សាវម៉ាវព្រៃនេះមិនសូវមានអ្នកស្គាល់ច្រើនទេវាមានសណ្ឋានដូចទៅនឹងសាវម៉ាវដាំនៅចំការដែរ និងបរិភោគបាន មានរសជាតិជូរផ្អែម។ សាវម៉ាវព្រៃនេះកំពុងមានវត្តមាន នៅសហគមន៍អេកូទេសចរណ៍ព្រៃទឹកជប់ខ្នារពោធិ៍ ឃុំខ្នារពោធិ៍ ស្រុកសូទ្រនិគម ខេត្តសៀមរាប។
លោក អុិន សៅ សមាជិកសហគមន៍អេកូទេសចរណ៍ព្រៃទឹកជប់ខ្នារពោធិ៍ ស្ថិតនៅឃុំខ្នារពោធិ៍ ស្រុកសូទ្រនិគម បានឱ្យដឹងថា សាវម៉ាវព្រៃជាប្រភេទរុក្ខផលធម្មជាតិម្យ៉ាងដែលដុះក្នុងព្រៃភ្នំ និងព្រៃសហគមន៍ ដែលដើមរបស់វាជាប្រភេទវល្លិ ដុះឡើងតាមដើមឈើខ្ពស់ៗ មានដើមពីតូចដល់ធំ ស្លឹកវាស្រដៀងគ្នា និងសាវម៉ាវស្រុកដែរ និងមានផ្លែប៉ុនសាវម៉ាវស្រុកដែរ តែមានរាងវែងបន្តិច ដែលអាចបរិភោគបាន ហើយមានរសជាតិជូរផ្អែម ផ្លែទៅតាមរដូវកាល គឺចាប់ពីខែសីហា ដល់ខែតុលា ខណ:កន្លងមក មិនសូវមានអ្នកស្គាល់ និងបានបរិភោគនោះទេ និង មិនមានអ្នកបេះយកទៅលក់នៅតាមទីផ្សារឱ្យទូលំទូលាយឡើយ។
លោក អុិន សៅ បានឱ្យដឹងទៀតថា កន្លងមកនេះ ប្រជាសហគមន៍បានបេះសាវម៉ាវព្រៃនេះ សម្រាប់តែបរិភោគខ្លួនឯង និងលក់ខ្លះៗឲ្យអ្នកទេសចរមកកម្សាន្តនៅក្នុងសហគមន៍ប៉ុណ្ណោះ។ ប៉ុន្តែឥឡូវនេះ អ្នកទេសចរចាប់ផ្តើមស្គាល់ និងបានបរិភោគផ្លែសាវម៉ាវនេះកាន់តែច្រើនជាងមុន ហើយនឹងអាចធ្វើឱ្យប្រជាពលរដ្ឋបេះផ្លែឈើប្រភេទនេះ ទៅលក់នៅទីផ្សារផងដែរ។ សម្រាប់សហគមន៍អេកូទេសចរណ៍ព្រៃទឹកជប់ខ្នារពោធិ៍នេះ គឺបានផ្តល់ប្រយោជន៍យ៉ាងច្រើនដែរ ដល់ប្រជាពលរដ្ឋ ដូចជា ៖ ចំណូលពីការបានភ្ញៀវទេសចរចូលមកទស្សនា , ចំណូលពីអនុផលព្រៃឈើ រួមមាន ៖ ការយកទឹកឃ្មុំ , បេះផ្សិត , បេះផ្លែឈើព្រៃទៅតាមដូវកាល ដូចជា ផ្លែគុយ ,សេមាន់ , សាវម៉ាវព្រៃ និងផ្លែកោណជាដើម។ ដូច្នេះក្នុងឱកាសនេះ សូមអំពាវនាវឱ្យប្រជាពលរដ្ឋចូលរួមការពារ និងអភិរក្សព្រៃឈើឱ្យបានល្អ ព្រោះវាបានផ្តល់ផលប្រយោជន៍ជាច្រើនដល់យើងគ្រប់គ្នាតាមរយ:រូបភាពផ្សេងៗគ្នា។
លោក សូត្រ គិមសុង ជាប្រជាលរដ្ឋម្នាក់នៅភូមិជ្រៃ ឃុំកណ្តែក ស្រុកប្រាសាទបាគង ដែលបានធ្វើដំណើរទៅកម្សាន្តនៅសហគមន៍អេកូទេសចរណ៍ព្រៃទឹកជប់ខ្នារពោធិ៍នេះ បានឱ្យដឹងថា នេះជាលើកទី១ហើយ ដែលលោកបានស្គាល់សាវម៉ាវព្រៃនេះ ខណ:កន្លងមកលោកស្គាល់តែផ្លែឈើស្រុក ឥឡូវនេះលោកបានកម្សាន្តនៅសហគមន៍បានស្គាល់ និងបានភ្លុករស់ជាតិសាវម៉ាវនេះទៀត ហើយនៅតំបន់នេះ ប្រហែលជានៅមានផ្លែឈើព្រៃ ដែលអាចបរិភោគបានជាច្រើនទៀត ដែលរូបលោក ក៏ដូចជាយុវជនជំនាន់ក្រោយផ្សេងៗទៀត ដែលមិនទាន់ស្គាល់។ ដូច្នេះ សូមឱ្យប្រជាសហគមន៍ និងប្រជាពលរដ្ឋទូទៅ ចូលរួមការពារព្រៃឈើទាំងអស់គ្នា ព្រោះវាមានប្រយោជន៍ជាច្រើនដល់យើងគ្រប់គ្នា៕
អត្ថបទ និងរូបភាព ៖ លោក ឃុត សៅ
កែសម្រួលដោយ លីវ សុខុន!!!
