ចាប់តាំងពីការរាតត្បាតជាសកលនូវជំងឺកូវីដ-១៩ ក្នុងអំឡុងចុងឆ្នាំ២០១៩ មកដល់បច្ចុប្បន្ននេះ បានធ្វើឲ្យបណ្ដាប្រទេសជាច្រើន លើសកលលោកជួបប្រទះនូវវិបត្តិធ្ងន់ធ្ងរទាំងសុខភាពសាធារណៈ និងសេដ្ឋកិច្ចសង្គម។ ជាក់ស្ដែងប្រទេសកម្ពុជា ក៏ជាប្រទេសមួយដែលបានទទួលរងនូវប៉ះពាល់នៃការរីករាលដាលនៃវីរុសកូវីដ-១៩ ហើយក៏បណ្ដាលឲ្យមានការរាំងស្ទះនូវសេដ្ឋកិច្ចជាតិ នាំឲ្យប៉ះពាល់យ៉ាងខ្លាំងដល់ជីវភាពរស់នៅប្រចាំថ្ងៃរបស់ប្រជាជនកម្ពុជាផងដែរ។
ទាក់ទងបញ្ហានេះលោកស្រី ទុយ លាំ អភិបាលរងស្រុកទទួលបន្ទុកកិច្ចការស្រ្តី និងកុមារស្រុកសូទ្រនិគម បានជំរុញឲ្យកសិករ បើទោះបីជាស្ថិតក្នុងបរិបទកូវីដ-១៩ ដែលធ្វើឲ្យមានការរាំងស្ទះដល់ការប្រកបរបរចិញ្ចឹមជីវិត របស់ប្រជាពលរដ្ឋទូទៅមួយចំនួនក៏ពិតមែន អាជ្ញាធរស្រុកសូទ្រនិគមតែងតែធ្វើការជំរុញលើកទឹកចិត្ត និងអំពាវនាវដល់ប្រជាពលរដ្ឋទូទៅ ជាពិសេសគឺស្រ្តី គួរតែងាកមកបង្កបង្កើនផល តាមរយៈការដាំដំណាំរួមផ្សំ និងចិញ្ចឹមសត្វ ដើម្បីរកប្រាក់ចំណូលបន្ថែមក្នុងគ្រួសារ ឬអាចកាត់បន្ថយការចំណាយប្រចាំថ្ងៃ ទន្ទឹមហ្នឹងប្រាក់ចំណូលត្រូវបានកាត់បន្ថយ ឬបាត់បង់ប្រាក់ចំណូលជាដើម ជាជាងរង់ចាំជំនួយឧបត្ថម្ភពីរាជរដ្ឋាភិបាល ក្នុងបរិបទកូវីដ-១៩ ដែលអាចជួយទ្រទ្រង់បានមួយរយៈពេលខ្លីតែប៉ុណ្ណោះ។
លោកស្រីអភិបាលរងស្រុក បញ្ជាក់ថា អាជ្ញាធរស្រុកតែងតែសហការណ៍ជាមួយអាជ្ញាធរមូលដ្ឋាន និងអង្គការដៃគូពាក់ព័ន្ធ ធ្វើការជួយបង្កើនសេដ្ឋកិច្ចដល់ស្រ្តីតាមរយៈការផ្ដល់ជំនាញវិជ្ជាជីវៈ និងការផ្ដល់ជាគ្រាប់ពូជផ្សេងៗ ដើម្បីធ្វើជាដើមទុនដែលអាចជួយសម្រួលដល់ជីវភាព ប្រចាំថ្ងៃរបស់ពួកគាត់។ លោកស្រីក៏សូមធ្វើការអំពាវនាវដល់ប្រជាពលរដ្ឋទាំង សូមកុំចាញ់បោកតាមមេខ្យល់ ធ្វើការចំណាកស្រុកដោយប្រថុយប្រថាន ដែលនាំឲ្យមានការខាតបង់ និងជួបបញ្ហាប្រឈមនានា ក្នុងបរិទនៃការឆ្លងរាលដាលនៃមេរោគកូវីដ-១៩នេះ ។
ព័ត៌មានជាតិ ថ្មីៗ
ជុំវិញបញ្ហានេះលោកស្រី ញាន ភួងម៉ាលី នាយិកាប្រតិបត្តិនៃអង្គការរចនាស្រ្តី និងជាប្រធានបណ្តាញសម្របសម្រួលអង្គការមិនមែនរដ្ឋាភិបាលប្រចាំខេត្តសៀមរាប បានឲ្យដឹងដែរថា ដើម្បីជាជំនួយដល់ការគាំទ្រផ្នែកសេដ្ឋកិច្ចដល់ប្រជាពលរដ្ឋទូទៅ ជាពិសេសស្រ្តី កន្លងមកអង្គការការរចនាស្រ្តី បានចងក្រងជាបណ្ដាញសហគមន៍ស្រ្តី ដែលជួយជំរុញឲ្យស្ដ្រីអាចធ្វើការសម្រេចចិត្តដោយខ្លួនឯង ក្នុងការប្រកបរបរ ចំណេះ ជំនាញ និងឱកាសណាមួយដែលជួយបង្កើនប្រាក់ចំណូល ដើម្បីអាចលើកស្ទួយសេដ្ឋកិច្ចគ្រួសារដោយខ្លួនឯង ដោយមិនពឹងផ្អែកលើស្វាមីតែមួយមុខ។
សូមរំលឹកថា ដើម្បីជួយសម្រួលនូវការលំបាករបស់ប្រជាពលរដ្ឋដែលរងផងប៉ះពាល់ក្នុងបរិបទកូវីដ-១៩ ចាប់ពីថ្ងៃទី២៥ ខែមិថុនា ឆ្នាំ២០២០ ដល់ថ្ងៃទី២៤ ខែកក្កដា ឆ្នាំ២០២១ រាជរដ្ឋាភិបាលតាមរយៈក្រសួងសង្គមកិច្ចអតីតយុទ្ធជន និងយុវនីតិសម្បទា បានឧបត្ថម្ភជាសាច់ប្រាក់ជូនពលរដ្ឋក្រីក្រ និងងាយរងគ្រោះក្នុងបរិបទកូវីដ-១៩ មានជិត៦៦ម៉ឺនគ្រួសារ ដែលត្រូវចំណាយប្រាក់អស់ជាង១១ម៉ឺនលានរៀល និងចំណាយលើការអន្តរាគមន៍អនុវត្តកម្មវិធីឧបត្ថម្ភសាច់ប្រាក់ជូនប្រជាជនក្រីក្រ និងងាយរងគ្រោះប្រមាណជាង១ពាន់៥រយ លានរៀលផងដែរ៕
អត្ថបទ៖ លោក ហែម បូរ៉ាន្នី
កែសម្រួល៖ លោក អ៊ុន ណារាជ្យ
