នៅព្រឹកថ្ងៃទី០៥ ខែសីហា ឆ្នាំ២០២១ ក្រុមប្រឹក្សាខេត្តសៀមរាប អាណត្តិទី៣ បានរៀបចំបើកកិច្ចប្រជុំសាមញ្ញលើកទី២៧ តាមរយៈប្រព័ន្ធវិឌីអូ ក្រោមអធិបតីភាពឯកឧត្តម អ៊ាន ឃុន ប្រធានក្រុមប្រឹក្សាខេត្ត និងលោក លី សំរិទ្ធ អភិបាលរងខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ដោយមានការអញ្ជើញចូលរួមពីសំណាក់ ឯកឧត្តម លោកជំទាវ ជាសមាជិក សមាជិកាក្រុមប្រឹក្សាខេត្ត ព្រមទាំងលោក លោកស្រី ជានាយក នាយករងរដ្ឋបាលសាលាខេត្ត , នាយក-នាយករងទីចាត់ការសាលាខេត្ត ប្រធាន-អនុប្រធានមន្ទីរអង្គភាពជុំវិញខេត្ត និងមន្ត្រីពាក់ព័ន្ធជាច្រើនរូប។
គួររំលឹកថា របៀបវារៈនៃកិច្ចប្រជុំនេះ មានចំនួន ៤ គឺ ៖ ទី១. ពិនិត្យ និងអនុម័ត កំណត់ហេតុកិច្ចប្រជុំសាមញ្ញលើកទី២៦ របស់ក្រុមប្រឹក្សាខេត្ត អាណត្តិទី៣ កាលពីថ្ងៃទី០៦ ខែកក្កដា ឆ្នាំ២០២១ , ទី២.ពិនិត្យ និងអនុម័ត របាយការណ៍ប្រចាំខែកក្កដា ឆ្នាំ២០២១ របស់រដ្ឋបាលខេត្ត , ទី៣.ពិនិត្យ ពិភាក្សា និងអនុម័តលើការកែសម្រួលសមាសភាពគណៈកម្មាធិការពិគ្រោះយោបល់កិច្ចការស្រ្តី និងកុមារ និង ទី៤.បញ្ហាផ្សេងៗ។ ក្រៅពីរបៀបវារៈទាំងបួននេះ អង្គប្រជុំបានលើកយកនូវបញ្ហាមួយចំនួនមកពិភាក្សា រួមមាន ៖ អំពីវិធានការក្នុងការបង្ការ ការពារ និងទប់ស្កាត់ការឆ្លងរាលដាលជំងឺកូវីដ-១៩ ក្នុងឱកាសដែលស្ថានការនៃជំងឺនេះកំពុងបន្តរីករាលដាលកាន់តែខ្លាំង , បញ្ហាករណីមេរោគបម្លែងថ្មីប្រភេទឌែលតា , បញ្ហាទទួលប្រជាពលរដ្ឋមកពីក្រៅប្រទេស , ការចាក់វ៉ាក់សាំងជូនប្រជាពលរដ្ឋក្នុងខេត្ត , ការធ្វើអាជីវកម្មផលិតផលក្លែងក្លាយទាំងសម្ភារ់ប្រើប្រាស់ និងម្ហូបអាហារ , បញ្ហាសុវត្ថិភាពចរាចរណ៍ , បញ្ហាការស្ថាបនាផ្លូវ៣៨ខ្សែក្នុងក្រុងសៀមរាប , បញ្ហាអំពើហិង្សាលើស្រី និងកុមារ និងបញ្ហាគ្រោះមហត្ថរាយផ្សេងៗ ដូចជាបញ្ហាទឹកជំនន់ និងអគ្គិភ័យ ជាដើម។
លោក លី សំរិទ្ធ បានមានប្រសាសន៍ថា កន្លងមកនេះ បើទោះជាការគ្រប់គ្រងទិន្នន័យអ្នកដំណើរ និងការស្រាវជ្រាវរកអ្នកពាក់ព័ន្ធក្នុងករណីឆ្លងជំងឺកូវីដ-១៩ ត្រូវបានរកឃើញឲ្យធ្វើចត្តាឡីស័ក និងយកវត្ថុសំណាកទៅវិភាគ រួមទាំងបានបញ្ជូនអ្នកវិជ្ជមានទៅព្យាបាលនៅមន្ទីពេទ្យបង្អែកខេត្ត និងទីតាំងព្យាបាលផ្សេងៗជាបន្តបន្ទាប់ក៏ពិតមែន ប៉ុន្តែវានៅតែជាក្តីព្រួយបារម្ភ ដោយសារចំនួនអ្នកមកពីក្រៅប្រទេសមានចំនួនកើនឡើង ហើយក្នុងនោះដែរចំពោះអ្នកមកពីក្រៅប្រទេសនេះដែរ ក្រុមការងារក៏បានរកឃើញនូវករណីវិជ្ជមានជំងឺកូវីដ-១៩ និងវិរ៉ុសបម្លែងខ្លួនថ្មី ប្រភេទឌែលតាជាច្រើនករណី ដែលវាជាបញ្ហាមួយធ្វើឲ្យអាជ្ញាធរខេត្តមានការព្រួយបារម្ភ ហើយម៉្យាងទៀតក៏នៅមានប្រជាពលរដ្ឋមួយចំនួន នៅមិនបានបង្ហាញអំពីភាពស្មោះត្រង់ និងមិនបានចូលរួមសហការទប់ស្កាត់កូវីដ-១៩នៅឡើយ ហើយថែមទាំងបណ្តាលឲ្យសកម្មភាពរបស់ខ្លួនបានក្លាយជាសកម្មភាពនៃភ្នាក់ងារចម្លងជំងឺផងដែរ ។
លោកអភិបាលរងខេត្ត មានប្រសាសន៍ទៀតថា ដូច្នេះក្នុងឱកាសនេះ សូមឲ្យក្រុមការងារ និងមន្ត្រីជំនាញទាំងអស់ ត្រូវពង្រឹងនូវវិធានឲ្យបានតឹងរឹងបន្ថែមទៀត សម្រាប់បងប្អូនប្រជាពលរដ្ឋ និងអ្នកដំណើរយើង ជាពិសេសបងប្អូនប្រជាពលរដ្ឋដែលទើបត្រឡបមកពីក្រៅប្រទេស ដោយតម្រូវឲ្យអាជ្ញាធរមូលដ្ឋាន ទាំងអាជ្ញាធរខេត្ត និងក្រុង/ស្រុក ត្រូវបង្កើនការប្រុងប្រយ័ត្នឲ្យបានខ្ពស់ ដើម្បីកុំឲ្យមានករណីឆ្លងក្នុងសហគមន៍ និង សូមអំពាវនាវដល់បងប្អូនប្រជាពលរដ្ឋ សូមចូលរួម និងបង្កើនការប្រុងប្រយ័ត្នខ្ពស់បន្ថែមទៀត ដោយត្រូវអនុវត្តវិធានការរបស់រាជរដ្ឋាភិបាល គឺ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ត្រូវអនុវត្តវិធានការរដ្ឋបាលខេត្ត និងវិធានការឲ្យធ្វើចត្តាឡីស័ករយ:ពេល១៤ ជាកំហិត ហើយចំពោះបុគ្គលទាំងឡាយណាដែលប្រព្រឹត្តល្មើសនឹងវិធានការនេះ នឹងប្រឈមការពិន័យអន្តការណ៍ ឬផ្តន្ទាទោសតាមច្បាប់ និងលិខិតបទដ្ឋានគតិយុត្តជាធរមាន។
ឯកឧត្តម អ៊ាន ឃុន ប្រធានក្រុមប្រឹក្សាខេត្ត មានប្រសាសន៍ថា បច្ចុប្បន្ននេះប្រមុខរាជរដ្ឋាភិបាលកម្ពុជា បានអនុញ្ញាតឲ្យកុមារ និង យុវវ័យ ដែរមានអាយុចាប់ពី ១២ឆ្នាំ ដល់១៧ឆ្នាំ ត្រូវមកទទួលវ៉ាក់សាំងការពារជំងឺកូវីដ-១៩ ឲ្យបានគ្រប់ៗគ្នា ព្រោះវាជាវិធានការចាំបាច់មួយ ដើម្បីដោះស្រាយ និង ស្ដារឡើងវិញចំពោះការបង្កើនចំណេះដឹងឡើងវិញសម្រាប់យុវ័យយើង ព្រោះថាការចាក់វ៉ាក់សាំងជូនពួកគាត់នេះ វាអាចជាឱកាសដែលឲ្យក្រសួងអប់រំយុវជន និងកីឡា អាចដំណើរការនៃការចាប់ផ្ដើមឲ្យមានការបើកសាលារៀនឡើងវិញ ដូចនេះសូមឲ្យក្រុមការងារត្រូវពន្លឿនបន្ថែមទៀត ចំពោះការងារចាក់វ៉ាក់សាំងជូនប្រជាពលរដ្ឋយើងឲ្យបានគ្រប់ៗគ្នា តាមដែរអាចធ្វើទៅបាន ក្នុងនោះលោកគ្រូអ្នកគ្រូ ក៏ដូចជាអាណាព្យាបាល ត្រូវធ្វើការផ្សព្វផ្សាយ និងណែនាំបន្ថែមទៀតសម្រាប់កូនៗរបស់ខ្លួន អំពីវិធីសាស្រ្តក្នុងការការពារនៃការឆ្លងនូវជំងឺកូវីដ-១៩ ដែលជាជំងឺមួយដ៏កាចសាហាវ កំពុងតែរីករាលដាលនៅលើពិភពលោក ពុំទាន់មានថ្នាំព្យាបាលនោះទេ។
ក្នុងឱកាសនោះដែរ ឯកឧត្តមប្រធានក្រុមប្រឹក្សាខេត្ត បានណែនាំដល់មន្ត្រីជំនាញពាក់ព័ន្ធ ត្រូវបង្កើនការរឹតបន្ទឹងបន្ថែមទៀតក្នុងការទប់ស្កាត់ជំងឺកូវីដ-១៩ នេះ ជាពិសេសការបង្កើនការផ្សព្វផ្សាយ និងត្រូវណែនាំដល់ប្រជាពលរដ្ឋយើងឲ្យចូលរួមចាក់វ៉ាក់សាំងការពារជំងឺកូវីដ-១៩ ឲ្យបាគ្រប់ៗគ្នា ស្របពេលដែរក្នុងខេត្តសៀមរាបបច្ចុប្បន្នកំពុងមានស្ថានភាពគួរឲ្យព្រួយបារម្ភ ហើយបណ្ដាសង្កាត់ក្នុងក្រុង និងឃុំមួយចំនួននៅតាមបណ្ដាស្រុកក្នុងខេត្ត ដែរកំពុងស្ថិតនៅក្នុងតំបន់បិទខ្ទប់ និងការពង្រឹងសុវត្ថិភាពចរាចរណ៍ផ្លូវគោក បញ្ហាផ្លូវថ្នល់ និង បញ្ហាស្លាកសញ្ញាចរាចរណ៍ផងដែរ៕
អត្ថបទ ៖ លោក អ៊ុន ណារាជ្យ
កែសម្រួលអត្ថបទ ៖ លោក លីវ សាន្ត
