ដោយមើលឃើញចង្ហាន់របស់ព្រះសង្ឃដែលគង់ក្នុងវត្តអារាម ខណៈជំងឺកូវីដ-១៩ នៅតែបន្តឆ្លងរាលដាលជាបន្តបន្ទាប់ ទើបនៅថ្ងៃទី០៦ ខែសីហា ឆ្នាំ២០២១នេះ លោក សុខ តុញ បាននាំយកនូវអំណោយជាគ្រឿងឧបភោគបរិភោគមួយចំនួន របស់ឯកឧត្តមអ្នកឧកញ៉ា សៀង ណាំ អ្នកតំណាងរាស្ត្រសៀមរាប មកប្រគេនដល់ព្រះសង្ឃ ដែលគង់វត្តប្រាសាទគោកចក ស្ថិតក្នុងសង្កាត់គោកចក ក្រុងសៀមរាប ដែលកំពុងជួបនូវការខ្វះខាតក្នុងបរិបទជំងឺកូវីដ-១៩ ដោយអំណោយមាន៖អង្ករចំនួន១តោន និងត្រីខកំប៉ុងចំនួន ៤កេស។
ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក បានមានសង្ឃដីកាថា ស្ថិតក្នុងដំណាក់កាលមួយដែលព្រះសង្ឃមិនអាចនិមន្តបិណ្ឌបាតនៅក្រៅវត្តបាន ហើយពុទ្ធបរិស័ទក៏មិនសូវហ៊ានមកវត្ត ដោយសារប្រយ័ត្នប្រយែង និងការពារខ្លួនកុំឱ្យឆ្លងជំងឺកូវីដ-១៩ ហើយនៅពេលដែលពុទ្ធបរិស័ទមិនសូវមកវត្តធ្វើបុណ្យប្រគេន ចង្ហាន់ ឬទេយ្យទានច្រើនដូចមុនភាគច្រើនមកតែពេលថ្ងៃសីលបន្តិចបន្តួចតែប៉ុណ្ណោះ ហើយជីវភាពប្រចាំថ្ងៃរបស់ព្រះសង្ឃទាំងអស់ក៏ត្រូវសម្រួលបន្សាំទៅតាមសភាពការណ៍ផងដែរ។
គ្រូវិចិត្រវង្សា ហែម គឹមសាន្ត ក៍បានសម្ដែងនូវសេចក្ដីរីករាយក្រៃលែង ចំពោះឯកឧត្តមអ្នកឧកញ៉ា សៀង ណាំ ដែលបានប្រគេនទេយ្យវត្ថុដល់ព្រះសង្សនៅពេលនេះ ដែលបញ្ជាក់ឲ្យឃើញកាន់តែច្បាស់ ចំពោះទឹកចិត្តជ្រះថ្លារបស់ឯកឧត្តម ដែលបានចូលរួមដោយចិត្តជ្រះថ្លា ក្នុងការលើកកម្ពស់វិស័យពុទ្ធសាសនានៅគ្រប់កាលៈទេសៈ ជាពិសេសក្នុងអំឡុងពេលវិបត្តិ នៃជំងឺកូវីដ-១៩នេះ ដែលទីអារាមនានាក្នុងខេត្តសៀមរាប ពុំមានប្រារព្ធពិធីសាសនា លក្ខណៈទ្រង់ទ្រាយធំណាមួយឡើយ ដែលជាការចូលរួមគោរពតាមសេចក្ដីណែនាំ របស់រាជរដ្ឋាភិបាលកម្ពុជា ក៏ដូចជាក្រសួងសុខាភិបាល ដើម្បីបង្ការទប់ស្កាត់ការឆ្លងរីករាលដាលជំងឺកូវីដ-១៩ ។
ក្នុងនាមឯកឧត្តមអ្នកឧកញ៉ា សៀង ណាំ លោក សុខ តុញ បានមានប្រសាសន៍ថា ការអភិវឌ្ឍរបស់ប្រទេសកម្ពុជានាពេលបច្ចុប្បន្ននេះ មិនអាចកាត់ផ្តាច់ចេញពីវិស័យពុទ្ធសាសនាបាននោះឡើយ មានន័យថា ការអភិវឌ្ឍប្រកបដោយនិរន្តរភាព គឺផ្អែកទៅលើកត្តាដាក់ចេញនូវយុទ្ធសាស្ត្រចក្ខុវិស័យ និងគោលនយោបាយឈ្នះៗ ក្នុងនោះក៏ត្រូវមានការចូលរួមពីពុទ្ធសាសនាដោយបណ្ដុះសីលធម៌ សតិបញ្ញា ស្មារតីការគោរពដឹងគុណ និងការបណ្ដុះបណ្ដាលធនធានមនុស្សតាមបែបពុទ្ធសាសនា។ ក្រោមម្លប់សន្ដិភាពតាមរយ:នយោបាយឈ្នះៗ ការដឹកនាំប្រកបដោយគតិបណ្ឌិតរបស់សម្ដេចតេជោ នាយករដ្ឋមន្ត្រី ប្រទេសកម្ពុជាមានការអភិវឌ្ឍលើគ្រប់វិស័យទាំងផ្លូវពុទ្ធចក្រ និងអាណាចក្រ។ ជាមួយគ្នានោះដែរ លោកក៏សូមអំពាវនាវដល់ព្រះសង្ស និងពុទ្ធបរិស័ទគ្រប់មជ្ឈដ្ឋានសូមចូលរួមអនុវត្តតាមវិធានការរបស់រាជរដ្ឋាភិបាលកម្ពុជា គឺ ៣ការពារ ៣កុំ និងត្រូវតែបន្តបង្កើនការប្រុងប្រយ័ត្នខ្ពស់បន្ថែមទៀត ដោយចូលរួមអនុវត្តតាមសេចក្តីណែនាំរបស់ក្រសួងសុខាភិបាលឲ្យបានគ្រប់ៗគ្នា៕
អត្ថបទ និង រូបភាព៖ លោក ទ្រា ពន្លឺ
កែសម្រួល៖ លោក អ៊ុន ណារាជ្យ
