នៅព្រឹកថ្ងៃទី១០ ខែកញ្ញា ឆ្នាំ២០២១នេះ ព្រះតេជគុណព្រះសច្ចានុបាល ភទ្ទកោ នឿម វុទ្ធី ព្រះរាជាគណៈកិត្តិយស ទីប្រឹក្សាសម្ដេចព្រះមហាសុមេធាធិបតី នន្ទ ង៉ែត សម្ដេចព្រះសង្ឃនាយក នៃព្រះរាជាណាចក្រកម្ពុជា និងជាព្រះចៅអធិការវត្តបារាយណ៍មហានទីរតនារាម ហៅវត្តស្វាយរមៀត សហការជាមួយអាជ្ញាធរសង្កាត់ទឹកវិល និងព្រះវត្តមាននិមន្តចូលរួមព្រះរាជាគណៈនិងជាព្រះចៅអធិការវត្តមួយចំនួនក្នុងក្រុងសៀមរាប បាននាំយកទេយ្យទានជាគ្រឿងបរិភោគមួយចំនួន ជូនដល់គ្រួសារដែលមានសមាជិកកំពុងសម្រាកព្យាបាលដោយការឆ្លងជំងឺកូវីដ-១៩ និង គ្រួសារដែលប៉ះពាល់ដោយផ្ទាល់ និងដោយប្រយោលជាមួយអ្នកឆ្លងជំងឺនេះ នៅក្នុងសង្កាត់ទឹកវិល ចំនួន១៥គ្រួសារ ដែលក្នុងមួយគ្រួសារទទួលបាន អង្ករ ៥០គីឡូក្រាម , មី១កេស , ទឹកសុទ្ឋ២កេស , ទឹកត្រី១យួរ , ទឹកស៊ីអ៊ីវ១យួរ , ត្រីខ១យួរ , ស្ករស ១គីឡូក្រាម, អំបិល ២គីឡូក្រាម និងថវិកាចំនួន ៨ម៉ឺនរៀល។
ព្រះតេជគុណព្រះសច្ចានុបាល ភទ្ទកោ នឿម វុទ្ធី មានសង្ឃដិកាថា អំណោយជាគ្រឿងបរិភោគ និងថវិកាទាំងអស់នេះ គឺបានមកពីការប្រគេនរបស់ប្រជាពុទ្ឋបរិស័ទជិតឆ្ងាយ ជាពិសេសថ្មីៗនេះបានទទួលបរិច្ចាកដោយជ្រះថ្លាពី ឧកញ៉ា សុខ ស៊ុនលីន និងភរិយាព្រមទាំងក្រុមគ្រួសារ និងលោក សាំង សុផល និងភរិយា នូវមីចំនួន២០កេស ទឹកត្រី២០យួរ ទឹកស៊ីអ៊ីវ២០យួរ អំបិល២០គក្រ ប៊ីចេង២០កញ្ចប់ និងបច្ច័យ៨០ម៉ឺនរៀល ហើយក៍បានយកទៅចែកជូនដល់គ្រួសារដែលមានសមាជិកឆ្លងជំងឺកូវីដ-១៩ និងសមាជិកគ្រួសាខ្លះកំពុងជាប់ធ្វើចត្តាលីស័កចំនួន ១៥គ្រួសារ ក្នុងភូមិបន្ទាយឈើសង្កាត់ទឹកវិលក្រុងសៀមរាបខេត្តសៀមរាប។ សម្ភារគ្រឿងបរិភោគទាំងនេះ ថ្វីត្បិតតែតិចតួចតែក៍អាចជួយ ដោះស្រាយការលំបាកមួយគ្រាៗ ខណៈដែលបងប្អូនជាប់ចត្តាឡីស័កមិនអាចចេញទៅប្រកបកិច្ចការសម្រាប់ជីវភាពប្រចាំថ្ងៃបាន។
ព្រះអង្គ នឿម វុទ្ឋី មានសង្ឃដិកាទៀតថា សកម្មភាពនេះជាការងារសប្បុរសធម៌ ចូលរួមជួយដល់ងាជ្ញាធរមូលដ្ឋាន និងប្រជាពលរដ្ឋដែលជយបការខ្វះខាតចាក់ស្តែង ព្រោះថា ការលំបាករបស់អាជ្ញាធរមូលដ្ឋាន និងបងប្អូនប្រជាពុទ្ឋបរិស័ទ ក៏ជាការលំបាករបស់ព្រះសង្ឃដែរ ដូច្នេះហើយក្នុងនាមមិត្តរួមជាតិ មិត្តរួមសាសន៍ គឺ តែងតែជួយគិតគូរ និងផ្តល់ជូនគ្នាទៅវិញទៅមកទៅតាមលទ្ឋភាពដែលក្រុមព្រះសង្ឃមាន ខណៈកន្លងមក វត្តស្វាយរមៀតតែងតែនាំយកស្បៀងអាហារ និងថវិកាទោះតិចក្តីច្រើនក្តី ចែករំលែក និងផ្តល់ជូនដល់គ្រួសារដែលជួបហានិភ័យ ជួបការលំបាកដោយសារជំងឺ ដោយសារគ្រោះធម្មជាតិផ្សេងៗ ដើម្បីជាការចូលរួមសម្រាលការលំបាក។ បច្ចុប្បន្ន បងប្អូនប្រជាពលរដ្ឋ កំពុងរស់នៅប្រឈមទៅនឹងវិបត្តិជំងឺកូវីដ-១៩ ព្រោះជំងឺនេះ បាននឹងកំពុងធ្វើការឆ្លងរាតត្បាតជាសកល រួមទាំងកម្ពុជាយើងផង ប៉ុន្តែសូមកុំស្លន់ស្លោ និងបាក់ទឹកចិត្ត ជាពិសេសយើងទាំងអស់គ្នា ត្រូវតែចូលរួមជាមួយរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជានាយករដ្ឋមន្ត្រី ក្នុងការបង្ការ និង ទប់ស្កាត់ការឆ្លងរាលដាល ជំងឺកូវីដ-១៩នេះ ប៉ុន្តែប្រការសមខាន់នោះ គឺត្រូវគោរពប្រតិបត្តិឲ្យបានខ្ជាប់ខ្ជួននូវវិធានការរបស់រាជរដ្ឋាភិបាល ៣កុំ ៣ការពារ និង ២ចូលរួម រួមទាំងវិធានការនានារបស់ ក្រសួងសុខាភិបាលផងដែរ ។
ក្នុងឱកាសនោះដែរ លោកស្រី ជា ភឿយ សមាជិកក្រុមប្រឹក្សាសង្កាត់ទឹកវិល បានថ្លែងអំណរព្រះគុណនូវការយកព្រះទ័យទុកដាក់របស់ព្រះសង្ឃនៃវត្តស្វាយរមៀត ស្របពេលបងប្អូនប្រជាពលរដ្ឋក្នុងសង្កាត់នេះ មួយចំនួនពួកគាត់ពិតជាជួបការលំបាកក្នុងជីវភាពមែន ដោយសារតែវិបត្តិជំងឺកូវីដ-១៩ ហើយអាជ្ញាធរសង្កាត់ នឹងបន្តសហការជាប់ប្រចាំជាមួយសមត្ថកិច្ចមូលដ្ឋាន ដើម្បីធ្វើការណែនាំ អប់រំ និងពន្យល់ដល់ប្រជាពលរដ្ឋឱ្យពួកគាត់អនុវត្តឱ្យបានខ្ជាប់ខ្ជួន នូវសេចក្តីណែនាំរបស់ក្រសួងសុខាភិបាល និងវិធានការរបស់រាជរដ្ឋាភិបាល ៣ការពារនិង៣កុំ ដើម្បីទប់ស្កាត់ការឆ្លងជំងឺកូវីដ-១៩ ចូលក្នុងសហគមន៍៕
អត្ថបទ និង រូបភាព៖ លោក យូ វង្ស
