ប្រាសាទបាយក្អែក ដែរមានទីតាំងស្ថិតនៅប៉ែកខាងលិចនៃប្រាសាទអង្គរវត្ត ត្រូវបានក្រុមការងារជំនាញបាននឹងកំពុងធ្វើការជួសជុល និងរៀបចំឡើងវិញ ដើម្បីលើកកម្ពស់សោភ័ណភាពប្រាសាទ ទេសភាពវប្បធម៌ សំដៅរក្សាតុល្យភាពរវាងការងារអភិរក្ស និងការងារអភិវឌ្ឍន៍ប្រកបដោយចីរភាព។
លោក ស្រ៊ុន តិច បុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ បានឱ្យដឹងនៅថ្ងៃទី០៥ ខែសីហា ឆ្នាំ២០២១នេះថា ប្រាសាទបាយក្អែកបានដួលរលំទាំងស្រុង ដោយសារអាយុកាល អាកាសធាតុ សង្គ្រាម និងកត្តាមនុស្ស ទើបក្រុមអ្នកអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ នៃអាជ្ញាធរជាតិអប្សរាបានកំពុងដំណើការជួសជុលពង្រឹង និងលើកតម្លៃរចនាសម្ព័ន្ធប្រាសាទឡើងវិញ បានរយៈពេលប្រមាណ៥ខែមកហើយ គិតចាប់ពីខែកុម្ភះ ឆ្នាំ២០២១មក ហើយមកដល់ពេលនេះសម្រេចបានជាង៦០ភាគរយ នឹងគ្រោងបញ្ចប់ការជួសជុលនៅខែកញ្ញាខាងមុខនេះ។
លោក ស្រ៊ុន តិច បានបន្តថា ចំពោះដំណើរការជួសជុលពង្រឹងសំណង់នេះ ក្រុមការងារបច្ចេកទេសរបស់លោក គឺប្រកាន់យកគោលការណ៍អភិរក្ស គោរពតាមអនុសាសន៍របស់អ្នកជំនាញ អាយស៊ីស៊ីអង្គរ និងគោរពតាមធម្មនុញ្ញអង្គរ ក្នុងគោលដៅរក្សារូបរាង ឬទម្រង់ស្ថាបត្យកម្មដើមរបស់ប្រាសាទ។ ចំពោះការងារជួសជុលនេះដែរ ក្រុមការងារព្យាយាមប្រើប្រាស់ថ្មចាស់ៗឡើងវិញ ហើយជំនួសថ្មថ្មីក្នុងកម្រិត១០ទៅ១៥ភាគរយប៉ុណ្ណោះ។ ក្រៅពីការជួសជុលនៅប្រាសាទក្រុមការងារនឹងដាំដើមឈើ ដាំស្មៅ ស្តារស្រះ តាំងបង្ហាញប្រវត្តិប្រាសាទ និងលទ្ធផលបានពីកំណាយ រៀបចំទីតាំងនេះសម្រាប់ទាក់ទាញភ្ញៀវទេសចរមកទស្សនាសម្រាកកាយ និងការរៀបចំពិធីផ្សេងៗផងដែរ។
គួរឲ្យដឹងដែរថា ប្រាសាទបាយក្អែក ត្រូវបានអ្នកជំនាញសន្និដ្ឋានថា អាចសាងសង់ឡើងក្នុងសតវត្សទី១២ តាមរចនាបថបាយ័ន្ត ហើយនៅជុំវិញប្រាសាទជាទីសក្ការៈនេះ គឺសម្បូរទៅដោយទួលជាច្រើនដែលមនុស្សរស់នៅ ហើយប្រហែលជាអាចមានមនុស្សរស់នៅមុនមានប្រាសាទទៀត៕
អត្ថបទ និង រូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
