នៅព្រឹកថ្ងៃទី២០ ខែសីហា ឆ្នាំ២០២១ លោក Liu Zhijie ប្រធានអគ្គស្ថានកុងស៊ុលចិនប្រចាំខេត្តសៀមរាប បាននាំយកសម្ភារប្រើប្រាស់សម្រាប់ការពារជំងឺកូវីដ-១៩ រួមមាន ៖ ឧបករណ៍ចម្រោះអុកស៊ីហ្សែនចំនួន៣គ្រឿង , អាវពេទ្យចំនួន១៨អាវ និងម៉ាសចំនួន៧២០ ប្រគល់ជូនរដ្ឋបាលខេត្តសៀមរាប ក្រោមវត្តមានលោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប ក្នុងគោលបំណងចូលរួមចំណែកជាមួយរាជរដ្ឋាភិបាល ជាពិសេសរដ្ឋបាលខេត្តទាំងនេះ ដើម្បីយកទៅផ្តល់មន្ទីរសុខាភិបាលនិងមន្ត្រីសុខាភិបាលជួរមុខ ។
មានប្រសាសន៍ក្នុងឱកាសនោះ លោក ពិន ប្រាកដ អភិបាលរងខេត្ត បានថ្លែងនូវអំណរគុណចំពោះលោកប្រធានអគ្គកុងស៊ុលចិន ដែលតែងតែជួយនិងផ្តល់សម្ភារ ដើម្បីចូលរួមចំណែកក្នុងការទប់ស្កាត់ជំងឺកូវីដ-១៩ដែលកំពុងតែឆ្លងក្នុងសហគមន៍នៃព្រឹត្តិការណ៍ ២០ កុម្ភៈនេះ ដែលកាយវិការមនុស្សធម៌នាពេលនេះ គឺបានបង្ហាញពីទឹកចិត្តយ៉ាងល្អប្រពៃ ជាវប្បធម៌នៃការចែករំលែក ចេះជួយគ្នាក្នុងគ្រាដែលជួបទុក្ខលំបាក និងជាការជួយទាន់ពេលវេលា និងចំគោលដៅ ហើយសកម្មភាពនេះ ជាការចូលរួមចំណែកយ៉ាងសកម្មជាមួយរដ្ឋបាលខេត្តសៀមរាប ក៏ដូចជារាជរដ្ឋាភិបាល ក្នុងការងារមនុស្សធម៌ និងការងារប្រយុទ្ធប្រឆាំង និងទប់ស្កាត់ជំងឺកូវីដ១៩ ។
លោក លោក ពិន ប្រាកដ មានប្រសាសន៍ទៀតថា អាជ្ញាធរខេត្តសៀមរាប ក្រោមការដឹកនាំរបស់ឯកឧត្តម ទៀ សីហា អភិបាលខេត្ត បានយកចិត្តទុកដាក់ គិតគូរពីសុខទុក្ខបងប្អូនប្រជាពលរដ្ឋគ្រប់ទីកន្លែង និងខិតខំប្រឹងប្រែងពន្យល់ណែនាំអប់រំជារឿយៗ នូវវិធីសាស្ត្រ និងការណែនាំនានារបស់ក្រសួងសុខាភិបាល ក៍ដូចជាវិធានការផ្សេងៗរបស់រាជរដ្ឋាភិបាល ពិសេសវិធានការ ៣ការពារ និង៣កុំ សម្រាប់ប្រយុទ្ឋប្រឆាំងជាមួយនឹងជំងឺកូវីដ-១៩ ដែលជាក់ស្តែងបច្ចុប្បន្ននេះ រដ្ឋបាលខេត្តសៀមរាប បាននឹងកំពុងយកចិត្តទុកដាក់អនុវត្តវិធានការបង្ការទប់ស្កាត់ការឆ្លងរីករាលដាលជំងឺកូវីដ- ១៩ ចូលក្នុងសហគមន៍ បានយ៉ាងល្អប្រសើរ ។
លោកអភិបាលរងខេត្តសៀមរាប មានប្រសាសន៍បន្ថែមទៀតថា ការប្រយុទ្ធប្រឆាំង និងការបង្ការទប់ស្កាត់ជំងឺកូវីដ-១៩ គឺជាបញ្ហារួមរបស់យើងទាំងអស់គ្នា មិនមែនជាបញ្ហារបស់បុគ្គលណាម្នាក់ឡើយ មានទាំងថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ ព្រះសង្ឃ និង ប្រជាពលរដ្ឋទូទៅ ដែលត្រូវតែចូលរួមទាំងអស់គ្នា ខណៈបច្ចុប្បន្ននេះ ជំងឺនេះបាននឹងកំពុងបន្តតាមយាយីដល់សុខភាពរបស់មនុស្សនៅទូទាំងពិភពលោកនៅឡើយ ដូច្នេះត្រូវគោរពប្រតិបត្តិឲ្យបានខ្ជាប់ខ្ជួននូវវិធានការ របស់ប្រមុខរាជរដ្ឋាភិបាល គឺ៣កុំ ៣ការពារ ។
គួររំលឹកថា ជាមួយនឹងផ្ដល់សម្ភារប្រើប្រាស់សម្រាប់ការពារជំងឺកូវីដ-១៩ ពីអគ្គកុងស៊ុលចិនប្រចាំខេត្តសៀមរាប ជូនដល់រដ្ឋបាលខេត្តសៀមរាបនោះ អគ្គកុងស៊ុលចិនប្រចាំខេត្តសៀមរាប ក៏បានផ្ដល់សម្ភារប្រើប្រាស់សម្រាប់ការពារជំងឺកូវីដ-១៩ ដូចគ្នា ជូនរដ្ឋបាលខេត្តចំនួន ០៤ទៀត រួមមាន ៖ ខេត្តបាត់ដំបង , ខេត្តឧត្តរមានជ័យ , ខេត្តបន្ទាយមានជ័យ និងខេត្តកំពង់ធំ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
