នាយករដ្ឋមន្រ្តីម៉ាឡេស៊ី លោក Ismail Sabri Yaakob បាននិយាយថា វិបត្តិសុខភាព និងសេដ្ឋកិច្ចនាពេលបច្ចុប្បន្ននេះ ដែលបណ្តាលមកពីការរីករាលដាលនៃជំងឺកូវីដ-១៩ បានបណ្តាលឱ្យគ្រួសារចំនួន ៥៨០ ០០០គ្រួសារនៅក្នុងក្រុម M40 (ក្រុមមានប្រាក់ចំណូលមធ្យម) បានធ្លាក់ចុះពីចំណាត់ថ្នាក់ទៅជាក្រុមមានប្រាក់ចំណូលទាប (B40)។ នេះបើតាមសារព័ត៌មាន VNA ដកស្រងចេញផ្សាយដោយ AKP នៅថ្ងៃនេះ។
នាយករដ្ឋមន្រ្តីរូបនោះបាននិយាយនៅពេលឆ្លើយតបទៅនឹងសំណួររបស់ក្រុមប្រឆាំងនៅក្នុងរដ្ឋសភាថា ចំនួននេះស្មើនឹង ២០ភាគរយនៃចំនួនគ្រួសារសរុបនៅក្នុងក្រុម M40 ។ កាលពីមុន ប្រាក់ចំណូលប្រចាំខែរបស់ក្រុមគ្រួសារទាំងនោះមានចាប់ពី ៤ ៨៥០រីងហ្គីត ដល់ ១០ ៩៥៩រីងហ្គីត ស្មើនឹងប្រមាណ ១,១៥០ ដល់ ២,៦០០ដុល្លារអាម៉េរិក ប៉ុន្តែចាប់តាំងពីមានជំងឺរាតត្បាតកូវីដ-១៩ បានផ្ទុះឡើងនៅប្រទេសម៉ាឡេស៊ី កាលពីដើមឆ្នាំ២០២០មក ការកើនឡើងនៃភាពអត់ការងារធ្វើបានកាត់បន្ថយប្រាក់ចំណូលរបស់ក្រុមគ្រួសារក្នុងក្រុម M40 និង B40។
ចំនួនក្រុមគ្រួសារក្រីក្រខ្លាំងនៅក្នុងឆ្នាំ២០២០ ក៏បានកើនឡើងដល់ ៨,៤ភាគរយ ដែរបើប្រៀបធៀបទៅនឹងចំនួន ៥,៦ភាគរយ ក្នុងឆ្នាំ២០១៩។ កម្រិតកំណត់អត្តសញ្ញាណគ្រួសារក្រីក្រនៅក្នុងប្រទេសម៉ាឡេស៊ីបច្ចុប្បន្ននេះមានប្រាក់ចំណូលប្រចាំខែចំនួន ២ ២០៨រីងហ្គីត ឬតិចជាងនេះ។ នៅក្នុងឆ្នាំ២០២២ រដ្ឋាភិបាលនឹងកែប្រែកម្រិតកំណត់គ្រួសារក្រីក្រដើម្បីឆ្លុះបញ្ចាំងអំពីស្ថានភាពឱ្យបានត្រឹមត្រូវ៕
