លោកឧត្តមសេនីយ៍ត្រី តេង ចន័្ទណាត អតីតស្នងការរងនគរបាលខេត្តសៀមរាប ត្រូវបានប្រកាសជាស្នងការ នៃស្នងការដ្ឋាននគរបាលខេត្តសៀមរាប កាលពីព្រឹកថ្ងៃទី១៣ ខែកញ្ញា ឆ្នាំ២០២១នេះ នៅសាលប្រជុំសាលាខេត្តសៀមរាប ជំនួសលោកឧត្តមសេនីយ៍ទោ ទិត្យ ណារ៉ុង ដែលត្រូវបានចូលនិវត្តន៍ ។ ពិធីប្រកាសចូលកាន់មុខតំណែងថ្មីនេះ បានប្រព្រឹត្តទៅក្រោមអធិបតីភាពឯកឧត្ដមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ , ឯកឧត្តម អ៊ាន ឃុន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាលខេត្តសៀមរាប ។
មានប្រសាសន៍ក្នុងឱកាសនោះ ឯកឧត្តម ទៀ សីហា អភិបាលខេត្តសៀមរាប បានចសម្ដែងនូវកោតសរសើរចំពោះលោកឧត្តមសេនីយ៍ទោ ទិត្យ ណារ៉ុង អតីតស្នងការនគរបាលខេត្តសៀមរាប ដែលត្រូវបានឱ្យចូលនិវត្តន៍នេះ ខនៈកន្លងមកលោកបានលះបង់យ៉ាងច្រើនទាំងកម្លាំងកាយ កម្លាំងចិត្ត មិនថាយប់ឬថ្ងៃឡើយ ដើម្បីការពារនៅផលប្រយោជន៍រួមរបស់ជាតិ នឹងអនុវត្តកិច្ចការងាររបស់ខេត្តសៀមរាប ជាពិសេស គឺការគ្រប់គ្រងកងកម្លាំងនៅស្នងការ និងអធិការនៅតាមបណ្តាស្រុកទាំង១២ បានយ៉ាងល្អ ព្រមទាំងការបម្រើសេវាកម្មជូនប្រជាពលរដ្ឋបានទាន់ពេលវេលាទៀតផង ដូច្នេះ ការចូលកាន់មុខតំណែងថ្មី របស់លោកឧត្តមសេនីយ៍ត្រី តេង ចន័្ទណាត យើងសង្ឃឹមជឿជាក់យ៉ាងមោះមុតថា យើងអាចថែរក្សាបាននូវសន្តិសុខ សណ្តាប់ធ្នាប់ សុវត្ថិភាព ស្ថេរភាព នយោបាយ នៃខេត្តសៀមរាបទាំងមូលកាន់តែល្អប្រសើរថែមទៀត។
ព័ត៌មានជាតិ ថ្មីៗ
ឯកឧត្ដមនាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ មានប្រសាសន៍ថា ការឡើងមកសច្ចាធ្វើការងារឲ្យបានល្អនោះ គឺដាច់ខាតយើងត្រូវតែធ្វើឲ្យបាន មិនមែនសន្យាចោលឡើយ ហើយការសន្យា និង ការប្ដេជ្ញាចិត្ត គឺជាទ្រឹស្តីប៉ុណ្ណោះ ប៉ុន្តែប្រការសំខាន់នោះ បើយើងចង់ឲ្យខេត្តសៀមរាបទទួលបានជោគជ័យថ្មីៗបន្ថែមទៀតនោះ គឺយើងត្រូវតែអនុវត្តជាក់ស្តែងឲ្យកាន់តែមានប្រសិទ្ធភាពតាមការប្ដេជ្ញាចិត្ត រួមទាំងកិច្ចសហប្រតិបត្តិការល្អពិសេសក្នុងក្របខណ្ឌទូទាំងខេត្ត ការរក្សាចំណងសាមគ្គីភាពផ្ទៃក្នុង និងការអនុវត្តបានល្អប្រសើរនូវគោលនយោបាយភូមិឃុំមានសុវត្ថិភាព៕
អត្ថបទ និងរូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
