មានប្រសាសន៍ក្នុងឱកាសចុះត្រួតពិនិត្យវឌ្ឍនភាពនៃការរៀបចំរមណីយដ្ឋាន សហគមន៍ព្រៃឈើចង្ក្រានរយ ដែលស្ថិតក្នុងស្រុកវ៉ារិន ខេត្តសៀមរាប នៅព្រឹកថ្ងៃទី២៩ ខែកក្កដា ឆ្នាំ២០២១នេះ លោក នាក់ ណេរ៉ុន អភិបាលរងខេត្តសៀមរាប បានបញ្ជាក់ថា តំបន់រមណីយដ្ឋាននេះ ត្រូវបានរដ្ឋបាលខេត្តសៀមរាប អនុញ្ញាតឲ្យក្រុមសហគ្រិនវ័យក្មេង ខេត្តសៀមរាប សហការជាមួយនឹងសហគមន៍ព្រៃឈើចង្ក្រានរយ ធ្វើការរៀបចំជាកន្លែងសម្រាប់អ្នកទេសចរសម្រាកលំហែ គយគន់មើលទេសភាពព្រៃឈើដ៏ស្រស់បំព្រង និងសត្វព្រៃរាប់រយប្រភេទ។ លោកក៏បានជំរុញឲ្យគ្រប់ភាគីពាក់ព័ន្ធពន្លឿន ការអភិវឌ្ឍនៅតំបន់សហគមន៍ព្រៃឈើ និងអេកូទេសចរណ៍ចង្ក្រានរយ ដើម្បីឲ្យទីនេះកាន់តែមានភាពទាក់ទាញអ្នកទេសចរ នាពេលដែលបញ្ចប់វិបត្តិជំងឺកូវីដ-១៩។
លោក នាក់ ណេរ៉ុន បញ្ជាក់ទៀតថា បើទោះបីជាក្នុងដំណាក់កាលនៃការរាតត្បាតរបស់ជំងឺកូវីដ-១៩ ធ្វើឲ្យវិស័យទេសចរណ៍មានការធ្លាក់ចុះ ប៉ុន្តែក្រោមការដឹកនាំរបស់សម្តេចតេជោ រាជរដ្ឋាភិបាលកម្ពុជា បានសម្រេចដាក់ចេញនូវវិធានការស្តារឡើងវិញ នូវវិស័យទេសចរណ៍នេះ នៅពេលដែលវិបត្តិកូវីដ-១៩ ត្រូវបានបញ្ចប់នាពេលខាងមុខ។ ក្នុងនោះស្របតាមគោលនយោបាយរបស់រាជរដ្ឋាភិបាលនេះ ទើបរដ្ឋបាលខេត្តសៀមរាប ខិតខំជំរុញដល់អ្នកពាក់ព័ន្ធនានា ត្រូវពន្លឿនកិច្ចការអភិវឌ្ឍនៅទីរមណីដ្ឋាននេះ ឲ្យបានទាន់ពេលវេលា។ ជាមួយគ្នានោះដែរ លោកអភិបាលរងខេត្ត ក៏បានកោតសរសើរចំពោះសមិទ្ធផល ដែលក្រុមការងាររបស់សហគ្រិនវ័យក្មេង និងសហគមន៍ព្រៃឈើចង្ក្រានរយ បានខិតខំអនុវត្តក្នុងការត្រួសត្រាយធ្វើផ្លូវចូលទៅកាន់រមណីយដ្ឋាននេះ ឲ្យមានភាពល្អប្រសើរ។
សូមជម្រាបជូនថា សហគមន៍ព្រៃឈើ និងអេកូទេសចរណ៍ចង្ក្រាន្តរយ ស្ថិតនៅក្នុងភូមិបាយដុត ឃុំស្វាយស ស្រុកវ៉ារិន ខេត្តសៀមរាប មានផ្ទៃដីទំហំ៩១០៤ហិកតា បានបង្កើតឡើងកាលពីឆ្នាំ២០១០ និងបានចុះបញ្ជីនៅក្រសួងកសិកម្ម រុក្ខាប្រម៉ាញ់ និងនេសាទ នៅឆ្នាំ២០១៧ ក្រោមការជួយជ្រោមជ្រែងពីរដ្ឋបាលខ្រុកវ៉ារិន និងខណ្ឌរដ្ឋបាលព្រៃឈើសៀមរាប។ សហគមន៍ព្រៃឈើនេះ ជាតំបន់ដែលមានសក្ដានុពលជាខ្លាំងលើវិស័យទេសចរណ៍ ព្រោះមានព្រៃឈើធម្មជាតិតូចធំជាច្រើន និងមានកន្លែងសម្រាប់ទស្សនាជាច្រើន ដូចជា ទឹកធ្លាក់ចង្ក្រានរយ , ភ្នំចង្ក្រានរយ , ពើងច័ន្ទក្រហម , ពើងម្នាស់ , រូងប្រចៀវ , …. រួមទាំងកន្លែងមើលសត្វព្រៃ ដែលមានសត្វព្រៃជាច្រើនប្រភេទកំពុងរស់នៅ ដូចជាប្រភេទសត្វស្លាប , សត្វចតុបាត និង ប្រភេទសត្វល្មូន ខណៈដែលសត្វខ្លះ នៅក្នុងពិភពលោកក្រៅពីតំបន់នេះ គឺគ្មានសត្វប្រភេទនេះទេ៕
អត្ថបទ៖លោក ជា ស្រស់ ,រូបភាព៖ លោក ទិត្យ សំបូរ
កែសម្រួល៖ លោក អ៊ុន ណារាជ្យ
