នៅថ្ងៃទី០៦ ខែសីហា ឆ្នាំ២០២១នេះ លោក ងួន មាន ប្រធានសមាគមចលនាយុវជនកម្ពុជា ស្រុកប្រាសាទបាគង តំណាងលោក ហ៊ុន ប៉ូគា ប្រធានសមាគមចលនាយុវជនកម្ពុជា ក្រុម១៥៧ សាខាខេត្តសៀមរាប បានដឹកនាំសមាជិកសមាជិកា នាំយកអំណោយមួយចំនួន ប្រគល់ជូនក្រុមគ្រូពេទ្យដែលកំពុងមមាញឹកក្នុងចុះចាក់វ៉ាក់សាំង ដូសទី២ ជូនប្រជាពលរដ្ឋ នៅកីឡាដ្ឋានសៀមរាប ក្នុងភូមិជ្រៃ ឃុំកណ្តែក ស្រុកប្រាសាទបាគង ខេត្តសៀមរាប ដោយអំណោយទាំងនោះមាន៖ ទឹកបរិសុទ្ធ ១០០យួរ ,មី ១០កេស ,ត្រីខ ៥យួរ ,ម៉ាស់ ១,២៥០ម៉ាស់ ,អាល់កុល ៣០លីត្រ ,ភេសជ្ជៈ ៥កេស ,នំដូណាត់ ១០០ និងនំបុ័ងចំនួន ១០០ផងដែរ។
មានប្រសាសន៍ក្នុងកាសនោះ លោក ងួន មាន បានលើកឡើងថា ប្រទេសកម្ពុជាក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន នាយកដ្ឋមន្ត្រី សម្ដេចបានខិតខំក្នុងការជួយសង្រ្គោះអាយុជីវិតប្រជាពលរដ្ឋកម្ពុជាឲ្យរួចផុតពីការលំបាក និងការរស់នៅប្រកបដោយសន្តិសុខ និងសេរីភាព ជាពិសេសការដឹកនាំប្រយុទ្ធប្រឆាំង និងទប់ស្កាត់ជំងឺកូវីដ-១៩ តាមរយៈការស្វែងរកវ៉ាក់សាំងមកពីបណ្តាប្រទេសនានា ក្នុងការយកមកចាក់ជូនប្រជាពលរដ្ឋ បានជាបន្តបន្ទាប់ដោយឥតគិតថ្លៃ។ ជាមួយគ្នានោះដែរ លោកក៏មានសេចក្ដីរីករាយ ដែរបានចូលរួមចំណែកជាមួយរដ្ឋាភិបាល ក៏ដូចជាអាជ្ញាធរខេត្ត និងក្រុមគ្រូពេទ្យបំពេញភារកិច្ចក្នុងយុទ្ធនាការចាក់វ៉ាក់សាំង ដូសទី២ ជូនប្រជាពលរដ្ធនៅខេត្តក្រុងសៀមរាបនាពេលនេះ។ ហើយចំពោះអំណោយនាពេលនេះវាតិចតួចក្ដី ក៏ប៉ុន្តែវាបានឆ្លុះបញ្ចាំងឱ្យឃើញអំពីការរួមសាមគ្គីគ្នា និងការយកចិត្តទុកដាក់ក្នុងចូលរួមជាមួយរាជរប្រជាដ្ឋាភិបាលកម្ពុជា ដើម្បីជួយដល់ពលរដ្ឋក្នុងកាលៈទេសៈដ៏លំបាកនេះ។
ក្នុងឱកាសនោះដែរលោក ក៍សូមអំពាវនាវដល់បងប្អូនប្រជាពលរដ្ឋទាំងអស់ ដែលបានមកធ្វើការចាក់វ៉ាក់សាំង សូមចូលរួមអនុវត្តរក្សាគម្លាត សណ្តាប់ធ្នាប់ សូមកុំប្រជៀត និងដណ្តើមគ្នា គឺត្រូវតែបន្តបង្កើនការប្រុងប្រយ័ត្នខ្ពស់ និងយកចិត្តទុកដាក់បន្ថែមទៀត ដោយចូលរួមអនុវត្តតាមវិធានការណែនាំ របស់ប្រមុខរាជរដ្ឋាភិបាល គឺ៣ការពារ ៣កុំ និងអនុវត្តសេចក្តីណែនាំរបស់ក្រសួងសុខាភិបាលឲ្យបានគ្រប់ៗគ្នា៕
