ក្រុមការងារអាជ្ញាធរជាតិអប្សរាបាននឹងកំពុងមមាញឹកក្នុងការកែលម្អសោភណ្ឌភាពផ្លូវក្នុងរមណីយដ្ឋានអង្គរ ចាប់ពីមុខព្រះលានជល់ដំរី រហូតមុខប្រាសាទបន្ទាយក្តី ដែលមានប្រវែងសរុបចំនួន ៦៣៦៨ម៉ែត្រ ដោយបែងចែកជា ៣កំណាត់ ដើម្បីធ្វើឲ្យផ្លូវមានសោភណ្ឌស្អាត និងមានភាពងាយស្រួលធ្វើចរាចរណ៍ និងទាក់ទាញអ្នកទេសចរណ៍។
បើតាមលោក យិត ចាន់ដារដ្ឋ អគ្គនាយករងនៃអាជ្ញាធរជាតិអប្សរា បានឲ្យដឹងនៅថ្ងៃទី០៣ ខែសីហានេះថា កំណាត់ផ្លូវទាំង៣កំណាត់ ដែលក្រុមការងារបាន និងកំពុងជួសជុស គឺទី១.ចាប់ពីមុខលានជល់ដំរី ទៅដល់ស្ពានប្រាសាទតាកែវ មានប្រវែង ២១២២ម៉ែត្រ ,កំណាត់ផ្លូវទី២.ចាប់ពីស្ពានប្រាសាទតាកែវ ទៅដល់ខាងលិចប្រាសាទតាព្រហ្មប្រវែង ២១២៣ម៉ែត្រ និងទី៣.ចាប់ពីខាងលិចប្រាសាទតាព្រហ្ម ទៅដល់មុខប្រាសាទបន្ទាយក្តី មានប្រវែង ២១២៣ម៉ែត្រ ដែលសរុបមានប្រវែងចំនួន ៦៣៦៨ម៉ែត្រ។
លោក យិត ចាន់ដារដ្ឋ បញ្ជាក់ថា គិតមកដល់បច្ចុប្បន្នក្រុមការងារបានជួសជុល និងកែលំអរផ្លូវទាំងនេះ រយៈពេលជាងមួយខែមកហើយ ហើយផ្លូវដែរកំពុងជួសជុលនេះជាប្រភេទផ្លូវកៅស៊ូ អ៊ុតបេតុង អេស៊ី ដោយផ្ដោតសំខាន់ទៅលើការពង្រីកស្មាផ្លូវសងខាងមានទំហំ ៦ម៉ែត្រ ហើយជាផ្លូវដែលសំខាន់ខ្លាំងនៅក្នុងរមនីយដ្ឋាន ដើម្បីលើកកម្ពស់សោភ័ណភាព និងសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរជាតិ-អន្តរជាតិ។ ចំពោះការស្ដារ និងកែលំអរកំណាត់ផ្លូវទាំងបីនេះដែរ គឺគម្រោងប្រើប្រាស់ថវិការាជរដ្ឋាភិបាលតាមរយៈមូលនិធិ អភិរក្សនិងអភិវឌ្ឍន៍។ លោកថា ផ្លូវសំខាន់ៗ នៅក្នុងរមណីយអង្គរ និងបានល្អប្រសើរទាំងស្រុង នៅចុងឆ្នាំ២០២១ ដើម្បីត្រៀមទទួលភ្ញៀវជាតិ និងអន្ដរជាតិក្រោយបញ្ចប់ជំងឺកូវីដ-១៩ ជាពិសេសសម្រួលដល់ការធ្វើដំណើរប្រជាពលរដ្ឋប្រសើរ៕
ព័ត៌មានជាតិ ថ្មីៗ
អត្ថបទ និង រូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
