នៅព្រឹកថ្ងៃទី០២ ខែសីហា ឆ្នាំ២០២១នេះ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអញ្ជើញជាអធិបតីក្នុងកិច្ចប្រជុំសាមញ្ញប្រចាំសប្តាហ៏ទី១ ដើមខែសីហា ឆ្នាំ២០២១ តាមរយៈប្រព័ន្ធវីដេអូ និងដោយផ្ទាល់ ជាមួយថ្នាក់ដឹកនាំ និងអគ្គនាយក នៃអគ្គនាយកដ្ឋានទាំង៥ របស់ក្រសួងព័ត៌មាន ដើម្បីពិនិត្យការងារដែលបានអនុវត្តកន្លងមក និងពិភាក្សាការងារ ដែលត្រូវអនុវត្តបន្ត។
មានប្រសាសន៍បើកកិច្ចប្រជុំ ឯកឧត្តម ខៀវ កាញារីទ្ធបានថ្លែងការកោតសរសើរដល់ក្រុមការងារផ្សាយផ្ទាល់ពិសេសរបស់ទូរទស្សន៏ជាតិកម្ពុជា និងអ្នកថតរូបរបស់ទីភ្នាក់ងារសារព័ត៌មានកម្ពុជា AKP ដែលទទួល បានព័ត៌មានភ្លាមៗ ហើយចេញទៅថតទាំងពាក់កណ្តាលយប់ សម្រាប់ការមក ដល់នូវ វ៉ាក់សាំងកូវីដ-១៩ Johnson & Johnson ចំនួន ៥០ម៉ឺនដូសទៀត ជាជំនួយរបស់សហរដ្ឋអាមេរិក បានមកដល់កម្ពុជានៅវេលាម៉ោង១២ នឹង១៥ នាទី រំលងអធ្រាត្រឈានចូល ថ្ងៃទី០៣ ខែសីហានេះ ទោះបីរាជធានីភ្នំពេញស្ថិតក្នុង បម្រាមគោចរចាប់ពីម៉ោង ៩យប់ រហូតដល់ម៉ោង ៣ទៀបភ្លឺក៏ដោយ តែក្រុមការងារបានចេញទៅថតផ្សព្វផ្សាយបានទាន់ពេលវេលាពីការមកដល់នូវ វ៉ាក់សាំងរបស់អាមេរិកនេះ។
ឯកឧត្តម មាស សុភ័ណ្ឌ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានគូសបញ្ជាក់ពីលទ្ធផលនៃកិច្ចប្រជុំ ដោយក្នុងនោះក្រសួងព័ត៌មាន គ្រោងនឹងសហការជាមួយនឹង TikTok ដែលជាប្រព័ន្ធបណ្ដាញសង្គមថ្មី ដើម្បីធ្វើការផលិតជាសារអប់រំ និងជាវីដេអូឃ្លីបផ្សេងៗ ស្ដីអំពីការប្រយុទ្ធប្រឆាំងជំងឺកូវីដ-១៩ ជូនប្រជាពលរដ្ឋបានកាន់តែយល់ដឹងច្បាស់បន្ថែមទៀត ដើម្បីការពារខ្លួនឲ្យជាគេចផុតពីការឆ្លងនៃជំងឺកូវីដនេះ។ នៅក្នុងដំណើរការនៃកិច្ចប្រជុំនេះដែរ ឯកឧត្តមរដ្ឋមន្រ្តី បានពិនិត្យមើលទៅលើវឌ្ឍន៏ភាពការងាររបស់បណ្តាអគ្គនាយកដ្ឋានទាំង៥ ចំណុះឲ្យក្រសួងព័ត៌មាន ក៏ដូចជាគណ: កម្មការផ្សេងៗដែលដឹកនាំដោយ ឯកឧត្តមលោកជំទាវជារដ្ឋលេខាធិការ ដែលមានភារកិច្ចដឹកនាំបំរើកិច្ចការងារប្រចាំថ្ងៃរបស់ក្រសួងព័ត៌មាន ដោយក្នុងនោះបានបង្ហាញពីលទ្ធផលការងារដែលប្រព្រឹត្តទៅហើយសម្រេចបានតាមផែនការដែលបានដាក់ចុះ ហើយក៏ត្រូវបន្តអនុត្តន៏ឲ្យបានជោគជ័យ ក៏ដូចជាមានប្រសិទ្ធភាពទៅលើផែនការដែលត្រូវអនុត្តន៏ នៅក្នុងសប្តាហ៏បន្តទៅមុខទៀត ដើម្បីឆ្លើយតបទៅនិងយុទ្ធសាសស្រ្ត និងកិច្ចការងារសំខាន់ៗ ដែលរាជរដ្ឋាភិបាល និងក្រសួងព័ត៌មានបានដាក់ចេញទោះបីកំពុងស្ថិតក្នុងបរិបទកូវីដក៏ដោយ។
ឯកឧត្តម មាស សុភ័ណ្ឌ បានជម្រាបជូនដែរថា កិច្ចប្រជុំក៏បានពិនិត្យអំពីលទ្ធភាពក្នុងការត្រៀមរៀបចំវេទិកាតុមូល និពន្ធនាយកសារព័ត៌មានលើកទី១៣ ដែលគ្រោងធ្វើភ្ជាប់ជាមួយកិច្ចប្រជុំកំពូលអាស៊ី អឺរ៉ុបលើកទី១៣ ដែលប្រព្រឹត្តទៅនាខែវិច្ឆិកា ឆ្នាំ២០២១នេះ។ ដូច្នេះ ឯកឧត្តមរដ្ឋមន្ត្រី បានណែនាំទៅដល់ក្រុមការងារ ដែលទទួលបន្ទុករៀបចំកិច្ចការងារនេះ ធ្វើយ៉ាងណាឲ្យពិនិត្យលទ្ធភាពនៅក្នុងការរៀបចំវេទិកាតុមូលតាមប្រព័ន្ធអនឡាញនេះឲ្យបានល្អ និងមានគុណភាព កុំឲ្យមានភាពរអាក់រអួល។ ជាមួយនេះ ត្រូវរកទីកន្លែងធ្វើជាទីតាំងមណ្ឌលព័ត៌មានសម្រាប់រៀបចំជាវេទិកាសាធារណ: ដែលមានការចូលរួមរវាងអ្នកសារព័ត៌មាន ក្នុងស្រុក និងអ្នកសារព័ត៌មាន ជានិពន្ធនាយកនៃប្រទេសជាសមាជិក អាស៊ី អឺរ៉ុប ផងដែរ។ ដូចនេះហើយក្រុមការងារទាំងអស់ត្រូវធ្វើកិច្ចសហការសាមគ្គីគ្នា ក្នុងការត្រៀមរៀបចំអោយបានល្អ ព្រោះវាជាកិត្តិយស របស់ព្រះរាជាណាចក្រកម្ពុជា ក្នុងការធ្វើជាម្ចាស់ផ្ទះកិច្ចប្រជុំកំពូល អាស៊ី អ៊ឺរ៉ុប លើកទី១៣ ក៏ដូចជារៀបចំព្រឹត្តការណ៏អមផ្សេងៗ រួមទាំងវេទិកានិពន្ធនាយកនេះផងដែរ។
ឆ្លៀតក្នុងឱកាសនៃកិច្ចប្រជុំនេះដែរ ឯកឧត្តម រដ្ឋមន្រ្តី ខៀវ កាញារីទ្ធ ក៏បានផ្តល់នូវអនុសាសន៏ដល់គណ:កម្មការទំនាក់ទំនង និងកិច្ចសហប្រតិបត្តិការអន្តរជាតិ នៃក្រសួងព័ត៌មាន ត្រូវរៀបចំជាសេចក្តីព្រាងឯកសារទាក់ទងទៅនឹងសិក្ខាសាលា ដែលបានរៀបចំឡើងជាមួយទីភ្នាក់ងារសារព័ត៌មានរុស្ស៊ី Sputnik ក្រោមប្រធានបទស្តីពី របៀបផ្ទៀងផ្ទាត់ព័ត៌មានលើបណ្តាញផ្សព្វផ្សាយប្រភេទថ្មី ដើម្បីបញ្ចៀសនូវដំណឹងក្លែងក្លាយ ដែលបានធ្វើឡើងកាលពីថ្ងៃទី១៩ ខែកក្កដា កន្លងមកនេះ។ ជាចុងបញ្ចប់នៃកិច្ចប្រជុំ ឯកឧត្តមរដ្ឋមន្រ្តី ខៀវ កាញារីទ្ធ បានបន្តក្រើនរំលឹកដល់ថ្នាក់ដឹកនាំមន្រ្តីរាជការ គ្រប់បណ្តាអគ្គនាយកដ្ឋានទាំងអស់ នៃក្រសួងព័ត៌មាន ត្រូវធ្វើយ៉ាងណាថែទាំសុខភាពឲ្យបានល្អ ទាំងខ្លួនឯងផ្ទាល់រួមទាំងក្រុមគ្រួសារ ដើម្បីជៀសផុតពីការឆ្លងជំងឺកូវីដ-១៩ ដោយសារបច្ចុប្បន្ននេះ ការឆ្លងរីករាលដាលនៃជំងឺនេះ នៅតែមានចំនួនច្រើននៅឡើយ ពិសេសប្រភេទបំប្លែងខ្លួនថ្មី Delta បាននឹងកំពុងមានការឆ្លងជាបន្តបន្ទាប់នៅក្នុងប្រទេសកម្ពុជាយើងហើយ៕
