ដោយសារតែភាគគោកទឹកនារដូវប្រាំង ដែរធ្វើឲ្យជីវីតត្រីមេពូជជាច្រើនបានងាប់ ទើបបច្ចុប្បន្ននេះសហគមន៍ទេសចរណ៍ធម្មជាតិបឹងពារាំង បានសហការជាមួយអាជ្ញាធរខេត្ដសៀមរាប កំពុងដំណើរការការជីកស្ដារឡើងវិញ ដើម្បីធ្វើឲ្យបឹងធម្មជាតិជាប់បឹងទន្លេសាបមួយនេះ ឲ្យកាន់តែមានភាពទាក់ទាញដល់ភ្ញៀវទេសចរណ៍ និងដើម្បីស្ទុកទឹកទុកសម្រាបអភិរក្សត្រីពូជបន្ថែម។
បើតាមលោក គង់ មង្គល ប្រធានសហគមន៍ទេសចរណ៍ធម្មជាតិបឹងពារាំង បានឲ្យដឹងនៅរសៀលថ្ងៃទី០៥ ខែសីហា ឆ្នាំ២០២១នេះថា តំបន់ទេសចរណ៍បឹងពារាំង បានចាប់ផ្ដើមស្ដារយកអាចម៍ដីចេញជាបណ្ដើរៗហើយ ដើម្បីកែសម្រួលឲ្យទៅជាបឹងអភិរក្សត្រីពូជដ៍សំបូរបែប និងកែលំអរទៅជាកន្លែងទេសចរណ៍ដ៍ស្រស់ស្អាត សម្រាប់ទាក់ទាញអ្នកទេសចរណ៍បន្ថែមទៀត ក្រោយបញ្ចប់ជំងឺកូវីដ-១៩។ លោកថាបឹងធម្មជាតិមួយនេះ មានមច្ឆាជាតិ និងសត្វស្លាបរាប់រយប្រភេទ បាននឹងកំពុងរស់នៅ ខណៈដែលបច្ចុប្បន្ននេះទឹកបានគោករាក់បណ្ដាលឲ្យមច្ឆាជាតិជាច្រើនបានងាប់ដោយសារគ្មានទឹកគ្រប់គ្រាន់។
លោកប្រធានសហគមន៍ បានបញ្ជាក់ថា ដោយសារស្ថានភាពទឹកបឹងបានរីងជារៀងរាល់ឆ្នាំ ទើបសហគមន៍បានសុំការអនុញ្ញាតិច្បាប់ស្ដារយកអាចម៍ដីចេញទំហំជាង ១០០ហិកតា ជំរៅ៤ម៉ែត្រ ជាមួយនោះអាជ្ញាធរខេត្តអនុញ្ញាតឱ្យជីកស្ដារឡើងវិញ ៣០ហិកតាក្នុងមួយឆ្នាំ ប៉ុន្ដែជំហ៊ានទី១ ត្រូវជីកស្ដារ ១០ហិកតា ដោយមានជម្រៅពី៤ម៉ែត្រ ឡើងទៅ៨ម៉ែត្រ ដើម្បីធ្វើទីជម្រកត្រីពូជឲ្យរស់នៅក្នុងបឹងកាន់តែច្រើន ព្រមទាំងកែលម្អរបឹងឲ្យកាន់តែទាក់ទាញ ខណៈដែលបច្ចុប្បន្នមានអ្នកមកទស្សនាតិចតួច ដោយសារមិនទាន់រៀបចំអោយបានស្រស់ស្អាតនៅឡើយ។ ក្រោយពេលដែលបឹងនេះបានស្ដាររួចហើយ លោកសង្ឃឹមថា វានឹងធ្វើឲ្យមច្ឆាជាតិកាន់តែសំបូរជាមុន ជាពិសេសប្រភេទសត្វស្លាប និងសត្វស្វាជាច្រើនមករស់នៅធ្វើឲ្យអ្នកទេសចរណ៍ កាន់តែចាប់អារម្មណ៍មកទស្សនាកំសាន្ដនៅតំបន់នេះ ដើម្បីបង្កើនជីវភាពពលរដ្ឋក្នុងសហគមន៍ផងដែរ។
គួរឲ្យដឹងថា សហគមន៍ទេសចរណ៍ធម្មជាតិបឹងពារាំង គឺជាតំបន់ទេសចរណ៍ដ៏ទាក់ទាញមួយក្នុងខេត្តសៀមរាប តាមរយ:ទេសភាពព្រៃលិចទឹក ហ្វូងត្រីចម្រុះ ពិសេសជាងនេះទៅទៀតនោះ គឺប្រភេទសត្វស្លាបទឹកគ្រប់ប្រភេទដែលវារស់នៅក្នុងទឹកបឹងនោះ។ បឹងធម្មជាតិនេះដែរ មានទំហំប្រមាណជាង២៦០៧ហិកតា ប៉ុន្តែនៅរដូវប្រាំងផ្ទៃទឹកបង្រួមនៅសល់ត្រឹមតែជាង ២២៣ហិកតា ហើយបឹងនេះមានមានទីតាំងស្ថិតនៅសង្កាត់ជ្រាវ ក្រុងសៀមរាប ដែរមានចម្ងាយពីទីប្រជុំជននៃសង្កាត់ជ្រាវប្រមាណជាង ៦គីឡូម៉ែត្រ៕
អត្ថបទ និង រូបភាព៖ លោក ឈិត សាវី
កែសម្រួល៖ លោក អ៊ុន ណារាជ្យ
