ឯកឧត្ដមនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ និងជាប្រធានប្រតិបត្តិការចាក់វ៉ាក់សាំងការពារជំងឺកូវីដ-១៩ នៃក្រសួងការពារជាតិ បានមានប្រសាសន៍ថា បន្ទាប់ពីទទួលបានផែនការរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និង អនុសាសន៍រណែនារបស់សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ហើយដើម្បីសម្រេចបានតាមផែនការនេះ ក្រុមគ្រូពេទ្យទាំងអស់ នៃកងយោធពលខេមរភូមិន្ទ បានយកអស់កម្លាំងកាយ ចិត្ត ដោយស្មារតីទទួលខុសត្រូវ និង យកចិត្តទុកដាក់ខ្ពស់ ចំពោះការងារចាក់វ៉ាក់សាំងការពារជំងឺកូវីដ-១៩ ជូនបងប្អូនប្រជាពលរដ្ឋនៅក្នុងខេត្តសៀមរាប ដោយធ្វើយ៉ាងណាឱ្យបងប្អូនប្រជាពលរដ្ឋទទួលបានវ៉ាក់សាំងការពារជំងឺកូវីដ-១៩នេះ ដែលសម្រេចបានលទ្ធផលល្អប្រសើរ ។
ឯកឧត្ដមនាយឧត្តមសេនីយ៍ ឥត សារ៉ាត់ មានប្រសាសន៍យ៉ាងដូច្នេះ ក្នុងឱកាសដឹកនាំក្រុមមគ្រូពេទ្យកងយោធពលខេមរភូមិន្ទ អមដំណើរដោយមេបញ្ជាការរងកងទ័ពជើងគោក និងជាមេបញ្ជាការយោធភូមិភាគទី៤ និងលោកស្រី យូ សុភា អភិបាលរងខេត្ដសៀមរាប ចុះត្រួតពិនិត្យការចាក់វ៉ាក់សាំងការពារជំងឺកូវីដ-១៩ ជូនពលរដ្ឋនៅក្នុងស្រុកប្រាសាទបាគង កាលពីព្រឹកថ្ងៃទី១១ ខែសីហា ឆ្នាំ២០២១នេះ ។
ឯកឧត្ដមនាយឧត្តមសេនីយ៍ ឥត សារ៉ាត់ មានប្រសាសន៍បន្ថែមថា ក្នុងនាមថ្នាក់ដឹកនាំក្រសួងការពារជាតិ សូមសម្ដែងនូវការកោតសរសើរ និងអររគុណចំពោះក្រុមគ្រូពេទ្យទាំងអស់នៃកងយោធពលខេមរភូមិន្ទ ដែលបានខិតខំប្រឹងប្រែងអស់ពីកម្លាំងកាយចិត្ដ ដោយធ្វើការងារជាប់ជាប្រចាំមិនមានពេលសម្រាកនោះឡើយ ដូចជាចាក់ចប់ដូសទី១ ហើយបន្តចាក់ដូសទី២ ជូនប្រជាពលរដ្ឋទៀតភ្លាមៗ ដែលអាចមើលឃើញថា ក្រុមគ្រូពេទ្យយើងធ្វើការបានរហ័ស ដើម្បីចាក់វ៉ាក់សាំងជូនប្រជាពលរដ្ឋ សម្រាប់ជួយការពារមេរោគកូវីដ-១៩ បានកំពុងតែរាតត្បាតខ្លាំងក្នុងសង្គមជាតិរបស់យើង ដូច្នេះក្នុងឱកាសនេះ សូមសំណូមពរដល់ក្រុមការងារទាំងអស់ ត្រូវប្រកាន់ខ្ជាប់នូវស្មារតីយកចិត្តទុកដាក់លើការងារចាក់វ៉ាក់សាំងនេះឱ្យបានខ្ពស់បន្ថែមទៀត ដើម្បីឱ្យសម្រេចបានតាមផែនការកំណត់ នៃចាក់វ៉ាក់សាំងការពារជំងឺកូវីដ-១៩ របស់រាជរដ្ឋាភិបាល ប្រកបដោយប្រសិទ្ធភាពខ្ពស់ ។
គួររំលឹកថា នៅថ្ងៃ១១ ខែសីហា ឆ្នាំ២០២១នេះ នាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកងយោធពលខេមរភូមិន្ទ និងជាប្រធានប្រតិបត្តិការចាក់វ៉ាក់សាំងកូវីដ-១៩ ក្រសួងការពារជាតិ និង ប្រតិភូអមដំណើរ បានធ្វើដំណើរកាន់ខេត្តសៀមរាប ដើម្បីពិនិត្យដំណើរការចាក់វ៉ាក់សាំងការពារជំងឺកូវីដ-១៩ ខណៈបច្ចុប្បន្នក្រុមការងារកងទ័ព កំពុងបន្តចាក់ដូសទី២ និងការចាក់ដូសទី៣ ជូនដល់កម្លាំងជួរមុខផងដែរ ។
ខេត្តសៀមរាប គឺជាខេត្តមួយក្នុងចំណោមខេត្តទាំង៨ ក្នុងនោះមាន ៖ ខេត្តសៀមរាប , បន្ទាយមានជ័យ , កំពង់ចាម , ស្វាយរៀង , ព្រះសីហនុ, កោះកុង, កំពង់ស្ពឺ និង ខេត្តតាកែវ ដែលទទួលរ៉ាប់រងនៃការចាក់វ៉ាក់សាំង ដោយក្រុមការងារចាក់វ៉ាក់សាំងការពារជំងឺកូវីដ-១៩ របស់ក្រសួងការពារជាតិ ខណៈខេត្តសៀមរាប មានប្រជាពលរដ្ឋដែលត្រូវចាក់វ៉ាក់សាំងចំនួនជាង ៤៥ម៉ឺននាក់ ហើយប្រជាពលរដ្ឋទាំងអស់នេះ បានចាក់វ៉ាក់សាំងដូសទី១រួចរាល់ ហើយកំពុងបន្តចាក់ដូសទី២ទៀត ៕
អត្ថបទ និង រូបភាព៖ លោក ឈិត សាវី
កែសម្រួល៖ លោក លីវ សាន្ត
