នៅព្រឹកថ្ងៃទី ២៤ ខែ កញ្ញា ឆ្នាំ២០២១នេះ រដ្ឋបាលខេត្តសៀមរាប បានសហការជាមួយសាខាកាកបាទក្រហមកម្ពុជាខេត្ត នាំយកនូវស្បៀងអាហារជាគ្រឿងឧបភោគបរិភោគ ជូនដល់បងប្អូនប្រជាពលរដ្ឋគ្រួសារក្រ១,ក្រ២ នៅតាមខ្នងផ្ទះ ចំនួន១ពាន់គ្រួសារ ដែលស្ថិតនៅក្នុងភូមិចំនួន២៣ នៃសង្កាត់ចំនួន៧ ក្នុងក្រុងសៀមរាប ដែលស្ថិតក្នុងតំបន់ក្រហម ជាតំបន់បិទខ្ទប់បណ្តោះអាសន្ន ក្រោមវត្តមានឯកឧត្តម គុជ លីណា អនុប្រធានគណៈកម្មាធិការសាខាកាកបាទក្រហមកម្ពុជាខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា ប្រធានគណៈកម្មាធិការសាខា និងឯកឧត្តម ប្រាក់ សុភ័ណ្ឌ ប្រធានសហភាពសហព័ន្ធយុវជនកម្ពុជាខេត្ត ដោយមានការចូលរួមពីសមាជិកសមាជិកាសហភាពសហព័ន្ធយុវជនកម្ពុជាក្រុង និង ប្អូនៗយុវជនកាកបាទក្រហមកម្ពុជាជាច្រើននាក់។
ឯកឧត្តម គុជ លីណា បានឲ្យដឹងថា ដើមី្បអនុវត្តតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ក្នុងការជំរុញលើកទឹកចិត្តឲ្យយកចិត្តទុកដាក់អំពីសុខមាភាព ជីវភាពរស់នៅរបស់ប្រជាពលរដ្ឋ សំខាន់គ្រួសារក្រ១ , ក្រ២ ក្នុងបរិបទជំងឺកូវីដ-១៩នេះ ដូច្នេះឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត និងជាអភិបាលខេត្តសៀមរាប បាននាំយកស្បៀងអាហារ ដែលទទួលបានពីបងប្អូនសប្បុរសជនក្នុងនិងក្រៅខេត្ត យកមកធ្វើការផ្គត់ផ្គង់ជូនបងប្អូនជួបការខ្វះខាត ដោយផ្តោតសំខាន់ចំពោះបងប្អូនគ្រួសារក្រ១,ក្រ២ ដែលជាអ្នកងាយរងគ្រោះបំផុត គឺត្រូវធ្វើការផ្តល់ជូនបងប្អូននៅតាមខ្នងផ្ទះផ្ទាល់ ក្នុងការកាត់បន្ថយការជួបជុំ ប្រមូលផ្តុំទៀតផង ដែលក្នុងមួយគ្រួសារទទួលបានអង្ករ១០គីឡូក្រាម ,មី១កេស , ត្រីខ ១យួរ , សាច់ជ្រូក ១គីឡូក្រាម , ទឹកត្រី១ដប , ទឹកស៊ីអ៊ីវ ១ដប , ស្ករស ១គីឡូក្រាម និង ពង់មាន់១០គ្រាប់ ដែលជាដំណោះស្រាយក្នុងការចែករំលែកក្នុងគ្រាលំបាកតែប៉ុណ្ណោះ។
ក្នុងឱកាសនៈដែរឯកឧត្តមបានធ្វើការអំពាវនាវដល់បងប្អូនប្រជាពលរដ្ឋក្នុងខេត្តសៀមរាប សូមចូលរួមជាមួយអាជ្ញាធរ ក្នុងការអនុវត្តវិធានការឲ្យមានប្រសិទ្ធភាពខ្ពស់ ក្នុងការកាត់ផ្តាច់ការចម្លងមេរោគដ៏កាចសាហាវនេះ កុំឲ្យរីករាលដាលចូលក្នុងសហគមន៍ ដល់គ្រួសារ និង ញាតិមិត្តរបស់ខ្លួននិងត្រូវបន្តចូលរួមសហការអនុវត្តវិធានការរបស់រាជរដ្ឋាភិបាល ៣កុំ ៣ការពារ ឲ្យមានប្រសិទ្ធភាពខ្ពស់បំផុត ព្រមទាំងបន្តប្រកាន់នូវវិធានសុខាភិបាលឲ្យបានខ្ជាប់ខ្ជួនបើទោះបីបងប្អូនបានធ្វើការចាក់វ៉ាក់សាំងបានគ្រប់ដូសក៏ដោយ។
គួររំលឹកថា កាលពីថ្ងៃទី២៣ ខែកញ្ញា ឆ្នាំ២០២១ ម្សិលមិញនេះ រដ្ឋបាលខេត្តសៀមរាប សម្រេចកំណត់ជា “តំបន់ក្រហម” ក្នុងនោះ ៖ ភូមិទាំងអស់ក្នុងសង្កាត់ស្លក្រាម , ភូមិចំនួន៥ក្នុងសង្កាត់ស្វាយដង្គំ រួមមាន ៖ ភូមិតាភុល . ភូមិមណ្ឌល១ . ភូមិស្វាយដង្គំ . ភូមិស្ទឹងថ្មី ភូមិតាភុល , ភូមិចំនួន៤ក្នុងសង្កាត់គោកចក រួមមាន ៖ ភូមិត្រពាំងសេះ . ភូមិនគរក្រៅ . ភូមិទក្សិណត្បូង . ភូមិវាល , ភូមិចំនួន១ក្នុងសង្កាត់ជ្រាវ គឺភូមិខ្នារ , ភូមិចំនួន១ក្នុងសង្កាត់សាលាកំរើក គឺភូមិតាវៀន , ភូមិចំនួន២ក្នុងសង្កាត់ស្រង៉ែ មានភូមិព្រៃធំ . ភូមិស្រង៉ែ និង ភូមិចំនួន១ក្នុងសង្កាត់ទឹកវិល គឺភូមិសណ្ដាន់ ជាបណ្តោះអាសន្នរយៈពេល ១សប្ដាហ៍ គិតចាប់ពីវេលាម៉ោង២៣:៥៩ នាទី នាថ្ងៃទី២៣ ខែកញ្ញា រហូតដល់ថ្ងៃទី៣០ ខែកញ្ញា ឆ្នាំ២០២១ ក្នុងគោលបំណងធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ-១៩ នៅក្នុងភូមិសាស្ត ដែលត្រូវបិទ និងទប់ស្កាត់ជំងឺនេះមិនឱ្យឆ្លងរាលដាលទៅតំបន់ផ្សេងទៀត រហូតមានការចេញសេចក្ដីសម្រេចជាថ្មី៕
អត្ថបទ និង រូបតថត ៖ លោ ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
