ថ្មីៗនេះ ព្រះយសមុនីវង្សី រិត ស៊ីធីម យសលាភោ ព្រះរាជាគណៈថ្នាក់កិត្តិយស និងជាព្រះគ្រូសូត្រស្តាំវត្តពោធិ៍បន្ទាយជ័យ ស្ថិតក្នុងសង្កាត់សៀមរាប ក្រុងសៀមរាប បានរៀបចំជាទេយ្យទានប្រគេនព្រះសង្ឃចំនួន ៣០អង្គ គង់ប្រចាំនៅវត្តពោធិ៍បន្ទាយជ័យ ក្នុងនោះព្រះសង្ឃមួយអង្គៗ ទទួលបានទេយ្យទាន រួមមាន ៖ អង្ករ ២០គីឡូក្រាម, ត្រីខ ១យួរ, សាច់ក្រក ១គីឡូក្រាម, ពងទាប្រៃចំនួន ១០គ្រាប់, ទឹកសុទ្ធ១កេស, ទឹកភេសជ្ជៈកូកាកូឡា១យួរ, ម៉ាស និងអាកុល ១ដប, និងបច្ច័យចំនួនមួយម៉ឺនរៀល និងជូនអំណោយដល់ប្រជាការពារមកពី ៥ភូមិ ក្នុងសង្កាត់សៀមរាប ចំនួន១០៣នាក់ ដែលក្នុងម្នាក់ៗ ទទួលបាន៖ មី ១កេស សម្រាប់ដោះស្រាយជីវភាពប្រចាំថ្ងៃក្នុងរដូវភ្ជុំបិណ្ឌនេះ។
ព្រះយសមុនីវង្សី រិត ស៊ីធីម យសលាភោ មានសង្ឃដីកាថា ទេយ្យទាននិងអំណោយដែលប្រគេនដល់ព្រះសង្ឃ និងជូនដល់ប្រជាការពារនាពេលនេះ គឺទទួលបានពីការចូលរួមបរិច្ចាករបស់សប្បុរសជន និងប្រជាពុទ្ឋបរិស័ទជិតឆ្ងាយ តាមកម្លាំងសទ្ឋាជ្រះថ្លាខ្លួនបន្ទាប់ពីព្រះអង្គបានផ្ដួចផ្ដើម និងបានធ្វើការគៀងគរនារយៈកាលកន្លងមក។ ដើម្បីទប់ស្កាត់ការឆ្លងរាលដាលនៃជំងឺ កូវីដ-១៩ រាជរដ្ឋាភិបាលកម្ពុជា បានសម្រេចផ្អាកការរៀបចំពិធីបុណ្យកាន់បិណ្ឌ ខណៈរដ្ឋបាលខេត្តសៀមរាបក៏បានចេញសេចក្ដីណែនាំ ឲ្យផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌនេះដែរ ដូច្នេះដោយពិនិត្យឃើញស្ថានភាពជាក់ស្តែងតាំងពីអំឡុងជួបវិបត្តិដោយសារជំងឺកូវីដ-១៩ មក ទីអារាមនានា ជាពិសេសវត្តពោធិបន្ទាយជ័យ ពុំសូវមានប្រជាពុទ្ឋបរិស័ទយកចង្ហាន់មកប្រគេនព្រះសង្ឃ ហើយពិធីបុណ្យទាននានា ក៍ត្រូវខកខានផ្អាកផងដែរនោះ ទើបព្រះអង្គសម្រេចប្រគេនទេយ្យទានដល់ព្រះសង្ឃក្នុងវត្ត សម្រាប់ដោះស្រាយជីវភាពប្រចាំថ្ងៃដោយអង្គឯងក្នុងរដូវភ្ជុំបិណ្ឌនេះ រួមទាំងការជូនអំណោយដល់ប្រជាការពារមកពី ៥ភូមិ ក្នុងសង្កាត់សៀមរាបផងដែរ។
ក្នុងឱកាសនោះដែរលោក ម៉ៃ សាមេត ចៅសង្កាត់សៀមរាប បានសម្ដែងនូវការកោតសរសើរ និងថ្លែងអំណរព្រះគុណចំពោះគំនិតផ្តួចផ្តើម របស់ព្រះយសមុនីវង្សី រិត ស៊ីធីម យសលាភោ ព្រមទាំងការចូលរួមរបស់សប្បុរសជនជិតឆ្ងាយដែលបានលះបង់ធនធានផ្ទាល់ ទោះតិចក្តីច្រើនក្តី ដើម្បីយកមកចែករំលែកដល់ព្រះសង្ឃ និងប្រជាការពារភូមិដែលមូលដ្ឋាននេះកំពុងបិទខ្ទប់ ព្រមទាំងជួបភាពខ្វះខាតលើជីវភាពប្រចាំថ្ងៃ ក្នុងដំណាក់កាលវិបត្តិដោយសារជំងឺកូវីដ-១៩ ដែលនេះបង្ហាញឱ្យឃើញពីវប្បធម៌ចែករំលែក ជួយទុក្ខធុរៈគ្នាទៅវិញទៅមកក្នុងគ្រាលំបាក ដែលសបញ្ជាក់ពីទឹកព្រះទ័យ និងស្មារតីយកអាសារគ្នាក្នុងគ្រាលំបាក។
ព័ត៌មានជាតិ ថ្មីៗ
ជាមួយគ្នានោះដែរ លោកចៅសង្កាត់ ក៏បានស្នើសុំឲ្យមានការយោគយល់ និងផ្តាំផ្ញើ សូមឱ្យចូលរួមទាំងអស់អង្គទាំងអស់គ្នា ដើម្បីរួមគ្នាទប់ស្កាត់ការឆ្លងរាលដាលជំងឺកូវីដ-១៩ នៅក្នុងសហមន៍របស់យើង ក្នុងអំឡុងពេលនេះ ជាពិសេសត្រូវអនុវត្តឲ្យបានជាប់ជាប្រចាំតាមសេចក្តីណែនាំរបស់រដ្ឋបាលខេត្ត វិធានការនានារបស់ក្រសួងសុខាភិបាល និងវិធានការរបស់រាជរដ្ឋាភិបាល ៣កុំ និង៣ការពារ ឲ្យបានខ្ជាប់ខ្ជួន៕
អត្ថបទ និងរូបភាព ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
