នៅថ្ងៃទី២៩ ខែសីហា ឆ្នាំ២០២១នេះ ឯកឧត្ដមឧត្តមសេនីយ៍ឯក ពៅ ស៊ា នាយកមជ្ឈមណ្ឌលអភិវឌ្ឍន៍យោធិនពិការសម្តេចតេជោ ហ៊ុន សែន គូលែន៣១៧សៀមរាប បានទទួលផ្លែមៀននិងផ្លែតាង៉ែន ដែលជាអំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តាមរយៈឯកឧត្ដមឧត្តមសេនីយ៍ឯក គង់ ប៊ុនលី មេបញ្ជាការរងកងអង្គរក្ស។
ឯកឧត្ដមឧត្តមសេនីយ៍ឯក គង់ ប៊ុនលី មានប្រសាសន៍ថា ស្ថិតក្នុងកាលៈទេសៈណាក៏ដោយ សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន តែងតែបានគិតដល់ពីផលលំបាករបស់ប្រជាពលរដ្ឋកម្ពុជាគ្រប់វិនាទី សំខាន់ក្នុងពេលជួបនូវវិបត្តិកូវីដ-១៩ ព្រមទាំងការកកស្ទះនូវផលកសិកម្មរបស់ប្រជាកសិករក្នុងការនាំចេញ ជាពិសេសផ្លែមៀននិងផ្លែតាង៉ែននេះ ដូច្នេះហើយសម្តេចបានប្រមូលទិញផ្លែមៀន និងតាង៉ែនពីប្រជាកសិករដែលដាំបាននៅតាមបណ្ដាខេត្តជាប់ព្រំដែនកម្ពុជា-ថៃ ដើម្បីជួយសម្រាលបន្ទុកការលំបាក របស់បងប្អូនប្រជាកសិករយើង ក្នុងបរិបទដែលទទួលរងផលប៉ះពាល់ជាសកល ដោយសារការឆ្លងរីករាលដាលនៃមេរោគកូវីដ-១៩ និងផ្ដល់ជូនកងកម្លាំងប្រដាប់អាវុធ ក្រុមគ្រូពេទ្យចាក់វ៉ាក់សាំងប្រឆាំងមេរោគកូវីដ-១៩ និងបងប្អូន ដែលមានជំងឺព្រមទាំងបងប្អូនមន្ត្រីរាជការបានពិសារផងដែរ។
ក្នុងនាមតំណាងយោធិនពិការនៃមជ្ឈមណ្ឌល ឯកឧត្ដមឧត្តមសេនីយ៍ឯក ពៅ ស៊ា បានធ្វើការថ្លែអំណរគុណយ៉ាងជ្រាលជ្រៅបំផុត ចំពោះសម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែយកចិត្តទុកដាក់ដោះស្រាយនូវរាល់ផលលំបាករបស់ប្រជាពលរដ្ឋគ្រប់កាលៈទេសៈ ហើយជាក់ស្តែងថ្ងៃនេះ សម្តេចតេជោនាយករដ្ឋមន្ត្រី បានចាត់តំណាងនាំយកផ្លែមៀននិងផ្លែតាង៉ែនចំនួន៣តោន សម្រាប់ផ្តល់ជូនយោធិន និងគ្រួសារចំនួន៣១០គ្រួសារ ដែលកំពុងរស់នៅក្នុងមជ្ឈមណ្ឌលអភិវឌ្ឍន៍យោធិនពិការសម្តេចតេជោ ហ៊ុន សែន គូលែន៣១៧សៀមរាបនេះ។
ព័ត៌មានជាតិ ថ្មីៗ
ឯកឧត្ដមឧត្តមសេនីយ៍ឯក ពៅ ស៊ា បានបញ្ជាក់ទៀតថា សកម្មភាពទាំងនេះ ជាការបង្ហាញពីការយកចិត្តទុកដាក់ខ្ពស់របស់សម្តេចទាំងពីរ ចំពោះផលិតផលកសិកម្មដែលប្រជាកសិករផលិតបាន ជាវិធីដោះស្រាយជួយទៅដល់កសិករក្រីក្រក្នុងកាលៈទេសៈដ៏លំបាកដោយសារវិបត្តិនៃជំងឺកូវីដ-១៩ ដូច្នេះក្នុងឱកាសនេះ សូមបួងសួងដល់វត្ថុស័ក្តិសិទ្ធ និងបារមីនៅលើទឹកដីអង្គរ តាមថែរក្សាជូនដល់សម្តេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងបុត្រាបុត្រី និងចៅប្រុសចៅស្រី សូមជួបប្រទះតែនឹងពុទ្ធពរបួនប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
អត្ថបទ និង រូបថត ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
