នាព្រឹកថ្ងៃទី២៣ ខែកក្កដា ឆ្នាំ២០២១នេះ ឯកឧត្តម លីវ សុខុន អនុប្រធានក្រុមការងារថ្នាក់កណ្តាលចុះជួយស្រុកស្រីស្នំ តំណាងដ៏ខ្ពង់ខ្ពស់ ឯកឧត្តម លន់ សុធី ប្រធានក្រុមការងារថ្នាក់កណ្ដាលចុះជួយស្រុកស្រីស្នំ រួមដំណើរដោយលោក លោកស្រី ជាអនុប្រធាន សមាជិក សមាជិកា នៃក្រុមការងារ បាននាំយកនូវទៀនចំណាំវស្សា ទេយ្យវត្ថុ និងបច្ច័យមួយចំនួន រួមមាន ៖ ទៀនចំណាំវស្សាចំនួន ១០គូ , សាដក ១០កញ្ចប់ , មីជាតិ២០កេស , ត្រីខ១០យួរ , ទឹកត្រី១០យួរ , ទឹកស៊ីអ៊ីវ១០យួរ , ទឹកសុទ្ឋ៥០កេស , ទឹកអូអីឈិក២០កេស , អង្ករ៥០០គីឡូក្រាម , ម៉ាស២០ប្រអប់ , ទឹកដោះគោ១០០កំប៉ុង ,ស្កសរ ,ប៊ីចេង , តែ , អាល់កុលចំនួន១០០លីត្រ និងថវិកាមួយចំនួនទៀត ប្រគេនដល់ព្រះសង្ឃចំនួន០៩ វត្ត និងអាស្រមចំនួន០១ ក្នុងទូទាំងស្រុក ទៅតាមគន្លងប្រពៃណីព្រះពុទ្ធសាសនាដែលជាសាសនារបស់រដ្ឋ ក្នុងរដូវកាលដែលព្រះសង្ឃ ត្រូវធ្វើវដ្តប្រតិបត្តិ ចូលព្រះវស្សា ។
ឯកឧត្តម លីវ សុខុន មានប្រសាសន៍ថា សម្ភារនិងទេយ្យវត្ថុទាំងនេះ គឺបានមកពីការចូលរួមរបស់សមាជិកសមាជិកាក្រុមការងារចុះជួយស្រុកស្រីស្នំ ដែលបានបរិច្ចាគធនធានថវិកាផ្ទាល់ខ្លួន សម្រាប់ចំណាយទិញ និងប្រគេនដល់ព្រះសង្ឃ តាជីដូនជីនៅក្នុងវត្ត និងអាស្រមទាំង១០ ក្នុងរដូវកាលដែលព្រះសង្ឃ ត្រូវធ្វើវដ្តប្រតិបត្តិ ចូលព្រះវស្សាអស់កាលត្រីមាស សម្រាប់ជាចតុប្បច្ច័យភិក្ខុសង្ឃប្រើប្រាស់ ក៏ដូចជាតបទៅនឹងតម្រូវការចាំបាច់នៃដំណាក់កាលជួបការលំបាកដោយវិបត្តិជំងឺកូវីដ-១៩ ដែលកំពុងរាតត្បាតឆ្លងចូលសហគមន៍ជាបន្តបន្ទាប់ ។
ឯកឧត្តម លីវ សុខុន មានប្រសាសន៍ទៀតថា ក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឲ្យប្រទេសជាតិទាំងមូលមានសន្តិសុខពេញបរិបូរណ៍ ជាពិសេសមានការរីកចម្រើនលើគ្រប់វិស័យ ទាំងវិស័យពុទ្ធចក្រ និង អាណាចក្រ ដូចដែលយើងទាំងអស់គ្នាបានមើលឃើញជាក់ស្ដែងនឹងភ្នែកស្រាប់ ដូច្នេះសំអំពាវនាវដល់បងប្អូនប្រជាពលរដ្ឋទាំងអស់ សូមបន្តចូលរួមជាមួយរាជរដ្ឋាភិបាលកម្ពុជា ដែលមានសម្ដេចតេជោ ជាប្រមុខនាំ ដើម្បីឲ្យប្រទេសកម្ពុជាយើង កាន់តែការរីកចម្រើនថ្មីៗបន្ថែមទៀត ។
ជាមួយគ្នានេះ ឯកឧត្តម លីវ សុខុន បានអំពាវនាវដល់ព្រះសង្ឃ និងបងប្អូនប្រជាពលរដ្ឋជិតឆ្ងាយ ត្រូវចូលរួមទាំងអស់គ្នា ដោយអនុវត្តឲ្យបានហ្មត់ចត់ តាមសេចក្តីជូនដំណឹងរបស់ក្រសួងសុខាភិបាល និង សេចក្តីណែនាំនានារបស់រដ្ឋបាលខេត្ត ក្នុងការទប់ស្កាត់ការរីករាលដាលនៃជំងឺកូវីដ-១៩នេះ ដើម្បីរួមគ្នាការពារទប់ស្កាត់កុំឱ្យមេរោគដ៍សាហាវនេះរីករាលដាលបន្តឆ្លងចូលសហគមន៍ ក្នុងនោះត្រូវការពារដោយការពាក់ម៉ាស់ , ការលាងសំអាតដៃឱ្យបានញឹកញាប់ , ការរក្សាគម្លាតសុវត្ថិភាពសង្គមបុគ្គលពីម្នាក់ទៅម្នាក់ឱ្យបានយ៉ាងតិចមួយម៉ែត្រកន្លះ និង កុំចូលទៅទីកន្លែងបិទជិតខ្វះខ្យល់ចេញចូលនិងប្រើម៉ាស៊ីនត្រជាក់ច្រើន , កុំទៅទីដែលមានមនុស្សច្រើនកុះករ , កុំប៉ះពាល់គ្នា និង កុជួបជុំគ្នាច្រើនជាដើម។
មានប្រសាសន៍ក្នុងឱកាសនោះ លោកស្រី ចាន់ សួយ អភិបាលរងស្រុកស្រីស្នំ បានឱ្យដឹងថា ដោយមានការយកចិត្តទុកដាក់ពីរាជរដ្ឋាភិបាល ដែលមានសម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និង សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងកាពារជាតិ និង ជាប្រធានក្រុមការងារថ្នាក់ជាតិចុះជួយស្រុកស្រីស្នំ បានយកចិត្តទុកដាក់យ៉ាងខ្លាំងលើសុខទុកប្រជាពលរដ្ឋ ជាពិសេសការចាក់វ៉ាក់សាំងការពារជំងឺកូវីដ១៩ ក្នុងស្រុកស្រីស្នំ ដែលបានអនុវត្តចាប់តាំងពីថ្ងៃទី១៥ រហូតដល់ថ្ងៃទី២០ ខែកក្កដា សម្រេចបាន១០០ភាគរយហើយ៕
អត្ថបទ ៖ លោក បុង ឆវ័ន ,រូបភាព ៖ លោក ធន់ ពូថេ
កែសម្រួលអត្ថបទ ៖ លោក លីវ សាន្ត