ភាគីជប៉ុន (Jica និងក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍) លើកបង្ហាញថា ដំណើរឆ្ពោះទៅរកការរៀបចំឲ្យក្រុងសៀមរាប អភិវឌ្ឍទៅរកគោលដៅជាទីក្រុងឆ្លាតវៃ គឺស្ថិតនៅលើឆន្ទ: នៃការអនុវត្ត កូវីដ-១៩ មិនអាចពន្យាពេលវេលា នៃការរង់ចាំបាននោះឡើយ !
តាមរយ: នៃប្រព័ន្ធអនឡាញហ្សូម Zoom នាព្រឹកថ្ងៃទី៣០ ខែសីហា ឆ្នាំ២០២១នេះ ក្រុមការងារទីក្រុងឆ្លាតវៃនៃរដ្ឋបាលខេត្តសៀមរាប បានចូលរួមក្នុងកិច្ចប្រជុំចំនួន ២ជាមួយភាគីជប៉ុន ។ ខាងភាគីកម្ពុជា ដឹកនាំកិច្ចប្រជុំទាំង២នេះដោយ ឯកឧត្តម ទៀ សីហា អភិបាលខេត្តសៀមរាប។ នៅក្នុងកិច្ចប្រជុំទី១ គឺជាកិច្ចប្រជុំលើកទី៤ របស់គណ:កម្មាធិការដឹកនាំទីក្រុងឆ្លាត ដែលត្រូវបានធ្វើឡើងជាមួយក្រុមអ្នកសិក្សារបស់ទីភ្នាក់ងារសហប្រតិបត្តិការអន្តរជាតិជប៉ុន ( JICA )។ លោក Asuka Tsuboike តំណាងទីស្នាក់ការកណ្តាលរបស់ Jica ប្រចាំប្រទេសជប៉ុន មានវត្តមាននៅក្នុងកិច្ចប្រជុំនេះ។ កិច្ចប្រជុំមួយទៀត គឺជំនួបពិភាគ្សាការងាររវាងរដ្ឋបាលខេត្តសៀមរាប ជាមួយលោក Kei Masuda ប្រធានលេខាធិការដ្ឋានរដ្ឋមន្រ្តី នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន។
កិច្ចប្រជុំទី១ ដែលផ្តោតទៅលើគម្រោង នៃការប្រកួតប្រជែងគំនិតអាជីវកម្មទីក្រុងឆ្លាតសៀមរាប និងគម្រោងសាកល្បង ដែលក្រុមសិក្សារបស់ Jica បានបង្ហាញចំនួន ១៣គម្រោងដើម្បីជ្រើសរើសនោះ រដ្ឋបាលខេត្តសៀមរាប បានអនុម័តសម្រេចចិត្តទទួលយកនូវការគាំទ្រ ដើម្បីអនុវត្តសាកល្បង លើគម្រោងទី៣ និងគម្រោងទី៦។
ការគាំទ្រដើម្បីអនុវត្តសាកល្បងចំនួន ២គម្រោងនេះ គឺផ្អែកតាមការផ្តល់អនុសាសន៍របស់ក្រុមសិក្សារបស់ Jica និងស្ថិតក្រោមការពិភាក្សាលម្អិតផងដែររបស់ក្រុមការងាររដ្ឋបាលខេត្ត និងស្ថាប័នពាក់ព័ន្ធ។ ក្នុងនោះរួមមានគម្រោងចំណតយានយន្តឆ្លាតវៃ ( Smart Parking System In Siem Reap ) ក្នុងវិស័យធ្វើដំណើរ និងដឹកជញ្ជូន ប្រតិបត្តិការដោយប្រើទន្នន័យរូបភាពពី CCTV។ គម្រោងមួយទៀត គឺគម្រោងសាកល្បងលទ្ធភាពប្រើប្រាស់ទោចក្រយានយន្តប្រើឋាមពលអាគុយ ( Smart Scooter ) ដោយការផ្តល់សេវាជួលម៉ូតូអាគុយ ដល់បណ្តាក្រុមហ៊ុននានា ដើម្បីឲ្យបុគ្គលិករបស់ខ្លួនប្រើប្រាស់ក្នុងការធ្វើដំណើរ។ គម្រោងទាំង២នេះ នឹងត្រូវបានសាកល្បងអនុវត្តនៅក្នងអំឡុងខែតុលាខាងមុខ ។នៅក្នុងកិច្ចប្រជុំមួយផ្សេងទៀតនោះ គឺជំនួបពិភក្សាការងារជាមួយលោក Kei Masuda ប្រធានលេខាធិការដ្ឋានរដ្ឋមន្រ្តី នៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន។
តាមប្រសាសន៍របស់ឯកឧត្តមអភិបាលខេត្កសៀមរាប បានឲ្យដឹងថា រដ្ឋបាលខេត្តសៀមរាប បានដាក់សំណើទៅក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន ដើម្បីជួយដល់ក្រុងសៀមរាប ក្នុងការរៀបចំឲ្យក្លាយទៅជាទីក្រុងឆ្លាតវៃអាស៊ាន ស្របតាមផែនការរបស់សមគមបណ្តាញទីក្រុងឆ្លាតវៃអាស៊ានផងដែរ។ សំណើនោះគឺផ្តោតការសិក្សាលើគម្រោងចំនួនពីរ គឺគម្រោងប្រមូល និងវិភាគទិន្នន័យអំពីទីក្រុងឆ្លាតវៃ និងគម្រោងរៀបចំបណ្តាញកាំមេរ៉ាសុវត្ថិភាពក្នុងក្រុងសៀមរាប (CCTV System Introduction)។
ឆ្លើយតបតាមការស្នើសុំនេះ ភាគីជប៉ុនបានយល់ព្រមគាំទ្រ និងចាប់ផ្តើមអនុវត្តកិច្ចការនេះ តាមរយ:ការបញ្ជូនក្រុមការងារមកសិក្សាស្រាវជ្រាវ នាពេលខាងមុខ។ ដោយការព្រមព្រៀងគ្នានេះ ភាគីរដ្ឋបាលខេត្តសៀមរាប និងភាគីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ នៃប្រទេសជប៉ុន បានចុះហត្ថលេខាលើកំណត់ហេតុនៃកិច្ចប្រជុំនេះតែម្តង បើទោះជាស្ថិតក្នុងកាល:ទេស: នៃវិបត្តិកូវីដ-១៩ យ៉ាងណាក៏ដោយ។
គួរបញ្ជាក់ដែរថា ក្រុងសៀមរាប បានទទួលនូវការផ្តល់ជូនដ៏ថ្លៃថ្លាពីសំណាក់ សម្តេចអតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ក្នុងកញ្ចប់ថវិកាចំនួន ១៥០លានដុល្លា សម្រាប់ការស្តារ កសាងហេដ្ឋារចនាសម្ព័ន្ធផ្លូវ ៣៨ខ្សែ ដើម្បីអភិវឌ្ឍន៍ ក្រុងទេសចរណ៍សៀមរាប-អង្គរ។ ភា្ជប់ជាមួយគម្រោងនេះ ក៏មានផងដែរ នូវការរៀបចំទីក្រុងឆ្លាតវៃ របស់ក្រុងសៀមរាប ដូចនេះគម្រោងរបស់ភាគីជប៉ុននេះ អាចនឹងធ្វើសមាហរណកម្មជាមួយគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវ ៣៨ខ្សែ របស់រាជរដ្ឋាភិបាលកម្ពុជាផងដែរ៕
អត្ថបទ និងរូបភាព: លោកងិន គឹមឡេង និងលោកស៊ាន សុផាត
កែសម្រួលដោយ លីវ សុខុន!!!
