នៅថ្ងៃទី១២ ខែសីហា ឆ្នាំ២០២១នេះ រដ្ឋបាលស្រុកប្រាសាទបាគង បានទទួលអំណោយពីប្រធាន និងអនុប្រធានក្រុមការងាររាជរដ្ឋាភិបាល ចុះមូលដ្ឋានស្រុកប្រាសាទបាគង ខេត្តសៀមរាប ដើម្បីបន្តចែកជូនដល់ប្រជាពលរដ្ឋដែលកំពុងធ្វើចត្តាឡីស័កនៅក្នុងមូលដ្ឋានស្រុកប្រាសាទបាគង ដោយអំណោយមាន៖ អង្ករចំនួន ៤,០០០គីឡូក្រាម ,មីចំនួន៥០កេស និងម៉ាស់១០០ប្រអប់។
ក្នុងឱកាសនោះ លោក សូរ ប្លាតុង អភិបាលស្រុកប្រាសាទបាគង បានធ្វើការថ្លែងអំណរគុណដល់ទឹកចិត្តដ៏សប្បុរសធម៌ របស់ឧត្តមស៊ុ សំណាង ប្រធានក្រុមការងាររាជរដ្ឋាភិបាល និងឯកឧត្តម ទេព សំអាន អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកប្រាសាទបាគង ខេត្តសៀមរាប ដែលបានផ្តល់អំណោយជាសម្ភារៈ និងគ្រឿងឧបភោគបរិភោគជូនរដ្ឋបាលស្រុកនាពេលនេះ សម្រាប់យកទៅប្រើប្រាស់ និងចែកជូនដល់ប្រជាពលរដ្ឋដែលកំពុងធ្វើចត្តាឡីស័កទាំងអស់ក្នុងស្រុក ខណៈស្ថានភាពជំងឺកូវីដ-១៩ ក្នុងស្រុកនេះនៅតែបន្តកើនឡើង។
លោកអភិបាលស្រុកបន្តថា ចំពោះអំណោយទាំងនេះ អាជ្ញាធរស្រុកនឹងបន្តយកទៅផ្គត់ផ្គងប្រជាពលរដ្ឋដែលកំពុងធ្វើចត្តាឡីស័កនៅមណ្ឌលក្នុងបន្ថែមទៀត។ ជាមួយនោះលោកក៏បានធ្វើការអំពាវនាវដល់បងប្អូនប្រជាពលរដ្ឋទាំងអស់ សំខាន់នៅក្នុងស្រុកប្រាសាទបាគងទាំងអស់ សូមបងប្អូនត្រូវចូលរួមសហការអនុវត្តវិធានការណ៍របស់ រាជរដ្ឋាភិបាល ៣កុំ ៣ការពារ ឲ្យមានប្រសិទ្ធភាពខ្ពស់បំផុត និងបន្តប្រកាន់នូវវិធានសុខាភិបាលឲ្យបានខ្ជាប់ខ្ជួនទៀតផងដែរ៕
