នៅព្រឹកថ្ងៃទី០៤ ខែសីហា ឆ្នាំ២០២១ អង្គការអប់រំជីវិត និងសុភមង្គល បានប្រគល់ផ្ទះចំនួន៥ខ្នងជូនប្រជាពលរដ្ឋចំនួន០៥គ្រួសារ នៅក្នុងភូមិជ្រាវ និងនៅភូមិបុស្សក្រឡាញ់ សង្កាត់ជ្រាវ ក្រុងសៀមរាប ដើម្បីជួយសម្រួលដល់ការលំបាករបស់ពួកគាត់ ខណៈដែលប្រទេសជាតិកំពុងជួបវិបត្ដិជំងឺកូវីដ-១៩ ដោយផ្ទះនេះមានទំហំ៥ម៉ែត្រ គុណ៤ម៉ែត្រ ធ្វើពីឈើប្រក់សង្កសី និងបាំងជញ្ជាំងសង្កសី ដែលបានថវិកាពីសប្បុរសជនប្រទេសប្រុយណេ។
បើតាមលោក ងឿម សុផារ៉ា ប្រធានគម្រោងផ្ទះមនុស្សធម៌ នៃអង្គការអប់រំជីវិត និងសុភមង្គល បានមានប្រសាសន៍ថា ដោយមើលឃើញពីការលំបាក និងជីវភាពខ្វះខាតរបស់ប្រជាពលរដ្ឋមួយចំនួននៅសង្កាត់ជ្រាវ ក្រុងសៀមរាប លោកបានស្វែងរកថវិកាពីក្រៅប្រទេសដោយបង្កើតមូលនិធិ គម្រោងផ្ទះមនុស្សធម៌នេះ ដើម្បីធ្វើផ្ទះជូនពលរដ្ឋដែលកំពុងជួបការខ្វះខាតនៅក្នុងអំឡុងជំងឺកូវីដ-១៩ ក្នុងគោលបំណងដើម្បីជួយសម្រួល ក្នុងការរស់នៅដោយឲ្យមានលំនៅឋានរស់នៅដូចសមរម្យ។ លោកថា នេះជាផ្ទះមនុស្សធម៌ទី៩៥ហើយ ដែលបានជួយឧបត្ថម្ភថវិកាពីសប្បុរសជនប្រទេសប្រុយណេ ហើយនេះជាឱកាសដ៍កម្រមួយដែលសប្បុរសជនមកពីប្រទេសប្រុយណេ ដែលបានជួយឧបត្ថម្ភជូនប្រជាជនកម្ពុជាក្នុងអំឡុងពេលដែលប្រទេសជាតិ ក៍ដូចពិភពលោកកំពុងជួបវិបត្ដិជំងឺកូវីដ-១៩។ ក្នុងនោះដែរលោកក៏សូមអំពាវដល់សប្បុរសជនទាំងក្នុង និងក្រៅប្រទេសសូមជួយឧបត្ថម្ភដល់អង្គការមួយនេះ ដើម្បីមានលទ្ធភាពបានជួយធ្វើផ្ទះសម្រាប់ជួយដល់ប្រជាពលរដ្ឋខ្មែរថែមទៀត។
លោក ងឿម សុផារ៉ា បានបញ្ជាក់ថា ការផ្ដល់ផ្ទះមនុស្សធម៌នេះ គឺក្រុមការងារបានធ្វើឡើងចាប់ពីឆ្នាំ២០១៧មកម្លេះ ដោយបានថវិកាពីសប្បុរសជនស្ម័គ្រចិត្ដនៅក្រៅប្រទេសទេស មានសហរដ្ឋអាមេរិក ប្រទេសប្រុយណេ និងប្រទេសស្វីសជាដើម។ សម្រាបផ្ទះដែលសង់ជូនពលរដ្ឋមួយខ្នង គឺក្នុងតម្លៃជាង១.៥០០ដុល្លា ហើយគិតចាប់ពីឆ្នាំ២០១៧ មកដល់ពេលនេះ គិតជាថវិកាអស់ជាង១០ម៉ឺដុល្លា ហើយក្នុងនោះដែរក៏មានគ្រួសារខ្លះទៀតបានផ្ដល់ជាបង្គន់ និងអណ្ដូងទឹក ដោយគិតមកដល់ពេលនេះ បានប្រគល់អណ្ដូងទឹកចំនួន២០ បង្គន់ចំនួន៦៥ ដែលមានតម្លៃសរុបជាង៤ម៉ឺនដុល្លា។ លោកបន្ដថា ក្នុងរយៈពេល២ឆ្នាំចុងក្រោយនេះ ដោយសារបញ្ហាជំងឺកូវីដ-១៩ លោកនៅតែមានមូលនិធិផ្ទះមនុស្សធម៌នេះជូនប្រជាពលរដ្ឋខ្វះខាតដដែល ហើយលោកមានការសប្បាយចិត្ដនៅពេលបានធ្វើផ្ទះមនុស្សធម៌ ជូនពលរដ្ឋនៅជនបទនេះ ជាពិសេសមានការសហការល្អជាមួយអាជ្ញាធរមូលដ្ឋាន៕
អត្ថបទ និង រូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
