅចំពោះមុខវិបត្តិជំងឺកូវីដ-១៩ ការផ្ដល់មូលនិធិពីក្រៅប្រទេសដែលជាប្រភពហិរញ្ញវត្ថុដ៏សំខាន់របស់មន្ទីរពេទ្យកុមារអង្គរ បានធ្លាក់ចុះយ៉ាងគំហុក ដែលបណ្ដាលឲ្យមន្ទីរពេទ្យដ៏សប្បុរសមួយនេះ រងការប្រឈមយ៉ាងខ្លាំងក្នុងបេសកកម្មផ្តល់សេវាសុខភាពជួយសង្គ្រោះជីវិតកុមារកម្ពុជាដោយឥតគិតកម្រៃ ប្រកបដោយគុណភាពខ្ពស់ និងក្តីមេត្តា យ៉ាងតិចណាស់ចំនួន៥០០នាក់ ក្នុងមួយថ្ងៃៗ។ ក្នុងនោះបេសសកម្មរបស់មន្ទីរពេទ្យនេះ គឺផ្ដោតកម្មវិធីនៃការព្យាបាលមាន៣សំខាន់ៗ ការព្យាបាល ការអប់រ និងការការពារ។
មានប្រសាសន៍ក្នុងោកាសនោះលោកជំទាវ ពុំ ច័ន្ទីនី បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន តែងតែយកចិត្តទុកដាក់យ៉ាងខ្លាំងដល់ប្រជាពលរដ្ឋ ពិសេសកុមារដែលកំពុងប្រឈមនឹងជំងឺ និងងាយរងគ្រោះ ទោះបីស្ថិតក្នុងស្ថានភាពបែបណាក៏ដោយ គឺតែងបានផ្តល់ភាពកក់ក្តៅដល់បងប្អូនជានិច្ចក្នុង គ្រាលំបាកនានាពោល គឺទីណាមានទុក្ខលំបាកទីនោះមានកាកបាទក្រហមកម្ពុជា។ លោកជំទាវបញ្ជាក់ថា ក្នុងឋានៈជាប្រធានកាកបាទក្រហមកម្ពុជា និងជាឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិ ដើម្បីសុខភាពស្ត្រី និងកុមារ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែគិតគូរយកចិត្តទុកដាក់បំផុតលើការលើកកម្ពស់សុខុមាលភាពរបស់ប្រជាពលរដ្ឋងាយរងគ្រោះបំផុត ដែលក្នុងនោះការរួមចំណែកជួយព្យាបាលកុមារកម្ពុជារាប់ម៉ឺននាក់ តាមរយៈការផ្តល់ជូនមន្ទីរពេទ្យគន្ធបុប្ផា នូវថវិកា១លានដុល្លារអាមេរិកជារៀងរាល់ឆ្នាំ គិតចាប់តាំងពី ឆ្នាំ២០១២ មក។ ក្នុងនោះកាកបាទក្រហមកម្ពុជាបានឆ្លើយតប និងសង្គ្រោះបន្ទាន់ដល់ជនរង គ្រោះនិងជនងាយរងគ្រោះ អ្នកផ្ទុកមេរោគអេដស៍ ជនពិការ កុមារកំព្រា ចាស់ជរាគ្មានទីពឹង ស្រ្តីមេម៉ាយក្រីក្រមានកូនច្រើន ជាពិសេសជួយសង្គ្រោះកុមារ។
ក្នុងឱកាសនោះដែរ លោកជំទាវក៏បានពាំនាំនូវការផ្តាំផ្ញើរបស់ សម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា នូវវិធានការពារនៃជំងឺកូវីដ-១៩ កុំឲ្យមានការឆ្លងរាលដាលនៅក្នុងសហគមន៍ និងវិធានការរបស់ប្រមុខរាជរដ្ឋាភិបាល ៣កុំ ៣ការពារ និង សេចក្តីណែនាំរបស់ក្រសួងសុខាភិបាលឲ្យបានខ្ជាប់ខ្ជួន ព្រមទាំងសូមឲ្យបងប្អនរក្សាឲ្យបានពីគន្លាតសុវត្ថិភាព និងទៅទទួលចាក់វ៉ាក់សាំងការពារកូវីដឲ្យបានគ្រប់គ្នាផងដែរ៕
អត្ថបទ និង រូបភាព៖ លោក ទ្រា ពន្លឺ ,លោក ឈិត សាវី ,លោក យូ វង្ស
កែសម្រួលអត្ថបទ៖ លោក អ៊ុន ណារាជ្យ
