នៅថ្ងៃទី២៧ ខែសីហា ឆ្នាំ២០២១ ឯកឧត្តម ប៊ុន ថាឫទ្ធិ អនុប្រធានកិត្តិយសសាខាកាកបាទក្រហមកម្ពុជាខេត្តសៀមរាប និងសហការី បាននាំយកទេយ្យទានមួយចំនួនប្រគេនដល់ព្រះចៅអធិការនៅតាមវត្តចំនួន៣បន្ថែមទៀត ក្នុងក្រុងសៀមរាប រួមមាន៖ វត្តគង់ម៉ុច, វត្តដំណាក់ និងវត្តប្រាសាទត្រាំនាគ។ ទេយ្យទានដែលបានប្រគេនចំពោះព្រះសង្ឃនាឱកាសនេះ ក្នុងមួយវត្តទទួលបាន៖ ទៀនវស្សា១គូរ, អង្ករ១៥០គីឡូក្រាម, មី១០កេស, ត្រីខ១០យួរ, ត្រងៀត៣គីឡូក្រាម, សាច់ក្រក៣គីឡូក្រាម, ទឹកត្រី៥យួរ, ទឹកស៊ីអ៊ីវ៥យួរ, ទឹកបរិសុទ្ធ១០យួរ, ប្រេងឆា៥លីត្រ, ម្សៅស៊ុបខ្ន៣គីឡូក្រាម, មីសួ៣គីឡូក្រាម, ស្ករស៣គីឡូក្រាម, អំបិល២គីឡូក្រាម, តែ១គីឡូក្រាម, នំធុង១ធុង, ម៉ាស់៣ប្រអប់, អាស់កុល៤ដប, ចង្ហាន់១ស្រាក់ និងបច្ច័យ ៨សែនរៀល។
មានប្រសាសន៍ក្នុងឱនោះ ឯកឧត្តម ប៊ុន ថាឫទ្ធិ បានពាំនាំនូការទូលសួរសុខទុក្ខពីសំណាក់ឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត ដែលឯកឧត្ដមតែងតែមានការព្រួយបារម្ភចំពោះព្រះសង្ឃគ្រប់អង្គ និងប្រជាពលរដ្ឋគ្រប់រូប ដែលកំពុងទទួលរងគ្រោះដោយសារការឆ្លងរាត្បាតជាសកលនៃជំងឺកូវីដ-១៩ ខណៈនៅខេត្តសៀមរាបជំងឺកូវីដ-១៩នេះ កំពុងកើតមានឡើងជារៀងរាល់ថ្ងៃ ដូច្នេះការប្រគេនទេយ្យទានដល់ព្រះចៅអធិការនៅតាមបណ្ដាវត្តនាពេលនេះ គឺជាការយកចិត្តទុកដាក់គិតគូរ និងមើលឃើញពីការខ្វះខាតចង្ហាន់សម្រាប់ព្រះសង្ឃ នៅតាមបណ្ដាវត្តមួយចំនួន ពីសំណាក់ឯកឧត្តម ទៀ សីហា ដើម្បីអាចជួយសម្រួល និងដោះស្រាយការលំបាកបានមួយគ្រាផងដែរ។
ជាមួយគ្នានេះដែរ ឯកឧត្តមអនុប្រធានកិត្តិយសសាខា ក៏បានពាំនាំនូវប្រសាសន៍ផ្ដាផ្ញើរបស់ឯកឧត្តម ទៀ សីហា ប្រគេនដល់ព្រះសង្ឃគ្រប់អង្គ ជួយបន្តផ្សព្វផ្សាយដល់ប្រជាពុទ្ធបរិស័ទចំណុះជើងវត្តទាំងអស់ ត្រូវយកចិត្តទុកដាក់ក្នុងការទប់ស្កាត់ និង ការពារការឆ្លងរាលដាលជំងឺកូវីដ-១៩ ដោយអនុវត្តបានត្រឹមត្រូវនូវការណែនាំរបស់ក្រសួងសុខាភិបាល និងវិធានការរបស់រាជរដ្ឋាភិបាល ៣កុំ និង៣ការពារ ឲ្យបានខ្ជាប់ខ្ជួន៕
អត្ថបទ និង រូបភាព៖ លោក ខេង ឧត្តម
