រដ្ឋបាលខេត្តសៀមរាប បើកកិច្ចប្រជុំ ពិនិត្យ ពិភាក្សាលើការងារទប់ស្កាត់ការរីករាលនៃជំងឺកូវីដ-១៩ បន្ទាប់ពីបានចេញសេចក្តីសម្រេចចំនួន៤ក្នុងថ្ងៃតែមួយ សំដៅធានាដល់ប្រសិទ្ធភាពនៃការគ្រប់គ្រងការឆ្លងរាលដាលជំងឺកូវីដ-១៩ ក្នុងសហគមន៍ ចេញពីតំបន់មួយទៅតំបន់មួយទៀត ៣កុំ ៣ការពារ នៅតែជាវិធានការមិនអាចខ្វះបានដើម្បីសុវត្ថិភាព បញ្ជៀសកូវីដ-១៩។ តាមប្រព័ន្ធ OnLine ដែលបានធ្វើឡើងនាព្រឹកថ្ងៃទី០៩ ខែកញ្ញា ឆ្នាំ២០២១នេះ ស្តីពីកិច្ចពិភាក្សា និងពិនិត្យមើលលើការងារទប់ស្កាត់ការរីករាលដាលនៃជម្ងឺកូវីដ-១៩ ឯកឧត្តម ទៀ សីហា អភិបាលខេត្តសៀមរាប បានជម្រុញឲ្យមានការរឹតបន្តឹងបន្ថែមទៀត នៅក្នុងប្រតិបត្តិការអនុវត្តច្បាប់ លើបុគ្គលដែលមិនព្រមចូលរួមអនុវត្តតាមវិធានការទប់ស្កាត់ការឆ្លង និងការចម្លងរាលដាលជំងឺកូវីដ-១៩ ។
កិច្ចប្រជុំនេះ បានធ្វើឡើងក្រោយ១ថ្ងៃ បន្ទាប់ពីរដ្ឋបាលខេត្តសៀមរាបបានចេញសេចក្តីសម្រេចចំនួន៤ក្នុងពេលតែមួយ ដើម្បីធានាប្រសិទ្ធភាពនៃការគ្រប់គ្រងជំងឺកូវីដ-១៩ ។ សេចក្តីសម្រេចទាំងនោះ រួមមានការដាក់ចេញនូវវិធានការរដ្ឋបាលជាបណ្តោះអាសន្នសម្រាប់បំរាមគោចរក្នុងភូមិសាស្រ្តខេត្តសៀមរាបរយៈពេល១៤ថ្ងៃ ចាប់ពីថ្ងៃទី០៩ នៅចន្លោះពីម៉ោង២១ ដល់ម៉ោង៣ទៀបភ្លឺ។ សេចក្តីសម្រេចទី២ គឺការកំណត់តំបន់លឿងទុំ នៅក្នុងភូមិសាស្រ្តឃុំចំនួន៦នៃស្រុកពួក និងឃុំចំនួន៤ទៀតនៅក្នុងស្រុកក្រឡាញ់ រយៈពេល១៤ថ្ងៃ ចាប់អនុវត្តពីថ្ងៃទី០៩ ខែកញ្ញា។ សេចក្តីសម្រេចមួយទៀត គឺការកំណត់តំបន់លឿងទុំរយៈពេល១៤ថ្ងៃបន្តទៀត នៅក្នុងភូមិសាស្រ្តឃុំកំពង់ឃ្លាំង ឃុំកៀនសង្កែ និងឃុំដានរុន នៃស្រុកសូទ្រនិគម ចាប់ពីថ្ងៃទី០៩កញ្ញា តទៅ។ និងសេចក្តីសម្រេចចុងក្រោយ ចាប់ពីថ្ងៃទី០៩ ខែកញ្ញា តទៅ គឺការសម្រេចបិទផ្សារដំដែក ឃុំដំដែក ស្រុកសូទ្រនិគម រយៈពេល២សប្តាហ៍។
ក្នុងកិច្ចប្រជុំនោះ របាយការណ៍ដែលបានបញ្ចេញដោយលោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តបានបង្ហាញថា ជាការកត់សម្គាល់ ចាប់ពីពាក់កណ្តាលខែសីហាកន្លងមកនេះ បណ្តាស្រុកនៅតាមបណ្តោយផ្លូវជាតិលេខ៦ មានការហក់ឡើង នៃការរកឃើញចំនួនអ្នកវិជ្ជមានកូវីដ-១៩ ជាពិសេសនោះគឺក្នុងរយៈពេល២ថ្ងៃចុងក្រោយនេះ។ សេចក្តីរាយការណ៍នេះក៏បានបញ្ចាក់ដែរថា មួយរយៈចុងក្រោយនេះ កូវីដ-១៩បំបំប្លែងខ្លួនថ្មី (Delta)ត្រូវបានរកឃើញនៅខេត្តសៀមរាបចំនួន២២០ករណី ក្នុងនេះស្រ្តីចំនួន១៣៣ករណី។ នៅក្នុងចំនួន២២០ករណីDeltaនេះ ត្រូវបានរកឃើញលើប្រជាពលរដ្ឋក្នុងសហគមន៍ចំនួន១៧៦នាក់ និងរកឃើញលើពលករមកពីប្រទេសថៃចំនួន៣៩នាក់។ អ្នកជម្ងឺទាំងនេះបានទទួលការព្យាបាលជាសះស្បើយ៣៩នាក់ ស្លាប់២នាក់ និង១៧៩នាក់កំពុងសម្រាកព្យាបាល។
របាយការណ៍ទាំងនេះ ជាការកត់សម្គាល់ផ្តល់ឲ្យកិច្ចប្រជុំ ទទួលយកជាមូលដ្ឋានលើការពិភាក្សា និងដាក់ចេញនូវការសិក្សាស្រាវជ្រាវរកប្រភព និងមូលហេតុការឆ្លង និងការចម្លង ដើម្បីចាត់វិធានការអនុវត្តបន្តទៀត។
ការសង្កេតឃើញនៃកិច្ចប្រជុំ បានវាយតម្លៃថា ការគ្រប់គ្រងការធ្វើចត្តាឡីស័កឲ្យបានច្បាស់លាស់គឺជាចំណុចសំខាន់ ហើយការគ្រប់គ្រងលើទីតាំងចាក់វាក់សាំងឲ្យបានល្អដោយប្រុងប្រយ័ត្ន វាជាកិច្ចការដែលអាចចៀសវាងបាន ពីការប្រែក្លាយទីតាំងផ្តល់ការការពារ ឲ្យក្លាយជាកន្លែងចែកចាយកូវីដ ហើយការបញ្ជៀសឲ្យបាននូវការធ្វេសប្រហែសដោយការសំអាងទាំងស្រុងលើប្រសិទ្ធភាពនៃការចាក់វ៉ាក់សាំង គឺជាចំណុចដែលត្រូវអប់រំផ្សព្វផ្សាយបន្ថែមទៀត សំខាន់បំផុតគឺពង្រឹងការត្រួតពិនិត្យលើការអនុវត្តវិធានការ ៣កុំ និង៣ការពារ ៕
អត្ថបទ និង រូបភាព៖ លោក ងិន គឹមឡេង
