នៅព្រឹកថ្ងៃទី៣១ ខែសីហា ឆ្នាំ២០២១នេះ ឯកឧត្តមវេជ្ជបណ្ឌិត ក្រុស សារ៉ាត់ សមាជិកគណៈកម្មាធិការសាខា កាកបាទក្រហមកម្ពុជាខេត្តសៀមរាប តំណាងឯកឧត្តម ទៀ សីហា ប្រធានគណៈកម្មាធិការសាខា និងសហការី បាននាំយកទេយ្យទានមួយចំនួន ប្រគេនដល់ព្រះចៅអធិការវត្តចំនួន៤ ក្នុងក្រុងសៀមរាប រួមមាន៖ វត្តកេសរារ៉ាម, វត្តព្រះឥន្ទកោសា, វត្តពោធិ៍លង្កា និងវត្តព្រះព្រហ្មរ័ត្ន ដែលក្នុងមួយវត្តៗទទួលបាន៖ ទៀនវស្សា១គូរ, អង្ករចំនួន ១៥០គីឡូក្រាម, មីចំនួន ១០កេស, ត្រីខចំនួន ១០យួរ , ត្រងៀតចំនួន ៣គីឡូក្រាម, សាច់ក្រកចំនួន ៣គីឡូក្រាម, ទឹកត្រីចំនួន ៥យួរ, ទឹកស៊ីអ៊ីវចំនួន ៥យួរ, ទឹកបរិសុទ្ធចំនួន ១០យួរ, ប្រេងឆាចំនួន ៥លីត្រ, ម្សៅស៊ុបខ្នចំនួន ៣គីឡូក្រាម, មីសួចំនួន ៣គីឡូក្រាម, ស្ករសចំនួន ៣គីឡូក្រាម, អំបិលចំនួន ២គីឡូក្រាម, តែចំនួន ១គីឡូក្រាម, នំធុងចំនួន ១ធុង, ម៉ាស់ចំនួន ៣ប្រអប់, អាស់កុលចំនួន ៤ដប, ចង្ហាន់ចំនួន ១ស្រាក់ និងបច្ច័យចំនួន ៨សែនរៀល។
មានប្រសាសន៍នាឱកាសនោះ ឯកឧត្តមវេជ្ជបណ្ឌិត ក្រុស សារ៉ាត់ បានពាំនាំនូវការទូលសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទកាកបាទក្រហមកម្ពុជា និងឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ដែលតែងតែមានការព្រួយបារម្ភចំពោះប្រជាពលរដ្ឋគ្រប់រូបខាងផ្នែកអាណាចក្រ និងព្រះសង្ឃគ្រប់អង្គខាងផ្នែកពុទ្ធចក្រ ខណៈពេលដែលជំងឺកូវីដ-១៩ កំពុងរាតត្បាតខ្លាំងនៅក្នុងភូមិសាស្ត្រខេត្តយើង ក៏ដូចជានៅទូទាំងប្រទេស និងពិភពលោកផង ហើយក្នុងអំឡុងពេលនៃការរាតត្បាតនៃជំងឺនេះ បានបណ្ដាលធ្វើឱ្យប៉ះពាល់យ៉ាងខ្លាំងដល់សេដ្ឋកិច្ច និងជីវភាពរស់នៅប្រចាំថ្ងៃរបស់ប្រជាពលរដ្ឋ ដូច្នេះការប្រគេនទេយ្យទានដល់ព្រះចៅអធិការនៅតាមបណ្ដាវត្តនាពេលនេះ គឺជាការយកចិត្តទុកដាក់គិតគូរ និងមើលឃើញពីការខ្វះខាតចង្ហាន់សម្រាប់ព្រះសង្ឃ នៅតាមបណ្ដាវត្តមួយចំនួន ពីសំណាក់ឯកឧត្តម ទៀ សីហា ដើម្បីអាចជួយសម្រួល និងដោះស្រាយការលំបាកបានមួយគ្រាផងដែរ។
ជាមួយគ្នានេះដែរ ឯកឧត្តមវេជ្ជបណ្ឌិត សមាជិកគណៈកម្មាធិការសាខា ក៏បានពាំនាំនូវប្រសាសន៍ផ្ដាផ្ញើរបស់ឯកឧត្តម ទៀ សីហា ប្រគេនដល់ព្រះសង្ឃគ្រប់អង្គ ជួយបន្តផ្សព្វផ្សាយដល់ប្រជាពុទ្ធបរិស័ទចំណុះជើងវត្តទាំងអស់ ត្រូវយកចិត្តទុកដាក់ក្នុងការទប់ស្កាត់ និង ការពារការឆ្លងរាលដាលជំងឺកូវីដ-១៩ ដោយអនុវត្តបានត្រឹមត្រូវនូវការណែនាំរបស់ក្រសួងសុខាភិបាល និងវិធានការរបស់រាជរដ្ឋាភិបាល ៣កុំ និង៣ការពារ ឲ្យបានខ្ជាប់ខ្ជួន៕
អត្ថបទ និង រូបភាព៖ សាខាកាកបាទក្រហមកម្ពុជាខេត្តសៀមរាប
កែសម្រួលអត្ថបទ ៖ លោក លីវ សាន្ត
