លោក សុខ ថុល នាយករដ្ឋបាលសាលាខេត្ដសៀមរាប បានឲ្យដឹងថា ក្នុងយុទ្ធនាការ នៃការការចាក់វ៉ាក់សាំងការពារជំងឺកូវីដ-១៩ ជូនដល់កុមារនិងយុវវ័យ ដែលមានចាប់ពីអាយុ១២ដល់១៧ឆ្នាំ នៅខេត្ដសៀមរាប ដោយគិតចាប់ពីថ្ងៃទី១៨ ដល់ថ្ងៃទី៣០ខែសីហាឆ្នាំ២០២១នេះ បានចំនួនជាង១១១.០០០នាក់ហើយ ក្នុងចំណោមចំនួនសរុបប្រមាណជាង១២ម៉ឺននាក់ក្នុងទូទាំងខេត្ត ក្នុងនោះក៍មានកុមារដែលជាជនជាតិបរទេសចំនួន២នាក់ផងដែរ ហើយកំពុងត្រៀមចាក់ដូសទី២បន្ដទៀត នៅពេលឆាប់ៗខាងមុខនេះ នៅតាមបណ្តាទីតាំង ដែលបានរៀបចំទុកចំនួន២២កន្លែង ក្នុងស្រុក-ក្រុងទូទាំងខេត្ត ក្នុងនោះនៅតាមមណ្ឌលសុខភាពចំនួន១៧កន្លែង និងនៅតាមបណ្តាទីតាំងមន្ទីរពេទ្យបង្អែកនានា ចំនួន៥កន្លែងផ្សេងទៀត ។
លោក សុខ ថុល បានឲ្យដឹងទៀតថា នៅរសៀលថ្ងៃទី០១ ខែកញ្ញា ឆ្នាំ២០២១នេះ ថ្នាក់ដឹកនាំគ្រប់រាជធានី-ខេត្ដទាំងអស់ និង ក្រសួងអប់រំយុវជននិងកីឡា បានបើកប្រជុំពិភាក្សាគ្នា ដើម្បីពិនិត្យលទ្ធភាពត្រៀមបើកសាលារៀនឡើងវិញផងដែរ ដូច្នេះក្នុងឱកាសនេះ សូមអំពាវនាវដល់អាជ្ញាធរមូលដ្ឋានគ្រប់លំដាប់ថ្នាក់ ត្រូវចូលរួមឲ្យបានសកម្មនៅក្នុងយុទ្ធនាការចាក់វ៉ាក់សាំងការពារជំងឺកូវីដ-១៩នេះ ដោយបង្កលក្ខណៈគ្រប់បែបយ៉ាង ពិសេសសូមអំពាវនាវដល់មាតាបិតា អាណាព្យាបាលនៃកុមារទាំងអស់ សូមនាំកូនចៅមកទទួលយកការចាក់វ៉ាក់សាំងនេះឲ្យបានគ្រប់ៗគ្នា និងទាន់ពេលវេលា ដើម្បីរួមគ្នាប្រយុទ្ធប្រឆាំងការឆ្លងរាលដាលជំងឺកូវីដ-១៩ ព្រោះថា ជោគជ័យ ឬមិនជោគជ៧យ គឺផ្តើមចេញពីបុគ្គលម្នាក់ ទៅក្នុងគ្រួសារមួយ និងឈានទៅពង្រីកឲ្យបានឆន្ទៈនៃការទទួលខុសត្រូវជារួម នៅក្នុងសង្គមជាតិទាំងមូល ៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
