នៅថ្ងៃទី២៩ ខែសីហា ឆ្នាំ២០២១ លោកស្រី សួន មុលឡា ប្រធានសមាគមចលនាយុវជនកម្ពុជា ក្រុម១៥៧ សាខាក្រុងសៀមរាប តំណាងលោក ហ៊ុន ប៉ូគា ប្រធានសាខាខេត្តសៀមរាប រួមនឹងក្រុមការងារបាននាំយកអំណោយជាសម្ភារៈប្រើប្រាស់មួយចំនួនមកប្រគល់ជូនដល់មណ្ឌលកុមារកំព្រាខេត្តសៀមរាប ស្ថិតនៅភូមិជ័យ សង្កាត់ទឹកវិល ក្រុង/ខេត្តសៀមរាប។
លោកស្រី សួន មុលឡា មានប្រសាសន៍ថា សម្ភារៈប្រើប្រាស់ទាំងនេះ គឺបានមកពីការចូលរួមរបស់សមាជិកសមាជិកាសមាគមចលនាយុវជនកម្ពុជា ក្រុម១៥៧ ដែលបានបរិច្ចាគធនធានថវិកាផ្ទាល់ខ្លួន ដើម្បីចូលរួមគ្នាក្នុងការទិញនូវសម្ភារៈប្រើប្រាស់ មកប្រគល់ជូនមណ្ឌលកុមារសម្រាប់ប្រើប្រាស់ទៅតាមតម្រូវការចាំបាច់ ជាពិសេសស្ថិតក្នុងការលំបាកនៅក្នុងបរិបទនៃជំងឺកូវីដ-១៩ ។ ជាមួយគ្នានោះសូមអំពាវនាវដល់ប្អូនៗនៅក្នុងមណ្ឌល និងបងប្អូនប្រជាពលរដ្ឋទាំងអស់ ត្រូវយកចិត្តទុកដាក់ឲ្យបានខ្ពស់បន្ថែមទៀត ក្នុងការធ្វើអនាម័យជាប្រចាំ ដើម្បីការពារខ្លួនយើង ក្រុមគ្រួសារយើង ក៏ដូចជាសង្គមជាតិទាំងមូល ដោយត្រូវអនុវត្តជាប្រចាំនូវវិធានការរបស់រាជរដ្ឋាភិបាល គឺ៣កុំ ៣ការពារ និងជាពិសេសអនុវត្តតាមសេចក្ដីណែនាំផ្សេងៗរបស់ក្រសួងសុខាភិបាល ដើម្បីរួមគ្នាការពារទប់ស្កាត់កុំឱ្យមេរោគដ៍សាហាវនេះ រីករាលដាលបន្តឆ្លងចូលសហគមន៍ឲ្យកាន់តែមានប្រសិទ្ធភាពខ្ពស់។
សូមជម្រាបថា ចំពោះអំណោយដែលបានផ្ដល់ជូនមណ្ឌលកុមារកំព្រា រួមមាន៖ ទឹកសុទ្ធចំនួន ១៥កេស, កង្ហាជាប់ជញ្ជាំងចំនួន ៦គ្រឿង, ទឹកអាល់កុល ២៥០មីលីលីត្រ ចំនួន៤០ដប, សៀវភៅចំនួន ២០០ក្បាល, ក្តារខៀនឈុតចំនួន ៤០ឈុត, ប៊ិចចំនួន ១០០ដើម, ខ្មៅដៃចំនួន ១០០ដើម, បន្ទាត់ចំនួន ៤០ដើម, ជ័រលុបចំនួន៤០ដុំ និងអំណោយរបស់សហភាពសហព័ន្ធយុវជនកម្ពុជាមួយចំនួនទៀតរួមមាន៖ កាបូបសិក្សាចំនួន ៤០កាបូប, ទឹកដោះគោ ៤៨កំប៉ុង, ត្រីខចំនួន ១០០កំប៉ុង, ម៉ាស់ ចំនួន ២៥០០ម៉ាស់ រួមនិងសម្ភារៈសិក្សាមួយចំនួនទៀតផងដែរ៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
