បន្ទាប់ពីការបិទខ្ទប់ ដាក់ភូមិសាស្រ្តមួយចំនួននៃក្រុងសៀមរាប ជាតំបន់ក្រហមបណ្តោះអាសន្នរយៈពេល ១សប្តាហ៍កន្លងមកត្រូវបានបញ្ចប់ កិច្ចប្រជុំស្តីពីការគ្រប់គ្រងការឆ្លងរាលដាលនៃជំងឺកូវីដ-១៩ ត្រូវបានធ្វើឡើងសម្រាប់សប្តាហ៍ថ្មី ដើម្បីពិនិត្យរបាយការណ៍ វាយតម្លៃការរៀបចំតំបន់ក្រហម និងតំបន់លឿងទុំឡើងវិញ កិច្ចប្រជុំនេះបានរកឃើញភូមិមួយចំនួន ត្រូវបានចាកចេញពីតំបន់ក្រហម។
បើទោះជាបណ្តាសង្កាត់មួយចំនួនក្នុងក្រុងសៀមរាប ត្រូវបិទខ្ទប់ជាតំបន់ក្រហមមួយសប្តាហ៍បន្តទៀត បន្ទាប់ពី១សប្តាហ៍បិទខ្ទប់ដំបូងត្រូវបានបញ្ចប់ ក៏ប៉ុន្តែយ៉ាងហោចណាស់បណ្តាភូមិមួយចំនួន នៃបណ្តាសង្កាត់ទាំងនោះ រួមមានសង្កាត់គោកចក សង្កាត់ស្វាយដង្គំ សង្កាត់ជ្រាវ ភូមិមួយចំនួនត្រូវបានដកចេញតំបន់ក្រហម មកដាក់កំណត់ជាតំបន់លឿងទុំវិញ លើកលែងតែសង្កាត់ស្លក្រាមតែមួយប៉ុណ្ណោះ ត្រូវបានរក្សាជាតំបន់ក្រហមទាំងមូលដដែល។ ឯកឧត្តម ទៀ សីហា អភិបាលខេត្តសៀមរាប បានបង្ហាញឲ្យដឹងយ៉ាងដូច្នេះ នៅក្នុងកិច្ចប្រជុំតាមប្រព័ន្ធ ZOOM នាព្រឹកថ្ងៃទី២៣ ខែកញ្ញា ឆ្នាំ២០២១នេះ ស្តីពីការគ្រប់គ្រងការឆ្លងរាលដាលនៃជំងឺកូវីដ-១៩ នៅក្នុងភូមិសាស្រ្តក្រុងសៀមរាប ជាមួយមន្រ្តីជំនាញពាក់ព័ន្ធ និងក្រុមការងារស្រាវជ្រាវបុគ្គលសង្ស័យមានវារ៉ុសកូវីដ-១៩ ដើម្បីពិនិត្យរបាយការណ៍ និងវាយតម្លៃរៀបចំតំបន់ក្រហម និងតំបន់លឿងឡើងវិញ បន្ទាប់ពីប្រតិបត្តិការអនុវត្តដាក់សង្កាត់ទាំង៤ និងភូមិចំនួន៣ នៃសង្កាត់២ ផ្សេងទៀត ជាតំបន់ក្រហមនោះ។
ឯកឧត្តមអភិបាលខេត្ត វាយតម្លៃថា បើទោះជាតំបន់ក្រហមនៃបណ្តាសង្កាត់មួយចំនួនក្នុងក្រុងសៀមរាប មិនទាន់បានបញ្ចប់ទាំងស្រុង តែការកាត់បន្ថយបាន ភូមិមួយចំនួនចេញពីតំបន់ក្រហម វាជាសញ្ញាបង្ហាញនូវភាពធូរស្រាលមួយចំនួនចេញពីការរាតត្បាត ដែលបានមកពីការចូលរួមពីសំណាក់បងប្អូនប្រជាពលរដ្ឋ ក្នុងការអនុវត្តវិធានការចាំបាច់នានា ដែលដាក់ចេញដោយរដ្ឋបាលខេត្ត និងការខិតខំប្រឹងប្រែងនៅក្នុងប្រត្តិការរបស់សមត្ថកិច្ចគ្រប់ផ្នែកគ្រប់ជំនាញផងដែរ រួមទាំងកម្លាំងប្រជាការពារ ក្រុមយុវជនស្ម័គ្រចិត្តភូមិ-សង្កាត់ ពិសេសការជួយអន្តរាគមន៍របស់គ្រួសារសហភាពសហព័ន្ធយុវជនកម្ពុជាខេត្តសៀមរាប។
ទន្ទឹមនឹងភូមិមួយចំនួនត្រូវបានចាកចេញពីតំបន់ក្រហម ឯកឧត្តមអភិបាលខេត្ត ក៏បានបង្ហាញអំពីការលើកទឹកចិត្តផងដែរ ជម្រុញបណ្តាភូមិក្រហមផ្សេងទៀត បន្តអនុវត្តវិធានអនាម័យ ធ្វើចត្តាឡីសីស័កតាមខ្នងផ្ទះ មិនចេញពីលំនៅដ្ឋានដោយមិនមានករណីជាចាំបាច់ តែយ៉ាងណាក៏ដោយ ជាសំណូមពររបស់អភិបាលខេត្តចំពោះប្រជាពលរដ្ឋ គឺសូមឲ្យបណ្តាភូមិ ដែលបានចាកចេញពីតំបន់ក្រហមទាំងនោះ ត្រូវបញ្ជៀសឲ្យបាន កុំវិលត្រឡប់មករកតំបន់ក្រហមវិញ ជាដាច់ខាត។
ការឈានមកដល់ចំណុចធូរស្រាលបន្តិចនេះ ១សប្តាហ៍នៃការបិទខ្ទប់កន្លងមក សកម្មភាពជំនួយក្នុងការលាងសំអាតវារ៉ុសកូវីដ-១៩ ក្នុងតំបន់ក្រហមនៃក្រុងសៀមរាប គេឃើញមានកត្តា៤ ដែលបានដើរទន្ទឹមគ្នា ដំបូងបំផុត គឺការអនុវត្តវិធានការ ៣កុំ ៣ការពារ ទី២ បន្តការចាក់វ៉ាក់សាំងបង្ការជំងឺកូវីដ-១៩ ជូនកុមារពីអាយុ១២ឆ្នាំ ដល់ក្រោម១៨ឆ្នាំ ទី៣ យុទ្ធនាការចែកថ្នាំ លានហ័រ ឈីងវីន ដោយគិតត្រឹមថ្ងៃទី២២ ខែកញ្ញានេះ ថ្នាំដែលមានប្រសីទ្ធភាពបង្ការ និងព្យាបាលអាការៈជំងឺកូវីដ-១៩ ជាង៦លានគ្រាប់ត្រូវបានចែកជូនដល់ដៃប្រជាពលរដ្ឋផ្ទាល់ ក្នុងតំបន់ក្រហមប្រមាណជាង ១១ម៉ឺននាក់ និងកំពុងចែកបន្តទៀត និងទី៤ គឺយុទ្ធនាការយកសំណាកលើអ្នកសង្ស័យ និងពាក់ព័ន្ធនៃតំបន់ប្រឈមខ្លាំងចំនួន ៨ភូមិ ក្នុងនេះលើសំណាកចំនួន ១,២៣៨នាក់ ក្រុមគ្រូពេទ្យរកឃើញវិជ្ជមាន ២៣៨នាក់ ស្មើនឹង១៥% ដែលអ្នកវិជ្ជមានទាំងនេះ ត្រូវបានគ្រូពេទ្យនែរដ្ឋបាលខេត្ត យកទៅគ្រប់គ្រង ថែទាំ និងព្យាបាល៕
អត្ថបទ និង រូបភាព៖ លោក ងិន គឹមឡេង
