នៅថ្ងៃទី២៥ ខែកក្កដា ឆ្នាំ២០២១ម្សិលមិញនេះ ប្រជាពលរដ្ឋដែរទើបបញ្ចប់ការធ្វើចត្តាឡីស័កចំនួន១២០គ្រួសារ ដែលរស់នៅក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប ទទួលអំណោយជាគ្រឿងឧបភោគបរិភោគ និងសម្ភារៈប្រើប្រាស់មួយចំនួនពីអង្គការបញ្ញាមូលនិធិអប់រំនៅកម្ពុជា ដើម្បីសម្រួលដល់ជីវភាពរស់នៅប្រចាំថ្ងៃមួយរយៈពេល ដោយក្នុងមួយគ្រួសារទទួលបាន៖ អង្ករ ២០គីឡូក្រាម ,ទឹកត្រី ២ដប ,ទឹកស៊ីអ៊ីវ ២ដប ,ប៊ីចេង ១គីឡូក្រាម ,ស្ករស ១គីឡូក្រាម ,ខ្ទឹមស ១គីឡូក្រាម ,សាប៊ូ៤ដុំ ,អាល់កុល ១លីត្រ និងម៉ាស់០១ប្រអប់។
មានប្រសាសន៍ក្នុងឱកាសនោះ លោក សូរ ប្លាតុង អភិបាលស្រុកប្រាសាទបាគង ជំនួសមុខឲ្យបងប្អូនប្រជាពលរដ្ឋទាំង១២០គ្រួសារ បានសម្ដែងនូវការអរគុណ និងកោតសរសើរចំពោះសកម្មភាពសប្បុរសធម៌របស់អង្គការបញ្ញាមូលនិធិអប់រំនៅកម្ពុជា ដែលបានលះបង់ធនធានផ្ទាល់ទោះតិចក្តីច្រើនក្តី ដើម្បីយកមកចែករំលែកដល់គ្រួសារខ្វះខាតលើជីវភាពប្រចាំថ្ងៃក្នុងដំណាក់កាលជួបការលំបាកដោយសារជំងឺកូវីដ-១៩ ដែលនេះបង្ហាញឱ្យឃើញពីវប្បធម៌ចែករំលែក ជួយទុក្ខធុរៈគ្នាទៅវិញទៅមកក្នុងគ្រាលំបាក និងបង្ហាញពីទឹកចិត្តនិងស្មារតីយកអាសារ ជួយសង្គ្រោះគ្នាទៅតាមលទ្ឋភាព ស្របតាមគោលនយោបាយរបស់រាជរដ្ឋាភិបាលកម្ពុជាក្នុងការកាត់បន្ថយភាពក្រីក្ររបស់បងប្អូនប្រជាពលរដ្ឋ។
ជាមួយគ្នានោះដែរ លោកអភិបាលស្រុក ក៏បានកោតសរសើរចំពោះបងប្អូនប្រជាពលរដ្ឋយើងទាំងអស់ក្នុងឃុំកំពង់ភ្លុកនេះ ដែលបានចូលរួមអនុវត្តន៍វិធានការចត្តាឡីសក័ ប្រកបដោយភាពអត់ធ្មត់ និងការទទួលខុសត្រូវ។ ក្នុងនោះដែរលោកក៏បានអំពាវនាវដល់បងប្អូនប្រជាពលរដ្ឋទាំងអស់ ត្រូវចូលរួមអនុវត្តតាមសេចក្តីជូនដំណឹង និងសេចក្តីណែនាំនានារបស់រដ្ឋបាលខេត្ត ដើម្បីការពារការឆ្លងជំងឺកូវីដ-១៩ ជាពិសេសត្រូវប្រកាន់ខ្ជាប់នូវវិធានការរបស់ក្រសួងសុខាភិបាល ពិសេសវិធានការរបស់រាជរដ្ឋាភិបាល គឺ៣ការពារនិង៣កុំ៕
អត្ថបទ៖ លោក អ៊ុន ណារាជ្យ
រូបភាព៖ ហ្វេសបុកអភិបាលស្រុកប្រាសាទបាគង
