ដើមី្បចូលរួមជាមួយរាជរដ្ឋាភិបាល ក៏ដូចជាភាពចាំបាច់របស់រដ្ឋបាលខេត្តសៀមរាប នៅព្រឹកថ្ងៃទី១២ ខែសីហា ឆ្នាំ២០២១នេះ សាខាសមាគមសហគ្រិនវ័យក្មេងកម្ពុជា ខេត្តសៀមរាប បាននាំយកប៉ៅអ៊ីចល័ត ចំនួន៣០ មកប្រគល់ជូនរដ្ឋបាលខេត្តសៀមរាប ក្នុងការចូលរួមប្រយុទ្ធប្រឆាំង និងកាត់ផ្តាច់ខ្សែចម្លងជំងឺកូវីដ-១៩ ក្រោមវត្តមានលោក ពិន ប្រាកដ អភិបាលរងខេត្ត តំណាងឯកឧត្តម ទៀ សីហា អភិបាលនៃគណៈអភិបាលខេត្តសៀមរាប។
ក្នុងនាមអាជ្ញាធរខេត្ត លោក ពិន ប្រាកដ បានធ្វើការថ្លែងអំណរគុណដល់ទឹកចិត្តដ៏សប្បុរសធម៌ របស់សាខាសមាគមសហគ្រឹនវ័យក្មេងកម្ពុជាខេត្ត ដែលបានផ្តល់ជូននូវសម្ភារៈ ក្នុងកិច្ចបម្រើដល់យុទ្ធនាការប្រយុទ្ធប្រឆាំងបង្កា ទប់ស្កាត់ជំងឺកូវីដ-១៩ ដល់រដ្ឋបាលខេត្តសៀមរាប សំខាន់សម្រាប់យកទៅប្រើប្រាស់នៅតាមមណ្ឌលចត្តាឡីស័ក ទាំងអស់ក្នុងខេត្ត។ ជាមួយនោះស្របពេលដែលកម្ពុជាយើងបាននឹកកំពុងជួបនូវវិបត្តិជំងឺកូវីដ-១៩ ក្នុងព្រឹត្តការណ៍សហគមន៍ ២០កុម្ភះ ២០២១នេះដែរ អាជ្ញាធរខេត្ត បានកំពុងមមាញឹកក្នុងការពង្រីកបន្ថែមនូវមណ្ឌលចត្តាឡីស័កជាច្រើនកន្លែង ក្នុងការទទួលបងប្អូនធ្វើចំណាកស្រុកមកពីក្រៅប្រទេស ព្រមទាំងទីកន្លែងសម្រាប់ធ្វើការព្យាបាល អ្នកវិជ្ជមានជំងឺកូវីដ-១៩។ លោកក៏បានសំណូមពរ ដល់ក្រុមហ៊ុនក៏ដូចសប្បុរសជនផ្សេងៗទៀត សូមបន្តនូវប្រពៃណីវប្បធម៌ចែករំលែកនេះ ទៅតាមបណ្តាក្រុង/ស្រុកទៀតផងដែរ។
លោកអភិបាលរងខេត្ត ក៏បានឲ្យដឹងផងដែរថា ក្នុងជំហានទី២ នៃការចាក់វ៉ាក់សាំងការពារជំងឺកូវីដ-១៩ ជូនប្រជាពលរដ្ឋនៅខេត្តសៀមរាប បានបន្តចាក់វ៉ាក់សាំងនូវដូសទី២ ជូនប្រជាពលរដ្ឋក្នុងក្រុង/ស្រុកទាំង១២របស់ខេត្តហើយ។ ជាមួយគ្នានេះដែរចំពោះសម្ភារៈទាំងនេះ អាជ្ញាធរខេត្តនឹងបន្តយកទៅដាក់សម្រាប់ប្រើប្រាស់នៅតាមមណ្ឌលក្នុងក្រុង និងតាមបណ្តាស្រុក។ ក្នុងនោះលោកក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ សំខាន់នៅខេត្តសៀមរាប សូមបងប្អូនត្រូវចូលរួមសហការអនុវត្តវិធានការណ៍របស់ រាជរដ្ឋាភិបាល ៣កុំ ៣ការពារ ឲ្យមានប្រសិទ្ធភាពខ្ពស់បំផុត និងបន្តប្រកាន់នូវវិធានសុខាភិបាលឲ្យបានខ្ជាប់ខ្ជួនទៀតផងដែរ៕
