នៅថ្ងៃទី០៣ ខែសីហា ឆ្នាំ២០២១នេះ លោក គាំ សាវី សមាជិកសកម្មនៃសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប តំណាងលោក ហ៊ុន ប៉ូគា ប្រធានសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប បានដឹកនាំសមាជិកសមាជិកា នាំយកអំណោយមួយចំនួន ប្រគល់ជូនក្រុមគ្រូពេទ្យដែលកំពុងមមាញឹកក្នុងចុះចាក់វ៉ាក់សាំងជូនប្រជាពលរដ្ឋ នៅសាលាបឋមសិក្សាខ្នារ ក្នុងសង្កាត់ជ្រាវ ក្រុងសៀមរាប ដោយអំណោយទាំងនោះមាន៖ទឹកសុទ្ធចំនួន ១០កេស ,ទឹកក្រូចចំនួន ៤កេស និងស្រោមដៃពេទ្យចំនួន ១០ប្រអប់ផងដែរ។
លោក គាំ សាវី មានប្រសាសន៍ថា ប្រទេសកម្ពុជាក្រោមការដឹកនាំ របស់សម្ដេចអគ្គមហាសេនាបតីតេជោ ហ៊ុន សែន នាយកដ្ឋមន្ត្រី សម្ដេចបានខិតខំក្នុងការជួយសង្រ្គោះអាយុជីវិត ប្រជាពលរដ្ឋកម្ពុជាឲ្យរួចផុតពីការលំបាក និងការរស់នៅប្រកបដោយសន្តិសុខ និងសេរីភាព ជាពិសេសការចូលរួមប្រយុទ្ធប្រឆាំង និងទប់ស្កាត់ជំងឺកូវីដ-១៩ តាមរយៈការស្វែងរកវ៉ាក់សាំងមកពីបណ្តាប្រទេសនានា ក្នុងការយកមកចាក់ជូនប្រជាពលរដ្ឋ បានជាបន្តបន្ទាប់ដោយឥតគិតថ្លៃ។ ជាមួយគ្នានោះដែរ លោកក៏មានសេចក្ដីរីករាយ ដែរបានចូលរួមចំណែកជាមួយរដ្ឋាភិបាល ក៏ដូចជាអាជ្ញាធរខេត្ត និងក្រុមគ្រូពេទ្យបំពេញភារកិច្ចក្នុងយុទ្ធនាការចាក់វ៉ាក់សាំងជូនប្រជាពលរដ្ធនៅខេត្តក្រុងសៀមរាប។ ហើយចំពោះអំណោយនាពេលនេះតិចតួចក្ដី តែវាក៏បានឆ្លុះបញ្ចាំងឱ្យឃើញអំពីការរួមសាមគ្គីគ្នា និងការយកចិត្តទុកដាក់ក្នុងចូលរួមជាមួយរាជរប្រជាដ្ឋាភិបាលកម្ពុជា ដើម្បីជួយដល់ពលរដ្ឋក្នុងកាលៈទេសៈដ៏លំបាកនេះ។
ក្នុងឱកាសនោះដែរលោក គាំ សាវី ក៍សូមអំពាវនាវដល់បងប្អូនប្រជាពលរដ្ឋទាំងអស់ ដែលបានមកធ្វើការចាក់វ៉ាក់សាំងនៅពេលនេះ សូមចូលរួមអនុវត្តរក្សាគម្លាត សណ្តាប់ធ្នាប់ សូមកុំប្រជៀត និងដណ្តើមគ្នា គឺត្រូវតែបន្តបង្កើនការប្រុងប្រយ័ត្នខ្ពស់ និងយកចិត្តទុកដាក់បន្ថែមទៀត ដោយចូលរួមអនុវត្តតាមវិធានការណែនាំ របស់ប្រមុខរាជរដ្ឋាភិបាល គឺ៣ការពារ ៣កុំ និងអនុវត្តសេចក្តីណែនាំរបស់ក្រសួងសុខាភិបាលឲ្យបានគ្រប់ៗគ្នា៕
អត្ថបទ និង រូបភាព៖ លោក អ៊ុន ណារាជ្យ
