ក្នុងឱកាសនាំយកនូវទៀនចំណាំព្រះវស្សា ព្រមទាំងទេយ្យទាន និងបច្ច័យប្រគេនដល់បណ្តាវត្តចំនួន៥ ក្នុងឃុំកោះសូទិន ខេត្តកំពង់ចាម នៅព្រឹកថ្ងៃទី០៣ ខែសីហា ឆ្នាំ២០២១ ឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន បានអញ្ជើញជួបសំណេះសំណាលសាកសុខទុក្ខ និងនាំយកនូវអំណោយ ចែកជូនដល់បងប្អូនប្រជាពលរដ្ឋក្រីក្រចំនួន ១០០គ្រួសារ នៅឃុំកោះសូទិន ស្ថិតក្នុងស្រុកកោះសូទិន ខេត្តកំពង់ចាម ដោយក្នុង១គ្រួសារទទួលបាន៖ អង្ករ១០គីឡូក្រាម ,ភួយ១ ,ជែលលាងដៃ១ដប និងប្រេងកូឡា១ដប។
មានប្រសាសន៍ក្នុងឱកាសនោះ ឯកឧត្តម ខៀវ កាញារីទ្ធ បានក្រើនរំលឹកឲ្យបងប្អូនប្រជាពលរដ្ឋត្រូវមានការប្រុងប្រយត្ន័ខ្ពស់បន្ថែមទៀត ក្នុងការថែរក្សា សុខភាពអោយបានល្អ តាមរយះវិធានការ ៣កុំ និង៣ការពារ ព្រោះក្នុងរយ:ពេលមួយសប្តាហ៏កន្លងមកនេះ មេរោគកូវីដ-១៩ បំប្លែងខ្លួនថ្មី ប្រភេទ Delta បានកំបុងឆ្លងចូលមកដល់កម្ពុជាយើងហើយ។ ដូច្នេះរាល់វិធានការរបស់រាជរដ្ឋាភិបាល សូមឲ្យបងប្អូនប្រជាពលរដ្ឋទាំងអស់ ចូលរួមប្រយុទ្ធប្រឆាំងជំងឺនេះ ដោយចូលរួមមអនុវត្តន៏តាមនូវរាលវិធានការរបស់ក្រសួងសុខាភិបាល ហើយតាមរយ:នេះរាជរដ្ឋាភិបាលបានជម្រុញសម្រាប់ដំណើរការចាក់វ៉ាក់សាំងបង្ការ ជំងឺកូវីដ-១៩ ជូនប្រជាពលរដ្ឋ និងកុមារចាប់ពីអាយុ១២ឆ្នាំឡើងទៅ និងមានគម្រោងចាក់វ៉ាក់សាំងដូសទី៣ ជូនដល់អ្នកដែលបានចាក់២លើករួច ពិសេសក្រុមជួរមុខតាមព្រំដែន។
ឯកឧត្តមរដ្ឋមន្ត្រី បានបញ្ជាក់ថា ការចាក់វ៉ាក់រួចហើយ គឺនៅតែឆ្លង បើសិនជាយើងមិនបានការពារឲ្យបានត្រឹមត្រូវនោះទេ ប៉ុន្តែសម្រាប់អ្នកបានចាក់២ដងរួច ការឆ្លងនោះ គឺមានកំរិតស្រាលហើយព្យាបាលឆាប់ជាសះស្បើយ ប្រៀបធៀបដូចជាពាក់មួកសុវត្ថិភាពដែរ គឺមិនមែនការពារមិនឲ្យគ្រោះថ្នាក់ចរាចរណ៏នោះទេ បើសិនជាយើងមិនមានការប្រុងប្រយ័ត្ន។ ជាមួយគ្នានោះចំពោះពិភពលោកបច្ចុប្បន្នការចាក់វ៉ាក់សាំង គឺមានតែប្រទេស២ទេ គឺប្រទេសអ៊ីស្រាអែល និងប្រទេសកម្ពុជាយើង ដែលបានរៀបចំវិធានការក្នុងការចាក់វ៉ាក់សាំងបង្ការជំងឺកូវីដ-១៩ ជូនប្រជាពលរដ្ឋបានលឿនរហ័សច្រើនជាងគេ ខណៈប្រទេសមួយចំនួនមានលុយហើយតែរកទិញមិនបាន ដូច្នេះហើយអ្វីដែលប្រមុខរាជរដ្ឋាភិបាលបានធ្វើក្នុងការស្វែងវ៉ាក់សាំង មកចាក់ជូនចាក់ជូនប្រជាពលរដ្ឋ គឺជាការយកចិត្តទុកដាក់ខ្ពស់ពីសុខមាលភាពរបស់ប្រជាជនទូទៅ ។
ព័ត៌មានជាតិ ថ្មីៗ
ក្នុងឱកាសនោះដែរ ឯកឧត្តម ខៀវ កាញារីទ្ធ ក៏បានប្រគល់ថវិកាចំនួន ៧លានរៀល ជូនដល់លោកអភិបាលស្រុកកោះសូទិន ទុកសម្រាប់ទិញស្បៀងអាហារចែកជូនបងប្អូនប្រជាពលរដ្ឋដែលកំពុងធ្វើចត្តាឡីស័កតាមខ្នងផ្ទះ និងបានប្រគល់នូវអាកុលចំនួន ២កាន ,ម៉ាស់ចំនួន ១កេស និងថវិកាចំនួន ១ពាន់ដុល្លា ជូនដល់រដ្ឋបាលឃុំកោះសូទិន ទុកសម្រាប់កសាងសមិទ្ធផលនានាបន្ថែមក្នុងឃុំឲ្យបានកាន់ស្អាត មានភាពងាយស្រួលបំពេញកិច្ចការងារប្រកបដោយប្រសិទ្ធភាពបំរើដល់ប្រជាពលរដ្ឋបានឆាប់រហ័ស។ ជាមួយគ្នានោះឯកឧត្តមរដ្ឋមន្ត្រី រួមជាមួយថ្នាក់ដឹកនាំ ក្រោមឱវាទក៏បានអញ្ជើញជួបសំណេះសំណាលសួរសុខទុក្ខក្រុមគ្រូពេទ្យ កំពុងបំពេញការងារនៅក្នុងមណ្ឌលសុខភាពស្រុកកោះសូទិន ខេត្តកំពង់ចាម និងបានផ្តល់នូវថវិកាចំនួន ១លានរៀល ជូនដល់ក្រុមគ្រូពេទ្យផងដែរ៕
