អាជ្ញាធរជាតិអប្សរា និងគ្រឹះស្ថានអង្គរ នៅព្រឹកថ្ងៃទី១២ ខែសីហា ឆ្នាំ២០២១នេះ បានសម្រេចបន្តបិទការចូលទស្សនាប្រាសាទនានា និងផ្អាកការលក់សំបុត្រការចូលទស្សនា ក្នុងរមណីយដ្ឋានអង្គរបណ្ដោះអាសន្នរយៈពេល៧បន្ថែមទៀត គិតចាប់ពីថ្ងៃទី១៣ ដល់ថ្ងៃទី១៩ ខែសីហា ឆ្នាំ២០២១ ដើម្បីបន្តចូលរួមទប់ស្ដាត់ការឆ្លងរីករាលដាលក្នុងសហគមន៍នៃវីរុសកូវីដ-១៩ ប្រភេទ ដែលតា (Delta) ដែលកំពុងមានការឆ្លងរាលដាលនៅក្នុងប្រទេសកម្ពុជា ក៏ដូចជាខេត្តសៀមរាប។
ក្នុងសេចក្ដីជូនដំណឹងខាងលើនេះដែរ បានបញ្ជាក់ថា ការសម្រេចបិទមិនឲ្យភ្ញៀវទេសចរចូលទស្សនាប្រាសាទនានានៅក្នុងតំបន់អង្គរនេះធ្វើឡើងបន្ទាប់ពីរាជរដ្ឋាភិបាលកម្ពុជា កាលពីថ្ងៃទី១១ ខែសីហា ឆ្នាំ២០២១ បានចេញសេចក្ដីសម្រេចស្តីពីការបន្តអនុវត្តយុទ្ធនាការពង្រឹងវិធានការប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ ជាពិសេសការឆ្លងរីករាលដាលក្នុងសហគមន៍នៃវីរុសកូវីដ-១៩ ប្រភេទ ដែលតា (Delta) នៅក្នុងសហគមន៍ និងនាំចូលពីក្រៅប្រទេសផងដែរ។
សូមរំលឹកថា កាលពីថ្ងៃទី៣០ ខែកក្កដា ឆ្នាំ២០២១ កន្លងទៅនេះ អាជ្ញាធរជាតិអប្សរា និងគ្រឹះស្ថានអង្គរ បានប្រកាសបិទរមណីយដ្ឋានអង្គររយៈពេល២សប្តាហ៍ម្តងរួចមួយហើយ ដែលការសម្រេចលើកនោះក៏អនុលោមទៅតាមសេចក្តីសម្រេចរបស់រាជរដ្ឋាភិបាលស្តីពីការបិទខ្ទប់ខេត្តជាប់ព្រំប្រទល់ប្រទេសថៃ និងខេត្តសៀមរាប ដើម្បីទប់ស្កាត់ការឆ្លងរាលដាលមេរោគកូវីដ-១៩ ប្រភេទ ដែលតា។ ជាមួយនោះគិតចាប់ពីថ្ងៃទី៣១ ខែមីនា ឆ្នាំ២០២១ ដល់ថ្ងៃទី១០ ខែសីហា ឆ្នាំ២០២១ កម្ពុជាបានរកឃើញអ្នកមានវិជ្ជមានវីរុសកូវីដ១៩ ប្រភេទ ដែលតា ( Delta ) សរុបទាំងអស់ចំនួន ៤២៦នាក់ ក្នុងនោះស្ត្រី ២០៩នាក់ ដែរជាករណីរកឃើញនៅលើប្រជាពលរដ្ឋត្រឡបមកពីប្រទេសថៃ ប្រទេសវៀតណាម អ្នកដំណើរមកតាមជើងហោះហើរ បុគ្គលិកសុខាភិបាល មន្ត្រីរាជការ និងប្រជាពលរដ្ឋនៅក្នុងសហគមន៍ ដែរវាជាបញ្ហាបង្កឱ្យមានការព្រួយបារម្ភ ដោយសារតែវីរុសដែលតានេះ៕
អត្ថបទ និង រូបភាព៖ លោក ជា ស្រស់
